ബെംഗളൂരുവില്‍ ഡേകെയര്‍ സെന്ററില്‍ കുഞ്ഞുങ്ങളെ ക്രൂരമായി പീഡിപ്പിച്ച അഞ്ച് ആയമാര്‍ക്കെതിരെ പൊലീസ് കേസെടുത്തു. ബെംഗളൂരുവിലെ ഒരു ഐടി കമ്പനിയുടെ ക്യാംപസിനുള്ളില്‍ പ്രവര്‍ത്തിച്ചിരുന്ന ഡേകെയര്‍ സെന്ററിലാണ് കുട്ടികള്‍ ശാരീരിക പീഡനത്തിനു ഇരയായത്. കരയുന്ന കുഞ്ഞുങ്ങളെ വാഷിങ് മെഷീനിലുള്ളിലേക്ക് ഇറക്കി വച്ചും ശുചിമുറിയിക്കുള്ളില്‍ പൂട്ടിയിട്ടും, വെള്ളം മുഖത്തേക്ക് ശക്തിയായി ചീറ്റിച്ചും ആയമാര്‍ ഭീഷണിപ്പെടുത്തുന്ന വിഡിയോ ദൃശ്യങ്ങളാണ് പുറത്തുവന്നത്. സെന്ററിനുള്ളില്‍ സ്ഥാപിച്ചിരുന്ന സിസിടിവിയില്‍ പതിഞ്ഞ ദൃശ്യങ്ങള്‍ സമൂഹമാധ്യമങ്ങളില്‍ എത്തിയത്. ഇതേത്തുടര്‍ന്ന് പൊലീസ് നടത്തിയ അന്വേഷണത്തിലാണ് അഞ്ച് ആയമാര്‍ക്കെതിരെ കേസ് റജിസ്റ്റര്‍ ചെയ്തത്.

രണ്ട് മുതല്‍ മൂന്ന് വയസ്സ് വരെ പ്രായമുള്ള കുഞ്ഞുങ്ങളായിരുന്നു ഡേകെയര്‍ സെന്ററില്‍ ഉണ്ടായിരുന്നത്. ഐടി പാര്‍ക്കില്‍ ജോലി ചെയ്തിരുന്നവരാണ് കുഞ്ഞുങ്ങളെ പരിചരിക്കാന്‍ ഇവിടെ എത്തിച്ചിരുന്നത്. ജുവനൈല്‍ ജസ്റ്റിസ് നിയമപ്രകാരമുള്ള വകുപ്പുകള്‍ ചുമത്തിയാണ് പൊലീസ് ആയമാര്‍ക്കെതിരെ കേസെടുത്തത്.