ഓപ്പറേഷന് തൂഫാനില് കുടുങ്ങി ഒഡീഷ സ്വദേശി
ഓപ്പറേഷന് തൂഫാനില് 11 കിലോ കഞ്ചാവുമായി ഒഡീഷ സ്വദേശി കുടുങ്ങി. രാമനാട്ടുകര, ഹൈലൈറ്റ് മാള്, മാങ്കാവ് ഭാഗങ്ങളില് കഞ്ചാവ് മൊത്തവില്പന നടത്തി വന്നിരുന്ന ഒഡീഷ സ്വദേശി പ്രസല് പ്രഥാനാണ് (47) അറസ്റ്റിലായത്. കോഴിക്കോട് സിറ്റി പൊലീസ് കമ്മിഷണര് എ.പി.ഷൗക്കത്തലിക്കു ലഭിച്ച രഹസ്യ വിവരത്തിന്റെ അടിസ്ഥാനത്തില്, ഫറോക്ക് അസിസ്റ്റന്റ് കമ്മിഷണര് എ. പ്രേംജിത്തിന്റെ നേതൃത്വത്തിലുള്ള എസിപി സ്ക്വാഡും, ഫറോക്ക് പൊലീസും ചേര്ന്നാണ് പ്രതിയെ പിടികൂടിയത്.
ഭുവനേശ്വറില്നിന്ന് മൊത്തമായി കഞ്ചാവ് വാങ്ങി കോഴിക്കോട് കൊമ്മേരി ഭാഗത്ത് വാടകയ്ക്ക് താമസിച്ച് കോഴിക്കോട് നഗരത്തിലും ഫറോക്ക് മേഖലയിലെ വിവിധ ഭാഗങ്ങളിലുമായി ചില്ലറ വില്പന നടത്തി വരികയായിരുന്നു പ്രതിയെന്ന് പൊലീസ് അറിയിച്ചു. ഇതര സംസ്ഥാന തൊഴിലാളികള് വഴി ലഹരിവസ്തുക്കള് നഗരത്തിലേക്ക് എത്തുന്നതായി ലഭിച്ച രഹസ്യ വിവരങ്ങളുടെ അടിസ്ഥാനത്തില് കോഴിക്കോട് സിറ്റി പൊലീസ് കമ്മിഷണറുടെ നിര്ദേശപ്രകാരം കര്ശന പരിശോധനകളും അന്വേഷണങ്ങളും നടത്തി വരികയായിരുന്നു.
പെയിന്റിങ് തൊഴിലാളിയായ പ്രതി ഇടയ്ക്കിടെ നാട്ടില് പോയി വരാറുണ്ടെന്നും, പൊലീസ് പരിശോധന ഒഴിവാക്കുന്നതിനായി പുലര്ച്ചെ കോഴിക്കോട് എത്തുന്ന സ്ലീപ്പര് ബസില് രാമനാട്ടുകരയില് ഇറങ്ങി ഓട്ടോറിക്ഷയില് താമസസ്ഥലത്തേക്ക് കഞ്ചാവ് എത്തിക്കുകയായിരുന്നു ഇയാളുടെ രീതിയെന്ന് അന്വേഷണത്തില് കണ്ടെത്തി. ശേഷം ആവശ്യക്കാര്ക്ക് ചില്ലറ വില്പന നടത്തുകയായിരുന്നെന്നും കണ്ടെത്തി. പ്രതിയുടെ നീക്കങ്ങള് നിരീക്ഷിച്ച പൊലീസ് രാമനാട്ടുകരയില് ബസില് നിന്ന് ട്രോളി ബാഗുമായി ഇറങ്ങിയ പ്രതിയെ കസ്റ്റഡിയിലെടുക്കുകയായിരുന്നു. ബാഗ് പരിശോധിച്ചതില് 11 കിലോ കഞ്ചാവ് പായ്ക്ക് ചെയ്ത് സൂക്ഷിച്ച നിലയില് കണ്ടെത്തി.
പ്രതിയില് നിന്ന് കഞ്ചാവ് വാങ്ങിയവരെയും പൊലീസ് നിരീക്ഷണത്തിലാക്കിയതായും അവരെ സംബന്ധിച്ചുള്ള അന്വേഷണം പുരോഗമിക്കുകയാണെന്നും അസിസ്റ്റന്റ് കമ്മിഷണര് അറിയിച്ചു. ഫറോക്ക് പൊലീസ് സ്റ്റേഷനിലെ സബ് ഇന്സ്പെക്ടര് കെ. മിഥുന് പ്രതിയെ അറസ്റ്റ് ചെയ്തു. അന്വേഷണ സംഘത്തില് ഫറോക്ക് സ്റ്റേഷനിലെ സീനിയര് സിപിഒമാരായ പ്രേംജിത്ത്, സുമേഷ്, സിപിഒമാരായ ആഷിദ്, യശ്വന്ത്, സൈബര് സെല്ലിലെ സിപിഒ ലിനിത്ത് എന്നിവരും ഫറോക്ക് ക്രൈം സ്ക്വാഡിലെ അസിസ്റ്റന്റ് സബ് ഇന്സ്പെക്ടര് അരുണ് കുമാര്, സീനിയര് സിപിഒമാരായ ഐ.ടി. വിനോദ്, അനൂജ് വളയനാട്, സിപിഒമാരായ സനീഷ് പന്തീരാങ്കാവ്, സുബീഷ് വേങ്ങേരി, അഖില് ബാബു എന്നിവരും ഉള്പ്പെട്ടിരുന്നു.
https://www.facebook.com/Malayalivartha
