ആറുമാസമായി ശമ്പളമില്ലാതെ സാമ്പത്തിക പ്രതിസന്ധിയിലായ സാക്ഷരത പ്രേരക് ജീവനൊടുക്കി... രാഷ്ട്രപതിയില്‍ നിന്ന് മികച്ച സാക്ഷരത പ്രവര്‍ത്തകനുള്ള പുരസ്‌കാരം നേടിയിട്ടുണ്ട്, ശമ്പളം ഉള്‍പ്പെടെ ആവശ്യപ്പെട്ട് കേരള സാക്ഷരതാ പ്രേരക് അസോസിയേഷന്‍ (കെ.എസ്.പി.എ) സെക്രട്ടേറിയറ്റിന് മുന്നില്‍ 82 ദിവസമായി സമരം നടത്തുന്നതിനിടെയാണ് ബിജുമോന്റെ ആത്മഹത്യ

രാഷ്ട്രപതിയില്‍ നിന്ന് മികച്ച സാക്ഷരത പ്രവര്‍ത്തകനുള്ള പുരസ്‌കാരം നേടിയ ബ്ലോക്ക് നോഡല്‍ സാക്ഷരത പ്രേരക് പത്തനാപുരം കരിശനംകോട് ബിന്ദുമന്ദിരത്തില്‍ ഇ.എസ്.ബിജുമോനാണ് (49) വീട്ടില്‍ തൂങ്ങിമരിച്ചത്.

കിടപ്പുമുറിയുടെ ഉത്തരത്തില്‍ ഇന്നലെ രാവിലെ ഏഴരയോടെയാണ് തൂങ്ങിമരിച്ച നിലയില്‍ കണ്ടെത്തിയത്. സമയം കഴിഞ്ഞിട്ടും കാണാത്തതിനെ തുടര്‍ന്ന് സഹോദരി വാതില്‍ തുറന്നപ്പോഴാണ് മൃതദേഹം കണ്ടത്.

ബിജുമോന് സാമ്പത്തിക ബാദ്ധ്യതകളുണ്ടായിരുന്നു. ശമ്പളം കിട്ടിയില്ലെങ്കില്‍ ആത്മഹത്യ ചെയ്യുകയല്ലാതെ നിവൃത്തിയില്ലെന്ന് കഴിഞ്ഞ ദിവസം രാത്രി സുഹൃത്തുകളോട് പറഞ്ഞിരുന്നു.


പൊതുവിദ്യാഭ്യാസ വകുപ്പിന് കീഴിലായിരുന്ന പ്രേരക്മാരെ തദ്ദേശ വകുപ്പിലേക്ക് മാറ്റി കഴിഞ്ഞ മാര്‍ച്ച് 31ന് ഉത്തരവിറങ്ങിയിരുന്നെങ്കിലും നടപ്പായില്ല. ഇതേത്തുടര്‍ന്നാണ് ഇവരുടെ ശമ്പളം മുടങ്ങിയത്.

സംസ്ഥാനത്തെ 1714 പ്രേരക്മാര്‍ ബിജുമോനെ പോലെ സമാന പ്രതിസന്ധിയിലൂടെ കടന്നു പോവുകയാണെന്ന് സംഘടന പ്രതിനിധികള്‍ പറയുന്നു.


പ്രാദേശിക മാദ്ധ്യമ പ്രവര്‍ത്തകന്‍ കൂടിയായ ബിജുമോന്‍ സാംസ്‌കാരിക പ്രവര്‍ത്തനങ്ങളിലും സജീവമായിരുന്നു. പരേതനായ ശിവരാമനാചാരി പിതാവും വിജയമ്മ മാതാവുമാണ്. അവിവാഹിതനാണ്. ബിന്ദു, സിന്ധു എന്നിവര്‍ സഹോദരിമാരാണ്. പോസ്റ്റ്‌മോര്‍ട്ടത്തിന് ശേഷം മൃതദേഹം വീട്ടുവളപ്പില്‍ സംസ്‌കാര ചടങ്ങുകള്‍ നടന്നു.