സംവിധായകന്‍ ബേസില്‍ ജോസഫ് അച്ഛനായി. ആശുപത്രിയില്‍ നിന്ന് ഭാര്യ എലിസബത്ത് സാമുവലിനും കുഞ്ഞിനുമൊപ്പമുള്ള ചിത്രം സോഷ്യല്‍ മീഡിയയിലൂടെ പങ്കുവച്ചുകൊണ്ടാണ് ബേസില്‍ സന്തോഷ വര്‍ത്തമാനം അറിയിച്ചത്. പെണ്‍കുഞ്ഞിന് ഹോപ്പ് എലിസബത്ത് ബേസില്‍ എന്നാണ് പേരിട്ടിരിക്കുന്നത്.ഞങ്ങളുടെ സന്തോഷത്തിന്‍റെ ഈ പൊതിക്കെട്ട് കടന്നുവന്നിരിക്കുന്ന വിവരം ആവേശപൂര്‍വ്വം അറിയിക്കുകയാണ്. ഹോപ്പ് എലിസബത്ത് ബേസില്‍! ഞങ്ങളുടെ ഹൃദയങ്ങള്‍ ഇതിനകം തന്നെ അവള്‍ മോഷ്ടിച്ചു കളഞ്ഞു. അവളോടുള്ള സ്നേഹത്താല്‍ മതിമറന്ന അവസ്ഥയിലാണ് ഞങ്ങള്‍. അവള്‍ വളര്‍ന്നു വരുന്നത് കാണാനും ഓരോദിനവും അവളില്‍ നിന്ന് പഠിക്കാനുമായി കാത്തിരിക്കുകയാണ് ഞങ്ങള്‍, ചിത്രത്തിനൊപ്പം ബേസില്‍ കുറിച്ചു.ദീര്‍ഘനാളത്തെ പ്രണയത്തിനു ശേഷം 2017 ല്‍ ആയിരുന്നു ബേസിലിന്‍റെയും എലിസബത്തിന്‍റെയും വിവാഹം. തിരുവനന്തപുരം സിഇടിയിലെ ക്യാമ്പസ് കാലത്ത് ഷോര്‍ട്ട് ഫിലിമുകള്‍ സംവിധാനം ചെയ്യുകയും അഭിനയിക്കുകയും ചെയ്തുകൊണ്ടാണ് ബേസില്‍ സിനിമയുടെ ലോകത്തേക്ക് എത്തുന്നത്.

വിനീത് ശ്രീനിവാസന്‍ സംവിധാനം ചെയ്ത തിര എന്ന ചിത്രത്തില്‍ അസിസ്റ്റ് ചെയ്തുകൊണ്ടാണ് മുഖ്യധാരയിലേക്കുള്ള അരങ്ങേറ്റം. 2015 ല്‍ കുഞ്ഞിരാമായണം എന്ന സൂപ്പര്‍ഹിറ്റ് ചിത്രം സംവിധാനം ചെയ്തുകൊണ്ട് സ്വതന്ത്ര സംവിധായകനായി അരങ്ങേറി. ഗോധ, മിന്നല്‍ മുരളി എന്നിവയാണ് സംവിധാനം ചെയ്ത മറ്റു രണ്ട് ചിത്രങ്ങള്‍.ഗോധ തിയറ്ററുകളില്‍ സാമ്പത്തിക വിജയം നേടിയപ്പോള്‍ മലയാളത്തിലെ ആദ്യ സൂപ്പര്‍ഹീറോ ചിത്രമെന്ന വിശേഷണത്തോടെ എത്തിയ മിന്നല്‍ മുരളി നെറ്റ്ഫ്ലിക്സിലൂടെ ലോകമെമ്പാടും ജനപ്രീതി നേടി. സമീപകാലത്ത് നടന്‍ എന്ന നിലയിലും വിജയത്തിളക്കത്തിലാണ് ബേസില്‍. ജാനെമന്‍, ജയ ജയ ജയ ജയ ഹേ, പാല്‍തു ജാന്‍വര്‍ തുടങ്ങിയ വിജയ ചിത്രങ്ങളില്‍ ബേസില്‍ ആയിരുന്നു നായകന്‍.കുറച്ചു ദിവസങ്ങൾക്ക് മുൻപ് ക്യാമ്പസ് കാലഘട്ടത്തെ കുറിച്ചും പ്രണയത്തെ കുറിച്ചുമൊക്ക പറയുകയാണ് നടനും സംവിധായകനുമായ ബേസില്‍ ജോസഫ്. കോളേജ് എന്ന് പറയുമ്പോള്‍ തന്നെ മനസിലേക്ക് ആദ്യം വരുന്നത് തന്റെ പങ്കാളിയാണെന്നും അവിടെ വെച്ചാണ് ഇരുവരും പ്രണയിക്കാന്‍ തുടങ്ങിയതെന്നും ബേസില്‍ പറഞ്ഞു.

തനിക്ക് കോളേജ് ജീവിതത്തില്‍ നിന്നും കിട്ടിയ ട്രോഫിയാണ് പങ്കാളി എലിസബത്തെന്നും തന്റെ ജീവിതത്തില്‍ വലിയ മാറ്റങ്ങള്‍ സംഭവിക്കുന്നത് അക്കാലത്താണെന്നും ബേസില്‍ പറഞ്ഞു. റെഡ് എഫ്.എമ്മിന് നല്‍കിയ അഭിമുഖത്തിലാണ് ബേസില്‍ ഇക്കാര്യങ്ങള്‍ പറഞ്ഞത്.‘കോളേജ് എന്ന് പറയുമ്പോള്‍ മനസിലേക്ക് ആദ്യം വരുന്നത് എന്റെ ഭാര്യ എലിസബത്താണ്. ഞങ്ങള്‍ എലിയെന്നാണ് വിളിക്കുന്നത്. കോളേജില്‍ വെച്ചാണ് ഞങ്ങള്‍ ആദ്യം കണ്ടുമുട്ടുന്നത്. കോളേജില്‍ വെച്ച് തന്നെയാണ് പ്രണയിക്കുന്നതും. പിന്നെ വിവാഹിതരാകുന്നത് പ്രായമായതിനുശേഷമാണ്.എനിക്ക് കോളേജില്‍ നിന്നും കിട്ടിയ ഏറ്റവും വലിയ ട്രോഫി അവളായിരുന്നു.

എഞ്ചിനിയറിങ്ങൊക്കെ പഠിച്ചു. അത് പഠിച്ചു എന്നുമാത്രമാണ്. ശരിക്കും പറഞ്ഞാല്‍ മൊത്തത്തിലുള്ള എന്റെ ലൈഫ് മാറ്റിയത് കോളേജിലുള്ള നാല് വര്‍ഷമാണ്. അതുവരെ ഉണ്ടായിരുന്ന ഒരാളെയായിരുന്നില്ല പിന്നീട് അങ്ങോട്ട്.ശരിക്കും പുതിയൊരു ലോകമായിരുന്നു കോളേജ് എനിക്ക്. സ്വാതന്ത്ര്യമൊക്കെ എനിക്ക് അവിടെ നിന്നുമാണ് കിട്ടി തുടങ്ങുന്നത്. പഠിച്ചത് സര്‍ക്കാര്‍ കോളേജിലായതുകൊണ്ട് സ്വാതന്ത്ര്യം അല്‍പം കൂടുതലുണ്ടായിരുന്നു എന്ന് വേണമെങ്കില്‍ പറയാം.എന്നായിരുന്നു ബസിലിന്റെ വാക്കുകൾ ,ഇ ഏതായാലും കുഞ്ഞു പിറന്ന സന്തോഷത്തിലാണ് ഇരുവരും, സമൂഹ മാധ്യമങ്ങളിൽ സുഹൃത്തുക്കളും , സിനിമ ചലച്ചിത്ര മേഖലയിൽ നിന്നുള്ളവരെല്ലാം ആശംസ അറിയിച്ചു കൊണ്ട് രംഗത്ത് വരുന്നുണ്ട് നിരവധി കമ്മന്റുകളാണ് ചിത്രത്തിന് താഴെ ലഭിക്കുന്നത്..