സ്വര്‍ണക്കടത്ത് കേസ് സര്‍ക്കാരിനും പാര്‍ട്ടിക്കുമുണ്ടാക്കിയ പുലിവാല്‍ ചെറുതല്ല. കഴിഞ്ഞ നിയമസഭാ തെരഞ്ഞെടുപ്പില്‍ എല്ലാം അതിജീവിച്ച് സര്‍ക്കാര്‍ വീണ്ടും അധികാരത്തില്‍ വന്നതോടെയാണ് അതിന് ശമനമുണ്ടായത്. ഇപ്പോഴിതാ ലോക്‌സഭാ തെരഞ്ഞെടുപ്പിന്റെ ഒരുക്കത്തിലാണ് പാര്‍ട്ടിക്കാര്‍. ഇനി ഒരു വര്‍ഷം പോലുമില്ല തെരഞ്ഞെടുപ്പിന്. അതിനിടയ്ക്കാണ് ശിവശങ്കറിന്റെ അറസ്റ്റ് വരുന്നത്. ലോക്‌സഭ തെരഞ്ഞെടുപ്പ്  അടുക്കുമ്പോള്‍ കലാശക്കൊട്ടാകാനാണ് സാധ്യത.

ലൈഫ് മിഷന്‍ കരാറിലെ കള്ളപ്പണ കേസില്‍ കസ്റ്റഡിയിലുള്ള എം ശിവശങ്കറിന്റെ ചോദ്യം ചെയ്യല്‍ എന്‍ഫോഴ്‌സമെന്റ് തുടരുകയാണ്. ടെണ്ടറില്ലാതെ ലൈഫ് മിഷന്‍ കരാര്‍ യൂണിടാക്കിന് നല്‍കാന്‍ ശിവശങ്കറിന് 1 കോടി രൂപ കോഴ ലഭിച്ചെന്നാണ് മൊഴി. ആരോപണം ശിവശങ്കര്‍ നിഷേധിച്ചെങ്കിലും ഇക്കാര്യത്തില്‍ കൂടുതല്‍ വ്യക്തതയുണ്ടാക്കാനാണ് ഇന്ന് ശ്രമിക്കുക. മാത്രമല്ല ശിവശങ്കറിന് പുറമെ മറ്റ് ആരൊക്കെ അഴിമതിയില്‍ പങ്കാളികളായി എന്നും ഇഡി പരിശോധിക്കുന്നുണ്ട്.

മൂന്ന് കോടി മുപ്പത്തി എട്ട് ലക്ഷം രൂപയുടെ കോഴ ഇടപാടാണ് ഇഡി കണ്ടെത്തിയതെങ്കിലും വിദേശത്തും ഇടപാട് നടന്നെന്ന് സ്വപ്ന സുരേഷ് അടക്കം ആരോപിച്ചിട്ടുണ്ട്. അതിനിടെ ലൈഫ് മിഷന്‍ കരാറിലെ കോഴപ്പണം വരുന്നതിനു മുന്‍പ് സ്വപ്ന സുരേഷും എം ശിവശങ്കറും നടത്തിയ വാട്‌സ്ആപ്പ് ചാറ്റ് പുറത്ത് വന്നു. ശ്രദ്ധയോടെ കാര്യങ്ങള്‍ കൈകാര്യം ചെയ്യണമെന്ന നിര്‍ദ്ദേശമാണ് ശിവശങ്കര്‍ നല്‍കുന്നത്.

ഒന്നിലും കാര്യമായി ഇടപെടാതെ സ്വപ്ന ഒഴിഞ്ഞു നില്‍ക്കണമെന്നും എന്തെങ്കിലും വീഴ്ച ഉണ്ടായാല്‍ എല്ലാം സ്വപ്നയുടെ തലയില്‍ ഇടുമെന്നും ശിവശങ്കര്‍ മുന്നറിയിപ്പ് നല്‍കുന്നുണ്ട്. സ്വപ്നയ്ക്ക് ജോലി നല്‍കാന്‍ മുഖ്യമന്ത്രി നിര്‍ദേശിച്ചു എന്ന സംഭാഷണവും ചാറ്റിലുണ്ട്. എന്നാല്‍ സ്വപ്നയ്ക്ക് ജോലി നല്‍കാന്‍ താന്‍ മുഖ്യമന്ത്രിയോട് ആവശ്യപ്പെട്ടു എന്നാണ് ചോദ്യം ചെയ്യലില്‍ ശിവശങ്കര്‍ തിരുത്തിയിട്ടുള്ളത്

ലൈഫ് മിഷന്‍ കരാര്‍ യൂണിടെക് കമ്പനിക്ക് ലഭിക്കുന്നതില്‍ മുഖ്യപങ്കുവഹിച്ചത് ശിവശങ്കറാണെന്നാണ് ഇ ഡിയുടെ റിപ്പോര്‍ട്ടില്‍ ഉളളത്. എന്നാല്‍ ചോദ്യംചെയ്യലില്‍ ശിവശങ്കര്‍ ഇതുവരെ കുറ്റം സമ്മതിച്ചിട്ടില്ല. അതിനാല്‍ തന്നെ ശിവശങ്കറിനെതിരെ കണ്ടെത്തലുകളില്‍ ഇ ഡിക്ക് കൂടുതല്‍ വ്യക്തത വരുത്തേണ്ടതുണ്ട്. ഒപ്പം കേസില്‍ കൂടുതല്‍ ഉന്നതര്‍ക്ക് പങ്കുണ്ടോ എന്നതിനെക്കുറിച്ചും അന്വേഷിക്കേണ്ടതുണ്ട്. അതിനാലാണ് ചോദ്യംചെയ്യുന്നത് തുടരുന്നത്. കഴിഞ്ഞ ദിവസം അറസ്റ്റിലായ ശിവശങ്കറിനെ എറണാകുളം സി ബി ഐ കോടതി അഞ്ചുദിവസത്തേക്ക് ഇ ഡിയുടെ കസ്റ്റഡിയില്‍ വിട്ടിരിക്കുകയാണ്.

അതേസമയം ശിവശങ്കറിനെ ഇ ഡി അറസ്റ്റ് ചെയ്തതോടെ സി.ബി.ഐ അന്വേഷണം പലരിലേക്കും എത്തിയേക്കും. അഴിമതി നിരോധന നിയമപ്രകാരം ആയിരിക്കും സി.ബി.ഐയുടെ പുതിയ കേസ്. ആരെ വേണമെങ്കിലും ചോദ്യം ചെയ്യാം. വിദേശ സംഭാവന സ്വീകരിക്കല്‍ നിയന്ത്രണ നിയമം ലംഘിച്ചതിനും അതിനുവേണ്ടി ഗൂഢാലോചന നടത്തിയതിനുമാണ് നിലവിലെ സി.ബി.ഐ കേസ്.

ഇതില്‍ പ്രതിസ്ഥാനത്തുള്ളത് വടക്കാഞ്ചേരിയിലെ നിര്‍മ്മാണ കരാര്‍ ലഭിച്ച യൂണി ടെക് എം.ഡി സന്തോഷ് ഈപ്പന്‍ മാത്രമാണ്. 4.48കോടി കോഴ കൊടുത്തെന്ന് വെളിപ്പെടുത്തിയത് സന്തോഷ് ഈപ്പനാണ്. ആ കോഴയിലെ ഒരു കോടിയാണ് തന്റെ ബാങ്ക് ലോക്കറില്‍ നിന്ന് പിടിച്ചെടുത്ത ഒരു കോടി രൂപയെന്നും അത് ശിവശങ്കറിന് ലഭിച്ചതാണെന്നും സ്വപ്നയും വെളിപ്പെടുത്തിയിട്ടുണ്ട്. ഇതുപിടിവള്ളിയാക്കി അഴിമതിക്കുരുക്ക് ഒരുക്കാന്‍ സി.ബി.ഐയ്ക്കും കള്ളപ്പണ ഇടപാടിന് കേസെടുക്കാന്‍ ഇ.ഡിക്കും അവസരം കിട്ടി.

4.48 കോടി കോഴ ആരൊക്കെ പങ്കിട്ടെന്ന് അറിയാനാണ് ഇ.ഡി. ശിവശങ്കറിനെ അറസ്റ്റ് ചെയ്തു ചോദ്യം ചെയ്യുന്നത്. അതുവഴി ഉന്നതരിലേക്ക് എത്താമെന്ന് രണ്ട് അന്വേഷണ ഏജന്‍സികളും കണക്കുകൂട്ടുന്നു.