കെ എസ് ആര്‍ ടി സി ജീവനക്കാരുടെ ശമ്പള വിതരണം ഗഡുക്കളായി നല്‍കാന്‍ പുതിയ നിര്‍ദേശം. അത്യാവശ്യക്കാര്‍ക്ക് ആദ്യ ഗഡു അഞ്ചാം തീയതിയ്ക്ക് മുന്‍പ് നല്‍കും. ബാക്കി ശമ്പളം സര്‍ക്കാര്‍ ധനസഹായത്തിന് ശേഷം നല്‍കും. ശമ്പള വിതരണത്തിനുള്ള മൊത്തം തുകയില്‍ പകുതി കെ എസ് ആര്‍ ടി സി സമാഹരിക്കുന്നുണ്ട്. ഇത് വച്ചാണ് ആദ്യ ഗഡു കൊടുക്കാന്‍ ഉദ്ദേശിക്കുന്നതെന്നാണ് എം ഡിയുടെ ഉത്തരവില്‍ പറയുന്നു. ഗഡുക്കളായി ശമ്പളം വാങ്ങാന്‍ താല്‍പര്യമില്ലാത്തവര്‍ ഈ മാസം 25ന് മുന്‍പ് സമ്മത പത്രം നല്‍കണമെന്നും ഉത്തരവില്‍ പറയുന്നു.

അതേസമയം, വിരമിച്ച കെ എസ് ആര്‍ ടി സി ജീവനക്കാര്‍ക്കുള്ള ആനുകൂല്യം വിതരണം ചെയ്യുന്നത് സംബന്ധിച്ച നിര്‍ദേശം അംഗീകരിച്ച ഹൈക്കോടതി മാര്‍ച്ച് 30നുള്ളില്‍ ഒരു ലക്ഷം രൂപ പെന്‍ഷന്‍ ആനുകൂല്യം നല്‍കണമെന്ന് ഉത്തരവിട്ടിട്ടുണ്ട്. ആനുകൂല്യ വിതരണത്തിന് മുന്‍ഗണന നല്‍കണമെന്നും കോടതി നിര്‍ദേശിച്ചു. ഈ മാസം 28ന് മുന്‍പ് പെന്‍ഷന്‍ ആനുകൂല്യം വിതരണം ചെയ്യണമെന്ന ഉത്തരവ് പുതുക്കിയാണ് ഇടക്കാല ഉത്തരവ് പുറപ്പെടുവിച്ചത്.

മക്കളുടെ വിവാഹം, ആശുപത്രി ആവശ്യങ്ങള്‍ എന്നിവയ്ക്ക് മുന്‍ഗണന നല്‍കണം. മാനേജിംഗ് ഡയറക്ടര്‍ക്ക് അര്‍ഹതയുള്ളവര്‍ കത്ത് നല്‍കിയാല്‍ രണ്ടാഴ്ചയ്ക്കുള്ളില്‍ തീരുമാനം എടുക്കണം. ഏപ്രിലില്‍ കോര്‍പ്പസ് ഫണ്ട് പുനഃസ്ഥാപിക്കണം. ഇതില്‍ ഫണ്ട് വന്നാല്‍ എത്രയും വേഗംതന്നെ ബാക്കിയുള്ളവര്‍ക്കും പണം നല്‍കണമെന്നും ഹൈക്കോടതി വ്യക്തമാക്കി. മാര്‍ച്ച് 31ന് ഹര്‍ജി വീണ്ടും പരിഗണിക്കും.

വിരമിച്ചവര്‍ക്കുള്ള ആനുകൂല്യം വിതരണം ചെയ്യുന്നത് സംബന്ധിച്ച് കെ എസ് ആര്‍ ടി സി മുന്നോട്ടുവച്ച നിര്‍ദേശം ഹൈക്കോടതി അംഗീകരിക്കുകയായിരുന്നു. ഒരു ലക്ഷം രൂപ 45 ദിവസത്തിനുള്ളില്‍ നല്‍കാമെന്ന നിര്‍ദേശമാണ് കോടതി അംഗീകരിച്ചത്. വിരമിച്ചവര്‍ക്ക് ആനുകൂല്യം നല്‍കാത്തത് മനുഷ്യാവകാശ ലംഘനമാണെന്ന് നിരീക്ഷിച്ച കോടതി ഇടപെടാതിരിക്കാനാകില്ലെന്ന് വ്യക്തമാക്കുകയും ചെയ്തു.

3200 കോടി രൂപയുടെ ലോണ്‍ ആണ് കെ എസ് ആര്‍ ടി സിക്കുള്ളത്. ഇക്കാര്യം കോടതിയെ അറിയിക്കുകയായിരുന്നു. ഹര്‍ജിക്കാര്‍ക്ക് 50 ശതമാനം ആനുകൂല്യങ്ങള്‍ നല്‍കാന്‍ മാത്രം എട്ടുകോടി രൂപ വേണമെന്ന് കെ എസ് ആര്‍ ടി സി വ്യക്തമാക്കി. വിരമിച്ചവര്‍ക്കുള്ള ആനുകൂല്യ വിതരണത്തിനായി പത്ത് ശതമാനം മാറ്റിവയ്ക്കണമെന്നത് കോടതി ഉത്തരവാണ്. ഇത് ആരോട് ചോദിച്ച് നിര്‍ത്തലാക്കിയെന്ന് കോടതി ആരാഞ്ഞു. പിന്നാലെ ഏപ്രില്‍ ഒന്നുമുതല്‍ മാറ്റിവയ്ക്കാമെന്ന് കെ എസ് ആര്‍ ടി സി പറഞ്ഞു. മാര്‍ച്ചുമുതല്‍ തന്നെ നിര്‍ബന്ധമായും ഇത് ചെയ്യണമെന്ന് കോടതി നിര്‍ദേശിച്ചു. ഇതിന് പിന്നാലെയാണ് ഒരുലക്ഷം രൂപ 45 ദിവസത്തിനുള്ളില്‍ നല്‍കാമെന്ന കെ എസ് ആര്‍ ടി സിയുടെ വാദം കോടതി അംഗീകരിച്ചത്.