വിദ്യാഭ്യാസ വകുപ്പില്‍ 6,005 പുതിയ തസ്തികകള്‍ക്കായി ശുപാര്‍ശ. 5,906 അധ്യാപകരുടേത് ഉള്‍പ്പെടെയുള്ള തസ്തികകളില്‍ ഏറ്റവും കൂടുതല്‍ മലപ്പുറത്താണ്. വിദ്യാഭ്യാസവകുപ്പ് ശുപാര്‍ശ ധനവകുപ്പിന് കൈമാറി.2022-23 അധ്യയന വര്‍ഷത്തെ തസ്തിക നിര്‍ണയം പൂര്‍ത്തിയായതായി വിദ്യാഭ്യാസ മന്ത്രി വി.ശിവന്‍കുട്ടിയുടെ ഓഫിസ് അറിയിച്ചു.

2,313 സ്‌കൂളുകളില്‍ 6,005 തസ്തികകളാണ് ആകെ സൃഷ്ടിക്കേണ്ടത്. ഇതുസംബന്ധിച്ച ശുപാര്‍ശ ധനവകുപ്പിന് കൈമാറി. 1,106 സര്‍ക്കാര്‍ സ്‌കൂളുകളില്‍ നിന്നായി 3,080 തസ്തികകളും 1,207 എയിഡഡ് സ്‌കൂളുകളില്‍ നിന്നായി 2,925 തസ്തികകളുമാണ് സൃഷ്ടിക്കേണ്ടത്. ഇതില്‍ അധ്യാപക തസ്തിക 5,906 ഉം അനധ്യാപക തസ്തിക 99 ഉം ആണ്.

ഏറ്റവും കൂടുതല്‍ തസ്തികകള്‍ സൃഷ്ടിക്കേണ്ടത് മലപ്പുറം ജില്ലയിലാണ്. മലപ്പുറത്ത് സര്‍ക്കാര്‍ മേഖലയില്‍ 694 ഉം എയ്ഡഡ് മേഖലയില്‍ 889 ഉം തസ്തികകള്‍ വേണം. ഏറ്റവും കുറവ് പത്തംതിട്ട ജില്ലയിലാണ് 62 തസ്തികകള്‍.