ശ്വാസകോശ രോഗാണു ബാധ അടക്കമുള്ള ബാക്റ്റീരിയല്‍ ഇന്‍ഫെക്ഷനുള്ള മരുന്നെന്ന പേരില്‍ മായം കലര്‍ന്നതും ഗുണ നിലവാരമില്ലാത്തതുമായ വ്യാജ മരുന്ന് വില്‍പന നടത്തിയ കേസില്‍ ബജാജ് ഫാര്‍മസ്യൂട്ടിക്കല്‍സ് എം ഡിയടക്കം 3 പേരെ ഹാജരാക്കാന്‍ കോടതിയുത്തരവ്. തിരുവനന്തപുരം രണ്ടാം ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേട്ട് എ.അനീസയുടേതാണുത്തരവ്.



ഏപ്രില്‍ 3 ന് പ്രതികളെ ഹാജരാക്കാനാണ് ഉത്തരവിട്ടത്. എംഡി യോടൊപ്പം മാനുഫാക്ചറിംഗ് കെമിസ്റ്റിനെയും അനലിറ്റിക്കല്‍ കെമിസ്റ്റിനെയും ഹാജരാക്കാന്‍ കോടതി ഉത്തരവിട്ടു. തിരുവനന്തപുരം ഡ്രഗ്‌സ് കണ്‍ട്രോളര്‍ ഓഫീസിലെ സ്‌പെഷ്യല്‍ ഇന്റലിജന്റ്‌സ് ബ്രാഞ്ച് ഡ്രഗ് ഇന്‍സ്പക്ടറാണ് പ്രതികളെ ഹാജരാക്കേണ്ടത്. ഉത്തരാഖണ്ഡ് ഹരിദ്വാര്‍ ജില്ലയില്‍ റൂര്‍ക്കി ഭഗ്വന്‍പൂര്‍ സിസോണ ആസ്ഥാനമായി രജിസ്റ്റേഡ് ഓഫീസ് പ്രവര്‍ത്തിക്കുന്ന ബജാജ് ഫാര്‍മസ്യൂട്ടിക്കല്‍സ് കമ്പനിയെ പ്രതിനിധീകരിച്ച് ഉടമ അമിത് ബജാജ് , കമ്പനി എംഡിയും ഉത്തര്‍പ്രദേശ് ഗാസിയബാദ് , മോദി നഗര്‍ ബജാജ് പെട്രോള്‍ പമ്പിന് സമീപം ബജാജ് ഹൗസില്‍ താമസിക്കുന്നയാളുമായ അനില്‍ ബജാജ് മകന്‍ അമിത് ബജാജ് , മരുന്ന് മാനുഫാക്ചറിംഗ് കെമിസ്റ്റ് റൂര്‍ക്കി ന്യൂ നെഹ്‌റു നഗര്‍ നിവാസി കെ.എന്‍. ദിമ്രി മകന്‍ കൈലാശ് ചന്ദ്ര , അനലിറ്റിക്കല്‍ കെമിസ്റ്റ് റൂര്‍ക്കി ഗലി നമ്പര്‍ 7 ല്‍ സുബാഷ് നഗര്‍ നിവാസി ആര്‍. എസ്. സിംഗ് മകന്‍ ജിതേന്ദര്‍ കുമാര്‍ എന്നിവരാണ് വ്യാജമരുന്ന് വില്‍പന കേസിലെ 1 മുതല്‍ 4 വരെയുള്ള പ്രതികള്‍.


ബാക്റ്റീരിയ ബാധ മൂലമുണ്ടാകുന്ന രോഗങ്ങളെ ചികിത്സിക്കാന്‍ ഉപയോഗിക്കുന്ന ആന്റിബയോട്ടിക് ആണ് അമോക്‌സിസില്ലിന്‍. അമോക്‌സിസില്ലിന്‍ പ്രതിരോധ ബാക്റ്റീരിയയെ നശിപ്പിക്കേണ്ട സജീവ ചേരുവയായ പൊട്ടാസ്യം ക്ലാവുലനേറ്റ് ചേര്‍ക്കാതെ പകരം വ്യാജ മിശ്രിതം ചേര്‍ത്ത് വ്യാജ ലേബല്‍ പതിച്ച് വില്‍പനക്ക് വച്ച ബി - ക്ലേവ് ഡ്രൈ സിറപ്പ് പിടിച്ചെടുത്ത കേസിലാണ് പ്രതികളെ ഹാജരാക്കാന്‍ കോടതി ഉത്തരവിട്ടിരിക്കുന്നത്. വ്യാജമരുന്ന് കഴിച്ചാല്‍ രോഗം ഭേദമാകില്ലെന്ന് മാത്രമല്ല ആരോഗ്യത്തിന് ഹാനികരവുമാണെന്ന ലാബ് റിപ്പോര്‍ട്ടിന്റെ അടിസ്ഥാനത്തിലാണ് ഡ്രഗ് ഇന്‍സ്‌പെക്ടര്‍ കേസ് ഫയല്‍ ചെയ്തത്.

2012 ജൂലൈ 30 നാണ് അന്നത്തെ ഡ്രഗ് ഇന്‍സ്‌പെക്ടര്‍ സന്തോഷ്. കെ. മാത്യു വ്യാജമരുന്ന് പിടികൂടിയത്. തിരുവനന്തപുരം മണക്കാട് യൂണിസണ്‍ ടവേഴ്‌സ് കെട്ടിടത്തില്‍ പ്രവര്‍ത്തിക്കുന്ന ജനറല്‍ ട്രേഡിംഗ് കമ്പനി (ജി റ്റി സി ഫാര്‍മ) സ്ഥാപനത്തില്‍ നിന്നാണ് ബി ക്ലേവ് ഡ്രൈ സിറപ്പ് (അമോക്‌സിസില്ലിന്‍ ആന്റ് പൊട്ടാസ്യം ക്ലാവുലനേറ്റ് ഓറല്‍ സസ്‌പെന്‍ഷന്‍ ഐ പി 2.8 ഗ്രാം/30 മി.ലി) ലേബല്‍ പതിച്ച സിറപ്പ് സാമ്പിളുകള്‍ നിയമപരമായ നടപടിക്രമങ്ങള്‍ പാലിച്ച് ശേഖരിച്ചത്. തിരുവനന്തപുരം ഡ്രഗ് ടെസ്റ്റിംഗ് ലബോറട്ടറിയില്‍ ഗവ. അനലിസ്റ്റ് നടത്തിയ പരിശോധനയില്‍ മരുന്ന് ഗുണ നിലവാരമില്ലാത്തതാണെന്നും ഐഡറ്റിഫിക്കേഷനിലും പൊട്ടാസ്യം ക്ലാവുലനലേറ്റിന്റെ സാന്നിദ്ധ്യ പരിശോധനയിലും നെഗറ്റീവ് റിസള്‍ട്ടും പി എച്ച് ടെസ്റ്റിലും ഉല്‍പന്നം പരാജയപ്പെട്ടതായി പരിശോധന ഫലം ലഭിക്കുകയായിരുന്നു.


ബാക്റ്റീരിയ അണുബാധ , ചുമ , കഫം , മദ്ധ്യ കര്‍ണ്ണത്തില്‍ ബാധിക്കുന്ന അണുബാധ , തൊണ്ടയിലെ സ്‌ട്രെപ്‌റ്റോക്കോക്കസ് , ത്വക്കിലെ അണുബാധ , മൂത്രനാളിയിലെ അണുബാധ , ന്യുമോണിയ , ശ്വാസകോശ അണു ബാധ , ദന്ത അണുബാധ , മൃഗങ്ങളുടെയും മനുഷ്യരുടെയും കടിയേല്‍ക്കലില്‍ നിന്നുള്ള അണുബാധ എന്നിവക്കുള്ള ചികിത്സക്കായാണ് ഈ മരുന്ന് പ്രധാനമായും ഉപയോഗിക്കുന്നത്.


പൊട്ടാസ്യം ക്ലാവുലനേറ്റ് ചേര്‍ക്കാതെ പകരം വ്യാജ മിശ്രിതം ചേര്‍ത്ത മരുന്നായതിനാല്‍ മരുന്നിന് ഫലം ലഭിക്കില്ലെന്ന് മാത്രമല്ല കടുത്ത അണുബാധയുള്ളവര്‍ ഈ മരുന്ന് ഉപയോഗിച്ചാല്‍ രോഗശാന്തി ലഭിക്കാതെ ആരോഗ്യ സ്ഥിതി വഷളായി രോഗം ഭേദമാകാതെ അണുബാധ മൂര്‍ശ്ചിച്ച് ജീവന്‍ വരെ അപകടത്തിലാകുമെന്നും ഡ്രഗ് ഇന്‍സ്‌പെക്ടര്‍ കോടതിയില്‍ സമര്‍പ്പിച്ച പരാതിയില്‍ ചൂണ്ടിക്കാട്ടുന്നു.

1940 ല്‍ നിലവില്‍ വന്ന ഡ്രഗ്‌സ് ആന്റ് കോസ്‌മെറ്റിക്‌സ് നിയമത്തിലെ വകുപ്പ് 18 എ ( 1) ( ഗുണ നിലവാരമില്ലാത്തതും തെറ്റിദ്ധരിപ്പിക്കുന്ന വ്യാപാര മുദ്ര പതിച്ചതും മായം കലര്‍ന്നതും വ്യാജവും ആയ മരുന്ന് വില്‍പനക്ക് വേണ്ടി നിര്‍മിക്കല്‍ , വിതരണം ചെയ്യല്‍ , സംഭരിക്കല്‍ , വില്‍പ്പനക്ക് പ്രദര്‍ശിപ്പിക്കല്‍ ) പ്രകാരമാണ് പ്രതികള്‍ക്കെതിരെ കോടതി കേസെടുത്തത്.


കുറ്റ സ്ഥാപനത്തില്‍ 7 വര്‍ഷത്തിതില്‍ കുറയാത്തതും ജീവപര്യന്തം വരെയാകാവുന്ന തടവുശിക്ഷയും 3 ലക്ഷത്തില്‍ കുറയാത്ത പിഴ അല്ലെങ്കില്‍ കണ്ടെടുത്ത മരുന്നിന്റെ വിലയുടെ മൂന്നിരട്ടി തുക പിഴയും ശിക്ഷ വിധിക്കാവുന്നതാണ്. സെഷന്‍സ് കോടതി വിചാരണ ചെയ്യേണ്ട കുറ്റകൃത്യമായതിനാല്‍ പ്രതികള്‍ ഹാജരായ ശേഷം കേസ് റിക്കോര്‍ഡുകള്‍ വിചാരണക്കായി സെഷന്‍സ് കോടതിക്ക് കമ്മിറ്റ് ചെയ്തയക്കുന്നതാണ്.


2013 ല്‍ ലഭിച്ച ലാബ് റിപ്പോര്‍ട്ട് പ്രകാരം അന്നത്തെ ഡ്രഗ് ഇന്‍സ്‌പെക്ടര്‍ ജെ. സുധീര്‍ ബാനുവാണ് പ്രതികളുടെ പേരും വിലാസവും തിരിച്ചറിഞ്ഞ അഡ്രസ് ഐഡന്റിഫിക്കേഷന്‍ റിപ്പോര്‍ട്ട് കോടതിയില്‍ സമര്‍പ്പിച്ചത്. ഡ്രഗ്‌സ് ഇന്‍സ്‌പെക്ടര്‍ എം. ജി. മണി വീണയാണ് 2016 ഒക്ടോബര്‍ 5 ന് കോടതിയില്‍ സ്വകാര്യ അന്യായം ഫയല്‍ ചെയ്തത്.