വിവാഹാഭ്യര്‍ത്ഥന നിരസിച്ചതിന്റെ പേരില്‍ മറ്റൊരു കൊലപാതകം കൂടി. ബെംഗളൂരുവിലാണ് സംഭവം. അധ്യാപികയെ കുത്തിക്കൊലപ്പെടുത്തിയത് കുടുംബസുഹൃത്താണെന്ന് പൊലീസ്. ശാന്തിനഗറിലെ നഞ്ചപ്പ സര്‍ക്കിളിലെ വീട്ടില്‍ അധ്യാപിക കൗസര്‍ മുബീനെ കൊലപ്പെടുത്തിയ കേസില്‍ കുടുംബസുഹൃത്തിനെ പൊലീസ് അറസ്റ്റ് ചെയ്തു.

മാണ്ഡ്യ സ്വദേശിയായ നദീം പാഷ (35) ആണ് പൊലീസ് പിടികൂടിയത്. കൗസര്‍ മുബീന്റെ കുടുംബവുമായി വളരെ അടുത്ത ബന്ധം പുലര്‍ത്തിയിരുന്ന ആളാണ് നദീം പാഷയെന്ന് പാലീസ് പറഞ്ഞു. അധ്യാപികയായിരുന്ന കൗസര്‍ മുബീനോട് നദീം വിവാഹഭ്യര്‍ത്ഥന നടത്തിയിരുന്നു. എന്നാല്‍ ഇത് കൌസര്‍ നിരസിച്ചു. കൂടാതെ കൗസര്‍ മുബീയും നദീം പാഷയും തമ്മില്‍ സാമ്പത്തിക ഇടപാടുകളും ഉണ്ടായിരുന്നു.

കടം കൊടുത്ത പണം മുമീന തിരികെ ചോദിച്ചതും നദീമിനെ പ്രകോപിപ്പിച്ചു. തുടര്‍ന്നാണ് ഇയാള്‍ ആളില്ലാത്ത തക്കം നോക്കി അധ്യാപികയെ വീട്ടില്‍ കയറി കുത്തിക്കൊലപ്പെടുത്തിയതെന്ന് ശആന്തിനഗര്‍ പൊലീസ് പറയുന്നു. കഴിഞ്ഞ തിങ്കളാഴ്ച വൈകിട്ടോടെയാണ് കൗസര്‍ മുബീനെ വീട്ടില്‍ കുത്തേറ്റ് ചേരയില്‍ കുളിച്ച് മരിച്ചനിലയില്‍ കണ്ടെത്തിയത്. വിവാഹമോചിതയായ ഇവര്‍ വീട്ടില്‍ മകള്‍ക്കൊപ്പമായിരുന്നു താമസം. സംഭവം നടക്കുമ്പോള്‍ മകള്‍ സ്‌കൂളിലായിരുന്നു.

അതിക്രമിച്ചുകയറിയതിന്റെ ലക്ഷണങ്ങളൊന്നും വീട്ടില്‍ ഉണ്ടായിരുന്നുമില്ല. ഇതോടെ ഇവരുമായി അടുത്ത ബന്ധമുള്ളയാളാണ് കൊലയാളിയെന്നും ആരുമില്ലെന്ന് മനസിലാക്കിയാണ് പ്രതി വീട്ടിലെത്തിയതെന്നും പൊലീസ് സംശയിച്ചിരുന്നു. തുടര്‍ന്ന് വീട്ടില്‍ സ്ഥിരമായി വന്നിരുന്നവരെ കേന്ദ്രീകരിച്ച് പൊലീസ് അന്വേഷണം നടത്തി. ഇതോടെയാണ് സംശയം നദീം പാഷയിലേക്കെത്തിയത്. നദീം കൗസര്‍ മുബീനെ വിവാഹംകഴിക്കാന്‍ താത്പര്യം പ്രകടിപ്പിച്ചിരുന്നുവെന്ന് ബന്ധുക്കളും സുഹൃത്തുക്കളും നല്‍കിയ മൊഴിയാണ് പൊലീസിന് തുമ്പായത്.

കൗസര്‍ മുബീനും ഇവരുടെ മാതാപിതാക്കള്‍ക്കും നദീമുമായുള്ള ബന്ധത്തില്‍ താത്പര്യമുണ്ടായിരുന്നില്ല. ഒരുലക്ഷത്തോളം രൂപ നദീം കൗസര്‍ മുബീനില്‍നിന്ന് കടംവാങ്ങിയിരുന്നു. ഈ പണം കൗസര്‍ മുബീന്‍ അടുത്തിടെ തിരിച്ച് ചോദിച്ചു. വിവാഹ അഭ്യര്‍ത്ഥന നിരസിച്ചതും പണം തിരികെ ചോദിച്ചതും നദീമിനെ പ്രകോപിതനാക്കി. തിങ്കളാഴ്ച കൗസറിന്റ വീട്ടിലെത്തിയ നദീം ഇതിനെ ചൊല്ലി വഴക്കുണ്ടാക്കി. തര്‍ക്കത്തിനിടെ നദീം പാഷ കത്തിയുപയോഗിച്ച് കൗസര്‍ മുബീനെ കുത്തി വീഴ്ത്തുകയായിരുന്നുവെന്ന് പൊലീസ് പറഞ്ഞു.

വിവാഹഭ്യര്‍ത്ഥന നിരസിച്ചതിന്റെ പേരില്‍ നിരവധി സമാന സംഭവങ്ങളാണ് ഉണ്ടായിട്ടുള്ളത്. ലഖ്നൗവില്‍ 19 കാരിയായ നിധി ഗുപ്തയെ നാല് നില കെട്ടിടത്തിന് മുകളില്‍ നിന്ന് തള്ളിയിട്ട് കൊലപ്പെടുത്തിയ പ്രതി സൂഫിയാനെ യു പി പോലീസ് ഏറ്റുമുട്ടലില്‍ കീഴടക്കിയത് വലിയ വാര്‍ത്തയായിരുന്നു. ഇക്കഴിഞ്ഞ നവംബറിലെ ഒരു രാത്രിയാണ് സൂഫിയാന്‍ പെണ്‍കുട്ടിയെ നാലാം നിലയില്‍ നിന്ന് തള്ളിയിട്ട് കൊലപ്പെടുത്തിയത്.

ഏറ്റുമുട്ടലിലാണ് സുഫിയാനെ അറസ്റ്റ് ചെയ്തത്. വലതു കാലിന് വെടിയേറ്റ സുഫിയാനെ കിംഗ് ജോര്‍ജ്ജ് മെഡിക്കല്‍ ആശുപത്രിയില്‍ (കെജിഎംയു) പ്രവേശിപ്പിച്ചു.

കുറേ നാളുകളായി പെണ്‍കുട്ടിയുടെ വീഡിയോ കയ്യിലുണ്ടെന്ന് അവകാശപ്പെട്ട് ഇയാള്‍ വിവാഹം അഭ്യര്‍ത്ഥന നടത്തി പെണ്‍കുട്ടിയെ ഭീഷണിപ്പെടുത്തുന്നുണ്ടായിരുന്നുവെന്ന് അയല്‍വാസികള്‍ പോലീസിന് മൊഴി നല്‍കിയിട്ടുണ്ട്. സൂഫിയാന്‍ ഇസ്ലാം മതം സ്വീകരിക്കാന്‍ യുവതിയെ നിര്‍ബന്ധിക്കുകയായിരുന്നെന്ന് യുവതിയുടെ കുടുംബാംഗങ്ങള്‍ ആരോപിച്ചു.
ഇരു കുടുംബങ്ങളും സംസാരിച്ചുകൊണ്ടിരിക്കെ, പ്രതി പെണ്‍കുട്ടിയെ കെട്ടിടത്തിന്റെ നാലാം നിലയിലേക്ക് കൊണ്ടുപോയി അവിടെ നിന്ന് താഴേക്ക് തള്ളുകയായിരുന്നുവെന്നാണ് പോലീസ് പറയുന്നത്.

ശബ്ദം കേട്ട് പുറത്തേക്ക് ഓടിയെത്തിയ വീട്ടുകാര്‍ കെട്ടിടത്തിന് താഴെ യുവതി രക്തത്തില്‍ കുളിച്ചുകിടക്കുന്നതായാണ് കണ്ടത്. പ്രതികള്‍ ഓടി രക്ഷപ്പെടുകയും ചെയ്തു. അയല്‍വാസികളുടെ സഹായത്തോടെ യുവതിയെ ആശുപത്രിയില്‍ പ്രവേശിപ്പിച്ചു. ഗുരുതരമായി പരിക്കേറ്റ യുവതി ആശുപത്രിയില്‍ പ്രവേശിപ്പിച്ചതിന് തൊട്ടുപിന്നാലെ മരണത്തിന് കീഴടങ്ങുകയായിരുന്നു.