മാർച്ച് അഞ്ചിന് കാലിക്കറ്റ് സെനറ്റ്, സിൻഡിക്കേറ്റുകളുടെ കാലാവധി കഴിയുകയാണ്. അതിന് പകരമായി താത്കാലിക സിൻഡിക്കേറ്റ് രൂപീകരിക്കേണ്ടതായിട്ടുണ്ട്. അതിനായി ലെജിസ്ലേറ്റീവ് അസ്സംബ്ലിയിൽ ബില്ല് അവതരിപ്പിക്കുവാനുള്ള അനുവാദം തേടിയിരിക്കുകയാണ് സർക്കാർ. ഗവർണറോടാണ് അനുവാദം തേടിയിരിക്കുന്നത്. 23ആം തീയതി  മടങ്ങിയെത്തും. ഈ കാര്യത്തിൽ അദ്ദേഹം തിരിച്ചെത്തുമ്പോൾ തീരുമാനമെടുക്കുവാൻ ഒരുങ്ങുകയാണ്.

ഈയൊരു ബില്ലിനെ കുറിച്ച് രാജ്ഭവന്റെ വിലയിരുത്തൽ മറ്റൊന്നാണ് അതായത്, വി.സി നിയമനത്തിൽ ചാൻസലറുടെ അധികാരം കവരുന്ന ബില്ലിന് സമാനമാണിത്. അങ്ങനെയാണ് രാജ്ഭവൻ ഇതിനെ വിലയിരുത്തുന്നത്. കാലിക്കറ്റ് സർവകലാശാല നിയമത്തിന്റെ അടിസ്ഥാനത്തിൽ നോക്കുകയാണെങ്കിൽ സിൻഡിക്കേറ്റ് പിരിച്ചു വിടുകയോ കാലാവധി കഴിയുകയോ ചെയ്താൽ ചാൻസലർക്ക് താൽക്കാലിക സിൻഡിക്കേറ്റിനെ നിയമിക്കാൻ സാധിക്കുന്നതാണ്. പുതിയ ബിൽ ആകട്ടെ ഗവർണറുടെ ഈ അധികാരത്തെ അപഹരിക്കുന്നതാണ്.

പ്രതിപക്ഷത്തെ പൂർണമായി ഒഴിവാക്കി കൊണ്ടുള്ള ഒരു നീക്കമാണ് ഇതിലൂടെ സർക്കാർ ലക്ഷ്യമിടുന്നതും സർക്കാരിന് സ്വന്തം നിലയിൽ സിൻഡിക്കേറ്റ് രൂപീകരിക്കാനാണ് ഈ ബില്ലുമായി വന്നിരിക്കുന്നതെന്നുമുള്ള വിമർശനം ശക്തമാകുകയാണ്. കാലാവധി അവസാനിക്കുന്നതിന് അഞ്ചു മാസം മുന്നേ തിരഞ്ഞെടുപ്പിനുള്ള നടപടികൾക്ക് തുടക്കമിടണം. ആ കാലാവധി കഴിയുന്നതിനനുസരിച്ച് മാത്രമായിരുന്നു പുതിയ സമിതികൾ നിലവിൽ വരുന്നത്. മാത്രമല്ല ശ്രദ്ധേയമായ മറ്റൊരു കാര്യം സെനറ്റ്, സിൻഡിക്കേറ്റ് സമിതികൾ പുന സംഘടിപ്പിക്കുന്നതിന് അധികാരപ്പെട്ട വിസി സിപിഎമ്മിന്റെ സമ്മർദ്ദത്തിനു വഴങ്ങി തിരഞ്ഞെടുപ്പ് വിജ്ഞാപനം പുറപ്പെടുവിക്കാൻ തയ്യാറായിട്ടില്ല .

കാലാവധി കഴിയുമ്പോൾ പുതിയ സമിതികൾക്ക് ചുമതലയേൽക്കാൻ പറ്റാത്ത സാഹചര്യം ഉണ്ടാകും. കാലിക്കറ്റിൽ 2018ൽ കാലാവധി കഴിഞ്ഞ സിൻഡിക്കേറ്റിന് പകരം ഓർഡിനൻസിലൂടെ ഒരു വർഷത്തേക്ക് താത്കാലിക സമിതിയെ സർക്കാർ നാമനിർദ്ദേശം ചെയ്യുകയുണ്ടായി. മന്ത്രി ആർ. ബിന്ദു ഉൾപ്പെടെയുള്ള ആൾക്കാർ അംഗങ്ങളായി അതിൽ ഉണ്ടായിരുന്നു. ലെജിസ്‌ലേറ്റീവ് അസ്സംബ്ലിയിൽ ചേരുന്നതിനാൽ ഓർഡിനൻസിന് പകരം ഇപ്പോൾ ബില്ല് കൊണ്ടുവന്നിരിക്കുകയാണ് എന്നതാണ് ശ്രദ്ധേയമായ മറ്റൊരു കാര്യം.