നീണ്ട ഇടവേളയ്ക്ക് ശേഷം നടി ഭാവന മലയാളത്തില്‍ അഭിനയിച്ച ന്റിക്കാക്കാക്കൊരു പ്രേമണ്ടാര്‍ന്ന് എന്ന ചിത്രത്തെ തകര്‍ക്കാര്‍ നീക്കം തുടങ്ങി. സിനിമ റിലീസാകും മുമ്പ് ഇന്റര്‍നെറ്റില്‍ അപ് ലോഡ്‌ചെയ്‌തെങ്കിലും അണിയറപ്രവര്‍ത്തകര്‍ അത് നീക്കം ചെയ്തു. കൊച്ചി രാജാവ് എന്ന ഓമന പേരില്‍ അറിയപ്പെടുന്ന നടനും സംഘവും ആണ് ഇതിന് പിന്നിലെന്ന് സിനിമ ഇന്‍ഡസ്ട്രിയിലുള്ള ചിലര്‍ സൂചിപ്പിച്ചു.

സമൂഹ മാധ്യമങ്ങളിലൂടെ സിനിമയ്‌ക്കെതിരെ മോശം പ്രചരണം നടത്തുന്നതിന് സൈബര്‍ ക്വട്ടേഷനും കൊടുത്തിട്ടുണ്ടെന്നാണ് ഇവരില്‍ നിന്ന് ലഭ്യമായ വിവരം. ചിത്രത്തിന്റെ സാറ്റലൈറ്റ്, ഒ.ടി.ടി അവകാശങ്ങള്‍ ഇതുവരെ വിറ്റ് പോയിട്ടില്ല. സാധാരണ സിനിമ ഇറങ്ങും മുമ്പ് ഒ.ടി.ടിയും സാറ്റലൈറ്റ് അവകാശങ്ങള്‍ ബിസിനസ് ആകുന്നതാണ്.

എന്നാല്‍ തിയേറ്ററില്‍ കളിച്ച ശേഷമേ ചെറിയ സിനിമകള്‍ ഒ.ടി.ടിയിലേക്ക് എടുക്കാറുള്ളൂ. പക്ഷെ, സാറ്റലൈറ്റിന്റെ കാര്യം അങ്ങനെയല്ല. ന്റിക്കാക്കാക്കൊരു പ്രേമണ്ടാര്‍ന്നിലെ നായകന്‍ ഷറഫുദ്ദീനാണ്. ഷറഫിന്റെ പ്രിയന്‍ ഓട്ടത്തിലാണ്, അദൃശ്യം, 1744 വൈറ്റ് ഓള്‍ട്ടോ എന്നീ സിനിമകളുടെ അവകാശങ്ങലെല്ലാം വിറ്റ് പോയതാണ്.

അപ്പോള്‍ ഈ സിനിമ മാത്രം ചാനലുകാര്‍ വാങ്ങാത്തതിന് പിന്നില്‍ കൊച്ചി- ആലുവ കേന്ദ്രീകരിച്ചുള്ള ഒരു സംഘത്തിന്റെ സമ്മര്‍ദ്ദമാണെന്നാണ് ആക്ഷേപം. മുമ്പ് മലയാളസിനിമ നിയന്ത്രിച്ചുകൊണ്ടിരുന്ന ഈ സംഘം പുതിയ തലമുറ മികച്ച സിനിമകളുമായി വന്നതോടെ പിന്നാക്കം പോയിരിക്കുകയാണ്. നടിയെ ആക്രമിച്ച കേസിലെ പ്രതികളില്‍ ചിലരുമായി ഇവര്‍ക്ക് അടുത്തബന്ധമുണ്ടെന്നും ആരോപണം ഉണ്ടായിരുന്നു.

ഭാവന വീണ്ടും മലയാളസിനിമയില്‍ ശക്തമായ സാനിധ്യമായാല്‍ മലയാളത്തിലെ ഒരു പ്രമുഖ നടനെ അത് ബാധിക്കും. ആറ് വര്‍ഷത്തോളമായി ഈ നടന്റെ കരിയര്‍ അത്ര മെച്ചമല്ല. അശ്ലീല ചുവയുള്ള കോമഡിയും ദ്വയാര്‍ത്ഥപ്രയോഗവും ആയിരുന്നു ഈ നടന്റെ സിനിമകളുടെ മുഖമുദ്ര. ഇയാളുടെ ചിത്രങ്ങള്‍ക്ക് തിരക്കഥ എഴുതിയിരുന്ന ഇരട്ടതിരക്കഥാകൃത്തുക്കള്‍ അടിച്ചുപിരിയുകയും സിനിമ കൂടുതല്‍ റിയലിസ്റ്റിക് ആവുകയും ചെയ്തതോടെ കക്ഷി വലിയ പ്രശ്‌നത്തിലാണ്.

ഈ നടന്റെ റിയലിസ്റ്റിക് സിനിമകളൊന്നും തിയേറ്ററില്‍ തറ തൊട്ടിട്ടില്ല. അതുകൊണ്ട് പുള്ളിക്ക് മാസ് സിനിമ മതിയെന്നാണ് പറയുന്നത്. രണ്ട് കൊല്ലം മുമ്പ് കോടികള്‍ മുടക്കി ഇയാളെ നായകനാക്കി എടുത്ത ചിത്രം വലിയ നഷ്ടമാണ് വരുത്തിവച്ചത്. അതിന് പിന്നാലെ തമിഴിലെ ഒരു നടനെയും ഇയാളെയും വെച്ച് മറ്റൊരു ബിഗ് ബജറ്റ് സിനിമ വന്നു. അതും പരാജയമായി. ഇതിന് പുറമേ കോടികള്‍ മുടക്കിയ മറ്റൊരു സിനിമ പാതിവഴിയില്‍ നിര്‍ത്തിവച്ചിരിക്കുകയാണ്. മുമ്പ് ഭാവന അടക്കം പല ആര്‍ടിസ്റ്റുകളെയും സിനിമകളില്‍ നിന്ന് ഒഴിവാക്കണമെന്ന് ഇയാള്‍ പലരെയും ഭീഷണിപ്പെടുത്തിയിരുന്നു. അതിന്റെയൊക്കെ തിരിച്ചടികളാണ് ഇപ്പോള്‍ കിട്ടിക്കൊണ്ടിരിക്കുന്നത്.

അതുകൊണ്ടരിശം തീരാഞ്ഞവനാ പുരയുടെ ചുറ്റും മണ്ടിനടന്നു... എന്ന് കുഞ്ചന്‍ നമ്പ്യാര്‍ പാടിയപോലെയാണ് ഈ നടന്റെ ഇപ്പോഴത്തെ അവസ്ഥ. സിനിമകള്‍ പഴയ പോലെ ചെയ്യാനാകുന്നില്ല, ഇറങ്ങുന്നതൊന്നും അങ്ങോട്ട് ക്ലച്ച് പിടിക്കുന്നുമില്ല. എന്നിട്ടും പാഠം പടിക്കാതെ പകപോക്കാന്‍ ഇറങ്ങിത്തിരിച്ചിരിക്കുകയാണ്. മുമ്പ് ഭാവനയും ഇന്ദ്രജിത്തും ജോഡികളായി അഭിനയിച്ച ഏഴാമത്തെ വരവും ഈ നടന്‍ ഇടപെട്ട് പരാജയപ്പെടുത്തിയതായി സംവിധായകന്‍ ഹരിഹരന്‍ ആരോപണം ഉന്നയിച്ചിരുന്നു.

നടന്റെ സൗഹൃദ വലയത്തിലുള്ള വിതരണക്കാരനെ കൊണ്ട് സിനിമ വാങ്ങിയിട്ട് എല്ലാ കേന്ദ്രങ്ങളിലും റീലീസ് ചെയ്തില്ലെന്നും പോസ്റ്റര്‍ അടക്കമുള്ള പബ്‌ളിസിറ്റി കൊടുത്തില്ലെന്നും ആയിരുന്നു ആക്ഷേപം. ഭാവനയെ വേട്ടയാടാന്‍ തുടങ്ങിയിട്ട് വര്‍ഷങ്ങളായെന്ന് ഇതില്‍ നിന്ന് വ്യക്തമാണ്. പൃഥ്വിരാജിനെ ചില സിനിമകളില്‍ നിന്ന് ഒഴിവാക്കാനും ഈ നടന്‍ നെറികെട്ട കളികളിച്ചു.

സംവിധായകന്‍ തുളസീദാസ് ഈ നടനെ വെച്ചൊരു ഹിറ്റ് സിനിമ എടുത്തിരുന്നു. പിന്നീട് താരമായ ശേഷം ഈ നടന്‍ തുസീദാസിനെ അടുപ്പിച്ചില്ല. അങ്ങനെയിരിക്കെ തുളസീദാസ് പൃഥ്വിരാജിനെ നായകനാക്കി അവന്‍ ചാണ്ടിയുടെ മകന്‍ സംവിധാനം ചെയ്യാന്‍ തീരുമാനിച്ചു. പൃഥ്വിയെ ഒഴിവാക്കണമെന്നും ഞാന്‍ ഡേറ്റ് തരാമെന്നും ഈ നടന്‍ തുളസീദാസിനെ വിളിച്ച് പറഞ്ഞു. പക്ഷെ, അദ്ദേഹം വഴങ്ങിയില്ല.

ഈ നടന്റെ തുടക്കകാലത്ത് സംവിധായകന്‍ രാജസേനന്‍ സഹായിച്ചിരുന്നു. പിന്നീട് നായകനാക്കി ഒരു പടമെടുത്തിരുന്നു. അത് ഹിറ്റായി. വീണ്ടും താരത്തെ വെച്ച് സിനിമ എടുത്തു. നടന്റെ സുഹൃത്തുക്കളായിരുന്നു തിരക്കഥ എഴുതിയതും നിര്‍മിച്ചതും. ചിത്രം പരാജയമായി. അതിന് ശേഷം വേറൊരു നിര്‍മാതാവിനെ കൊണ്ട് രാജസേനന്‍ ഈ നടന് അഡ്വാന്‍സ് കൊടുത്തു. മാസങ്ങള്‍ക്ക് ശേഷം ആ നിര്‍മാതാവിനോട് രാജസേനനെ മാറ്റിയാലേ ഞാന്‍ അഭിനയിക്കൂ എന്ന് നടന്‍ വാശിപിടിച്ചു.

എല്ലാം കൈപ്പിടിയിലൊതുക്കാനും വെട്ടിപ്പിടിക്കാനും വാശിതീര്‍ക്കാനും ഓടിനടക്കുന്ന ഇയാളൊക്കെ ഒരു കലാകാരനാണോ. കലാകാരന്റെ മുഖമൂടിയണിഞ്ഞ ക്രിമിനലാണെന്ന് ആരെങ്കിലും സംശയിച്ചാല്‍ അവരെ കുറ്റംപറയാനൊക്കില്ല. എന്തായാലും ഇയാള്‍ക്കെതിരെയുള്ള ഒരു സുപ്രധാന കേസിന്റെ വിചാരണ താമസിയാതെ തീരും. അതോടെയെങ്കിലും അഹങ്കാരവും പകപോക്കലും ശമിക്കുമെന്ന് നമുക്ക് പ്രതീക്ഷിക്കാം.