ലൈഫ് മിഷന്‍ ഫ്‌ളാറ്റ് കോഴക്കേസില്‍ മുഖ്യമന്ത്രിയുടെ അഡിഷണല്‍ പ്രൈവറ്റ് സെക്രട്ടറി സി.എം.രവീന്ദ്രനെ എന്‍ഫോഴ്‌സ്മെന്റ് ഡയറക്ടറേറ്റ് (ഇ.ഡി) ഇന്ന് ചോദ്യം ചെയ്യും. രാവിലെ 10ന് കൊച്ചിയിലെ ഓഫീസില്‍ ഹാജരാകാന്‍ ഇ.ഡി നോട്ടീസ് നല്‍കിയിട്ടുണ്ട്.

അതേസമയം ഇന്ന് ഹാജരായില്ലെങ്കില്‍ വീണ്ടും നോട്ടീസ് നല്‍കും. മൂന്നു തവണ നോട്ടീസ് നല്‍കിയിട്ടും ഹാജരായില്ലെങ്കില്‍ അറസ്റ്റ് ചെയ്യാന്‍ ഇ.ഡിക്ക് അധികാരമുണ്ട്.

കോഴ നല്‍കിയെന്ന് വെളിപ്പെടുത്തിയ സ്വപ്ന സുരേഷുമായി ബന്ധമില്ലെന്ന നിലപാടിലാണ് സി.എം. രവീന്ദ്രന്‍ . രവീന്ദ്രനും സ്വപ്നയും തമ്മില്‍ വാട്ട്‌സ്ആപ്പ് വഴി നടത്തിയ സംഭാഷണങ്ങള്‍ ഇ.ഡി ശേഖരിച്ചു കഴിഞ്ഞു.

ഇക്കാര്യങ്ങളും രവീന്ദ്രനെതിരെ സ്വപ്ന ഉന്നയിച്ച ആരോപണങ്ങളുമൊക്കെ ചോദിച്ചറിയും. കോഴയില്‍ മുഖ്യമന്ത്രിയുടെ ഓഫീസിന് ബന്ധമുണ്ടോയെന്നും പരിശോധിക്കും.

കോഴത്തുക ആര്‍ക്കൊക്കെ ലഭിച്ചെന്നും കള്ളപ്പണ ഇടപാട് നടന്നിട്ടുണ്ടോയെന്നുമാണ് ഇ.ഡിയുടെ അന്വേഷണത്തിലുള്ളത്. സ്വപ്ന സുരേഷ്, യൂണിടെക് ഉടമ സന്തോഷ് ഈപ്പന്‍ എന്നിവരുമായുള്ള ബന്ധം, ഇടപാടുകള്‍ തുടങ്ങിയ വിവരങ്ങള്‍ അറിയാനാണ് രവീന്ദ്രനെ ഇ.ഡി ചോദ്യം ചെയ്യുക.
അ്‌തേസമയം വടക്കാഞ്ചേരിയില്‍ ലൈഫ് മിഷന്‍ ഫ്‌ളാറ്റ് നിര്‍മിക്കാനായി യു.എ.ഇ റെഡ് ക്രെസന്റ് കരാറുകാരായ യൂണിടെക്കിന് നല്‍കിയ 19 കോടി രൂപയില്‍ 4.50 കോടി കോഴയായി നല്‍കിയെന്നാണ് കേസിലുള്ളത്.