കുപ്രസിദ്ധ ബുള്ളറ്റ് മോഷ്ടാവ് സെബിന്‍ സ്റ്റാലിന്‍ പ്രതിയായ ബുള്ളറ്റ് മോഷണക്കേസില്‍ 5 സാക്ഷികള്‍ക്ക് അറസ്റ്റ് വാറണ്ട്. തിരുവനന്തപുരം മൂന്നാം ജുഡിഷ്യല്‍ ഫസ്റ്റ് ക്ലാസ്സ് മജിസ്ട്രേട്ട് കോടതിയുടേതാണുത്തരവ്. 2018 ല്‍ സിറ്റിയില്‍ നടന്ന ബുള്ളറ്റ് മോഷണക്കേസില്‍ സാക്ഷിമൊഴി നല്‍കാന്‍ എത്താത്തതിനാലാണ് വാറണ്ട് പുറപ്പെടുവിച്ചത്.

കുപ്രസിദ്ധ ബുള്ളറ്റ് മോഷ്ടാവ് സെബിന്‍ സ്റ്റാലിന് മ്യൂസിയം ബുള്ളറ്റ് ബൈക്ക് മോഷണക്കേസില്‍ തിരുവനന്തപുരം ജുഡിഷ്യല്‍ ഫസ്റ്റ് ക്ലാസ്സ് മജിസ്ട്രേട്ട് കോടതി നേരത്തേ തടവും പിഴയും ശിക്ഷ വിധിച്ചിരുന്നു. കാട്ടാക്കട മാറനല്ലൂര്‍ തൂങ്ങാംപാറ സോണി പൗള്‍ട്രി ഫാം റോസ് വില്ലയില്‍ നിന്നും ഇപ്പോള്‍ പുളിയറക്കോണത്ത് താമസം സ്റ്റാലിന്‍ മകന്‍ സെബിന്‍ സ്റ്റാലിനെ (27) യാണ് കോടതി ശിക്ഷിച്ചത്.


6 മാസം കഠിന തടവും അയ്യായിരം രൂപ പിഴയും ഒടുക്കണം. പിഴയൊടുക്കാത്ത പക്ഷം ഒരു മാസത്തെ അധിക തടവനുഭവിക്കാനും കോടതി ഉത്തരവിട്ടു. കഴിഞ്ഞ ദിവസം വഴുതക്കാട് ബുള്ളറ്റ് മോഷണ കേസില്‍ സെബിന്‍ കുറ്റക്കാരനെന്ന് കണ്ട് ഒരു വര്‍ഷം കഠിന തടവു ശിക്ഷ അനുഭവിക്കാനും അയ്യായിരം രൂപ പിഴ ഒടുക്കാനും ഇതേ കോടതി ശിക്ഷ വിധിച്ചിരുന്നു.


സിറ്റി മെഡിക്കല്‍ കോളേജ് പോലിസ് സ്റ്റേഷന്‍ ലോക്കല്‍ ലിമിറ്റിനുള്ളില്‍ നിന്നും മോഷ്ടിച്ച എന്‍ഫീല്‍ഡ് ബുള്ളറ്റുമായി സഞ്ചരിക്കവേ തമ്പാനൂര്‍ പോലീസിന്റെ വാഹന പരിശോധനയില്‍ സെബിന്‍ 2019 ജൂലൈ 6 ന് പിടിയിലായിരുന്നു. തമ്പാനൂര്‍ സ്റ്റേഷനില്‍ ഫിംഗര്‍ പ്രിന്റെടുക്കവേ ജി ഡി ചാര്‍ജിനെ പിടിച്ചു തള്ളി മതില്‍ ചാടി രക്ഷപ്പെട്ട പ്രതിയെ വഴുതക്കാട് ആല്‍ത്തറ ജംഗ്ഷനില്‍ പാര്‍ക്ക് ചെയ്തിരുന്ന ബുള്ളറ്റ് മോട്ടോര്‍ സൈക്കിള്‍ മോഷ്ടിച്ച കേസിലാണ് കോടതി കഴിഞ്ഞ ദിവസം ശിക്ഷ വിധിച്ചത്.


2019 ജൂണിലാണ് മ്യൂസിയം എന്‍ഫീല്‍ഡ് ബുള്ളറ്റ് ബൈക്ക് മോഷണം നടന്നത്. 2019 ആഗസ്റ്റ് 14നാണ് മ്യൂസിയം പോലീസ് കുറ്റപത്രം സമര്‍പ്പിച്ചത്.


ഇന്ത്യന്‍ ശിക്ഷാ നിയമത്തിലെ 379 ( മോഷണം) എന്ന വകുപ്പു പ്രകാരമുള്ള കുറ്റം പ്രതി ചെയ്തുവെന്ന് കണ്ടെത്തിയാണ് കോടതി ശിക്ഷ വിധിച്ചത്. ഗൗരവമേറിയ കുറ്റം ചെയ്ത 18 വയസ്സിന് മുകളില്‍ പ്രായമുള്ള പ്രതിക്ക് പ്രൊബേഷന്‍ ഓഫന്റേഴ്‌സ് (നല്ലനടപ്പിന് ശിക്ഷിക്കല്‍) നിയമത്തിന്റെ ഔദാര്യത്തിന് അര്‍ഹതയില്ലെന്നും വിധിന്യായത്തില്‍ കോടതി വ്യക്തമാക്കി.


മെഡിക്കല്‍ കോളേജ് സ്റ്റേഷന്‍ പരിധിയില്‍ നിന്നും യമഹ ബൈക്ക് മോഷ്ടിച്ച കേസിന്റെ വിചാരണ തിരുവനന്തപുരം അഡീ.ചീഫ് ജുഡീഷ്യല്‍ മജിസ്‌ട്രേട്ട് കോടതിയില്‍ നടന്നുവരികയാണ്.