ഇത്രയും പ്രതീക്ഷിച്ചില്ല... ഗവര്ണര് ആരിഫ് മുഹമ്മദ് ഖാന് അനുമതി നല്കാത്തതിനാല് കാലിക്കറ്റ് സര്വകലാശാല സെനറ്റ് ബില് തിങ്കളാഴ്ച നിയമസഭയില് അവതരിപ്പിക്കുന്നത് മാറ്റി; സംഭവം ചരിത്രത്തിലാദ്യം; സര്വകലാശാലാ ഭരണം നിയന്ത്രണത്തിലാക്കാനാണ് ഈ നീക്കമെന്ന് സര്ക്കാരിനെതിരെ പ്രതിപക്ഷം
അങ്ങനെ ഗവര്ണറും സര്ക്കാരും തമ്മിലുള്ള പോരിന് മറ്റൊരു തലം കൂടി. ഒപ്പിടാതെ മറ്റിവച്ചിരിക്കുന്ന ബില്ലിന്റെ കൂട്ടത്തില് മറ്റൊന്നു കൂടി മാറി. ഗവര്ണര് ആരിഫ് മുഹമ്മദ് ഖാന് അനുമതി നല്കാത്തതിനാല് കാലിക്കറ്റ് സര്വകലാശാല സെനറ്റിലും സിന്ഡിക്കേറ്റിലും താത്കാലിക ക്രമീകരണത്തിനുള്ള ബില് തിങ്കളാഴ്ച നിയമസഭയില് അവതരിപ്പിക്കുന്നത് മാറ്റി.
കേരളനിയമസഭയുടെ ചരിത്രത്തിലാദ്യമായാണ് ഗവര്ണര് അനുമതി നല്കാത്തതിനാല് ബില് മാറ്റിവെക്കുന്നത്. കാലിക്കറ്റ് സര്വകലാശാല സെനറ്റിന്റെയും സിന്ഡിക്കേറ്റിന്റെയും കാലാവധി മാര്ച്ച് ആറിന് കഴിയുന്നതിനാല് താത്കാലിക ക്രമീകരണം എര്പ്പെടുത്താനാണ് ബില്.
എക്സ് ഒഫീഷ്യോ അംഗങ്ങളെക്കൂടാതെ 13 പേരെ നാമനിര്ദേശം ചെയ്യാനാണ് ബില്ലിലെ വ്യവസ്ഥ. താത്കാലിക സെനറ്റിലും സിന്ഡിക്കേറ്റിലും ഗവര്ണര് സ്വന്തം നിലയില് നാമനിര്ദേശം നടത്തുന്നത് തടയാനാണ് ഈ നിയമമെന്ന് ആരോപണമുയര്ന്നിരുന്നു. പ്രതിപക്ഷ അംഗങ്ങള് വരുന്നത് ഒഴിവാക്കാനും സര്വകലാശാലാ ഭരണം സി.പി.എമ്മിന്റെ നിയന്ത്രണത്തിലാക്കാനുമാണ് ഈ നീക്കമെന്ന് പ്രതിപക്ഷവും ആരോപിച്ചു.
ബില് നിയമമാവുകയും നടപ്പാക്കുകയും ചെയ്യുമ്പോള് സാമ്പത്തികബാധ്യത ഉണ്ടാവുമെങ്കില് അത് അവതരിപ്പിക്കാന് ഗവര്ണറുടെ മുന്കൂര് അനുവാദം വേണം. ഈ ബില് അത്തരത്തിലുള്ളതാണ്. അനുമതിതേടി കഴിഞ്ഞയാഴ്ച സര്ക്കാര്, ഗവര്ണര്ക്ക് കത്തുനല്കി. എന്നാല്, അദ്ദേഹം അനുവദിച്ചില്ല. ഗവര്ണര് അനുമതി നല്കുമെന്ന പ്രതീക്ഷയില് തിങ്കളാഴ്ച അവതരിപ്പിക്കാനുള്ള ബില്ലുകളുടെ പട്ടികയില് ഇത് ഉള്പ്പെടുത്തി.
എം.എല്.എ.മാരില്നിന്ന് ഭേദഗതികളും സ്വീകരിച്ചു. ബില്ലിന് അനുമതി നല്കാതെ ഗവര്ണര് ഉത്തരേന്ത്യന് പര്യടനത്തിന് തിരിച്ചു. ഇനി മാര്ച്ച് രണ്ടിനേ അദ്ദേഹം മടങ്ങിയെത്തൂ. സെനറ്റിന്റെയും സിന്ഡിക്കേറ്റിന്റെയും കാലാവധി കഴിയുന്നതിനാല് സര്വകലാശാലാ നിയമപ്രകാരം ഗവര്ണര് താത്കാലിക സമിതി രൂപവത്കരിക്കണമെന്നാവശ്യപ്പെട്ട് സെനറ്റ് അംഗം ഡോ. ഷിബി എം. തോമസ് നല്കിയ ഹര്ജി ഹൈക്കോടതി തിങ്കളാഴ്ച പരിഗണിക്കാനിരിക്കുകയാണ്.
അതേസമയം മലയാളം സര്വകലാശാലാ വിസി നിയമനത്തില് സര്ക്കാരിനെ രൂക്ഷമായി വിമര്ശിച്ച് ഗവര്ണര് ആരിഫ് മുഹമ്മദ് ഖാന്റെ കത്ത്. സര്ക്കാര് സ്വന്തം നിലയില് സെര്ച്ച് കമ്മിറ്റി നിയോഗിച്ചത് ഏത് നിയമത്തിന്റെ അടിസ്ഥാനത്തിലാണ്? ഗവര്ണറുടെ നോമിനിയെ നല്കണമെന്ന് ആവശ്യപ്പെടുന്നത് എന്തടിസ്ഥാനത്തിലെന്നും ഗവര്ണര് കത്തില് ചോദിക്കുന്നു.
യുജിസി പ്രതിനിധിയെ ഉള്പ്പെടുത്തി സെര്ച്ച് കമ്മിറ്റി രൂപീകരിച്ചപ്പോള് സര്ക്കാര് പ്രതിനിധിയെ നല്കിയില്ലെന്നും കത്തില് പറയുന്നു. മലയാളം സര്വകലാശാല വൈസ് ചാന്സലര് നിയമനത്തിന് സര്ക്കാര് സ്വന്തം നിലയില് സെര്ച്ച് കമ്മിറ്റി രൂപീകരിക്കുകയും അതിലേക്ക് ഗവര്ണറുടെ പ്രതിനിധിയെ നല്കണമെന്ന് ആവശ്യപ്പെടുകയും ചെയ്തുകൊണ്ട് രണ്ട് തവണ ഉന്നതവിദ്യാഭ്യാസ സെക്രട്ടറി രാജ്ഭവന് കത്തയച്ചിരുന്നു. ഇതിന് മറുപടിയായാണ് ഗവര്ണറുടെ നിര്ദശപ്രകാരം രാജ്ഭവന് സെക്രട്ടറി മറുപടി നല്കിയത്.
നേരത്തെ സര്വകലാശാല വൈസ് ചാന്സലര് നിയമനത്തില് സര്ക്കാരിന് മേല്ക്കൈ നല്കുന്ന രീതിയിലുള്ള നിയമം പാസാക്കുകയും അത് ഗവര്ണറുടെ അനുമതിക്കായി നല്കുകയും ചെയ്തിരുന്നു. എന്നാല് ഇതുവരെ ഗവര്ണര് ഒപ്പിടാത്തതിനാല് ആ ബില്ലിന് നിയമപരമായ സാധുതയില്ല. പിന്നെങ്ങനെയാണ് ഇത്തരത്തിലുള്ള നടപടിയുമായി സര്ക്കാര് മുന്നോട്ടുപോകുന്നതെന്ന് ഗവര്ണര് ചോദിച്ചു. സര്ക്കാരും ഗവര്ണറും തമ്മില് മഞ്ഞുരുകുമ്പോഴും പല ബില്ലുകളും ഗവര്ണര് ഒപ്പിടാത്തതില് ഭരണപക്ഷം തികഞ്ഞ അതൃപ്തിയിലാണ്.
"
https://www.facebook.com/Malayalivartha
