അടുത്ത വര്‍ഷമാണ് ലോക്‌സഭാ തെരഞ്ഞെടുപ്പ് നടക്കുന്നത്. വടക്കു കിഴക്കന്‍ സംസ്ഥാനത്തെ കോണ്‍ഗ്രസിന്റേയും സഖ്യ കക്ഷികളുടേയും പരാജയം കോണ്‍ഗ്രസ് സഖ്യത്തിന് വലിയ തിരിച്ചടിയായി. മാത്രമല്ല ബിജെപിയ്ക്ക് വലിയ പിന്തുണയുമായി.

രാഹുല്‍ ഗാന്ധി ഒന്നും കാണാനും കേള്‍ക്കാനും വയ്യാതെ മുടിയൊക്കെ വെട്ടി കുട്ടപ്പനായി വിദേശ പര്യടനത്തിലാണ്. അതിനിടെ പ്രഹരമേല്‍പ്പിച്ച് ബംഗാള്‍ മുഖ്യമന്ത്രി മമത ബാനര്‍ജി. അടുത്ത വര്‍ഷത്തെ ലോക്‌സഭാ തെരഞ്ഞെടുപ്പില്‍ ആരുമായും സഖ്യത്തിനില്ലെന്ന് മമത ബാനര്‍ജി തുറന്നടിച്ചു. തൃണമൂല്‍ കോണ്‍ഗ്രസ് ഒറ്റയ്ക്ക് മത്സരിക്കുമെന്നും ജനങ്ങളുടെ മാത്രം പിന്തുണ മതിയെന്നും മമത ബാനര്‍ജി പറഞ്ഞു.

ബിജെപിയെ തോല്‍പ്പിക്കാന്‍ ആഗ്രഹിക്കുന്നവര്‍ ഞങ്ങള്‍ക്ക് വോട്ട് ചെയ്യും. സിപിഎമ്മിനും കോണ്‍ഗ്രസിനും വോട്ട് ചെയ്യുന്നവര്‍ യഥാര്‍ത്ഥത്തില്‍ ബിജെപിയെ പിന്തുണയ്ക്കുകയാണെന്നും മമത പറഞ്ഞു. വടക്കു കിഴക്കന്‍ സംസ്ഥാനങ്ങളിലെ തെരഞ്ഞെടുപ്പ് ഫലം പുറത്തുവന്നതിന് പിന്നാലെയാണ് മമതയുടെ പ്രതികരണം. അതേസമയം, ഈ വര്‍ഷം നടക്കുന്ന മറ്റ് മത്സരങ്ങളിലേക്ക് കടക്കുമ്പോള്‍ ബിജെപിക്കും നരേന്ദ്ര മോദിക്കും വലിയ ഊര്‍ജ്ജം നല്‍കുന്നതാണ് വടക്ക് കിഴക്കന്‍ സംസ്ഥാനങ്ങളിലെ നേട്ടം എന്നാണ് വിലയിരുത്തപ്പെടുന്നത്.

കോണ്‍ഗ്രസ് സഖ്യം തുടരുന്നതില്‍ സിപിഎമ്മിനുള്ളില്‍ ചോദ്യങ്ങള്‍ ഉയരാന്‍ ഫലം ഇടയാക്കും. തിപ്ര മോത ഗോത്രമേഖലയില്‍ നടത്തിയ മുന്നേറ്റം പ്രാദേശിക പാര്‍ട്ടികള്‍ക്ക് ബിജെപിയെ ചെറുക്കാനാകും എന്ന വാദത്തിന് ബലം നല്‍കുന്നതാണ്. ത്രിപുര, മേഘാലയ, നാഗാലാന്‍ഡ് സംസ്ഥാനങ്ങളിലെ തെരഞ്ഞെടുപ്പ് ഫലം പുറത്തുവരുമ്പോള്‍ ബി ജെ പിക്ക് വലിയ നേട്ടമാണ്.

ത്രിപുരയില്‍ വലിയ പരീക്ഷണങ്ങളെ അതിജീവിച്ച് തുടര്‍ഭരണമെന്ന സ്വപ്നം യാഥാര്‍ത്ഥ്യമാക്കിയതാണ് വലിയ നേട്ടത്തിന് കാരണം. ഇടതുപക്ഷവും കോണ്‍ഗ്രസും കൈകോര്‍ത്തിട്ടും തിപ്ര മോത പാര്‍ട്ടി കരുത്തറിയിച്ചിട്ടും ഒറ്റയ്ക്ക് ഭരണം നേടിയത് ബി ജെ പിയുടെ ആത്മവിശ്വാസം വര്‍ധിപ്പിക്കും. നാഗാലാന്‍ഡില്‍ ബി ജെ പി സഖ്യം വലിയ വിജയം സ്വന്തമാക്കി. അതേസമയം മേഘാലയയില്‍ കൊണ്‍റാഡ് സാംഗ്മയുടെ എന്‍പിപിയാണ് വലിയ നേട്ടത്തിലെത്തിയത്.

ബി ജെ പിയെ ഒഴിവാക്കിയും കോണ്‍റാഡ് സാംഗ്മയ്ക്ക് വേണമെങ്കില്‍ സര്‍ക്കാര്‍ രൂപീകരിക്കാം എന്നതാണ് അവസ്ഥ. എന്‍ പി പിയും പത്തു സീറ്റ് നേടിയ യു ഡി പിയും ചേര്‍ന്നാല്‍ സര്‍ക്കാര്‍ രൂപീകരിക്കാം. എന്നാല്‍ കേന്ദ്രസഹായം കൂടി പ്രതീക്ഷിക്കുന്ന കോണ്‍റാഡ് സാംഗ്മ ബി ജെ പിയേയും കൂടെ നിറുത്താനാണ് സാധ്യത. അങ്ങനെയെങ്കില്‍ വടക്ക് കിഴക്കന്‍ സംസ്ഥാനങ്ങളില്‍ ആധിപത്യം ഊട്ടിഉറപ്പിക്കാന്‍ ബി ജെ പിക്ക് സാധിക്കും.

അതേസമയം മേഘാലയയില്‍ താരമായി എന്‍പിപിയും കോണ്‍റാഡ് സാംഗ്മയും. എന്‍പിപി ഏറ്റവും വലിയ ഒറ്റകക്ഷിയായ മേഘാലയയില്‍ എന്‍പിപി-ബിജെപി സര്‍ക്കാരിന് വഴിയൊരുങ്ങുകയാണ്. 26 സീറ്റ് നേടിയ എന്‍പിപി, കേന്ദ്ര സഹായവും ഭരണസ്ഥിരതയും കണക്കിലെടുത്താണ് ബിജെപിയുമായി കൈകോര്‍ക്കുന്നത്. സര്‍ക്കാര്‍ രൂപീകരണത്തിന് എന്‍പിപിയെ പിന്തുണക്കാന്‍ ബിജെപി കേന്ദ്ര നേതൃത്വം പച്ചക്കൊടി കാട്ടി.

60 നിയമസഭ മണ്ഡലങ്ങള്‍ ഉള്ള മേഘാലയയില്‍ 26 സീറ്റുകളുമായി എന്‍പിപി ഏറ്റവും വലിയ ഒറ്റക്കക്ഷിയായി. കഴിഞ്ഞ തവണ രണ്ട് സീറ്റുകള്‍ ഉണ്ടായിരുന്ന ബിജെപി ഇത്തവണയും അതേനിലയിലാണ്. എന്നാല്‍, സ്ഥിരതയുളള ഭരണവും കേന്ദ്ര സഹായവും ലക്ഷ്യമിടുന്ന എന്‍പിപി നേതാവ് കോണ്‍റാഡ് സാംഗ്മ ബിജെപിക്കൊപ്പം കൈകോര്‍ക്കാന്‍ ഒരുങ്ങുകയാണ്.

അമിത് ഷായുമായി കൊന്റാഡ് സാംഗ്മ ഫോണില്‍ സംസാരിച്ചു. എന്‍പിപിയെ പിന്തുണയ്ക്കുമെന്ന് ബിജെപി അധ്യക്ഷന്‍ ജെ പി നദ്ദയും വ്യക്തമാക്കി. 2018ല്‍ കോണ്‍ഗ്രസ് 21 സീറ്റ് നേടി ഏറ്റവും വലിയ ഒറ്റകക്ഷിയായെങ്കിലും 19 സീറ്റ് നേടിയ എന്‍പിപി ബിജെപിയുടെയും യുഡിപിയുടെയും പിന്തുണയോടെ സര്‍ക്കാര്‍ ഉണ്ടാക്കുകയായിരുന്നു. നാലര വര്‍ഷത്തിലേറെ ഒന്നിച്ച് ഭരിച്ച ശേഷം വഴിപിരിഞ്ഞ സഖ്യത്തിലെ ബിജെപിയും എന്‍പിപിയും ഇനി വീണ്ടും ഒന്നിക്കും.