ആറ്റുകാല്‍ പൊങ്കാലയോടനുബന്ധിച്ച് ചൊവ്വാഴ്ച(മാര്‍ച്ച് 7) തിരുവനന്തപുരം ജില്ലയ്ക്ക് പ്രാദേശിക അവധി പ്രഖ്യാപിച്ചു. സര്‍ക്കാര്‍, അര്‍ദ്ധ സര്‍ക്കാര്‍ സ്ഥാപനങ്ങള്‍, വിദ്യാഭ്യാസ സ്ഥാപനങ്ങള്‍ എന്നിവയ്ക്ക് പ്രാദേശിക അവധി പ്രഖ്യാപിച്ച് ജില്ലാ കളക്ടര്‍ ജെറോമിക് ജോര്‍ജ് ഉത്തരവിറക്കി.

മുന്‍നിശ്ചയ പ്രകാരമുള്ള പൊതു പരീക്ഷകള്‍ക്ക് അവധി ബാധകമായിരിക്കില്ല. കൊറോണക്ക് ശേഷമുള്ള ആദ്യ പൊങ്കാല ആഘോഷമാക്കുകയാണ് ജനങ്ങള്‍. പൊങ്കാലക്ക് ദിവസങ്ങള്‍ മാത്രം ബാക്കി നില്‍ക്കെ നാടും നഗരവും ഉത്സവ ലഹരിയിലാണ്. തിരക്ക് നിയന്ത്രിക്കാനായി ജില്ലാ ഭരണകൂടവും പോലീസും പ്രയത്‌നിക്കും. യാത്രാ സൗകര്യവും സുരക്ഷയും ഉറപ്പാക്കുകയും ചെയ്യും.

അതേസമയം ആറ്റുകാല്‍ ഭഗവതി ക്ഷേത്രത്തില്‍ പൊങ്കാല ഉത്സവത്തോട് അനുബന്ധിച്ച് നടത്തുന്ന പ്രധാന ചടങ്ങുകളില്‍ ഒന്നാണ് കുത്തിയോട്ടം. മാര്‍ച്ച് ഒന്നാം തീയതി വ്രതം തുടങ്ങി. 743 ബാലന്മാരാണ് ഇത്തവണ കുത്തിയോട്ട വ്രതം അനുഷ്ഠിക്കുന്നത്. 12 വയസ്സില്‍ തഴെയുള്ള ബാലന്മാരാണ് കുത്തിയോട്ട വ്രതം അനുഷ്ഠിക്കുക.

കുത്തിയോട്ട ബാലന്മാരെ സങ്കല്‍പിക്കുന്നത് മഹിഷാസുര മര്‍ദിനിയുടെ മുറിവേറ്റ ഭടന്മാരായാണ് . ക്ഷേത്ര മതില്‍ക്കെട്ടിനുള്ളില്‍ ഏഴ് ദിവസം താമസിച്ച് 1008 നമസ്‌കാരം ദേവിയ്ക്ക് മുന്‍പില്‍ പൂര്‍ത്തിയാക്കണമെന്നതാണ് ആചാരത്തിലുളളത്. രാവിലെ പന്തീരടി പൂജകള്‍ക്ക് ശേഷമാണ് കുത്തിയോട്ട വ്രതത്തിനുള്ള ഒരുക്കങ്ങള്‍ ആരംഭിക്കുക ദേവിയെ കുടിയിരുത്തി മൂന്നാം ദിവസമാണ് വ്രതം ആരംഭിക്കുന്നത്.

ക്ഷേത്രക്കുളത്തില്‍ കുളിച്ച് ഈറനോടെ ആറ്റുകാലമ്മയെ വണങ്ങിയ ശേഷം പള്ളിപ്പലകയില്‍ 7 വെള്ളിനാണയങ്ങള്‍ വെയ്ക്കുകയും ശേഷം ക്ഷേത്ര മേല്‍ശാന്തിക്ക് ദക്ഷിണ നല്‍കിയാണ് വ്രതം തുടങ്ങുന്നത്. പൊങ്കാല ദിവസം വൈകിട്ട് കിരീടവും ആടയാഭരണങ്ങളും ധരിപ്പിച്ച് ദേവീസന്നിധിയില്‍ ബാലന്മാര്‍ക്കു ചൂരല്‍ കുത്തും. ക്ഷേത്രത്തിലേക്കുള്ള ദേവിയുടെ എഴുന്നള്ളിപ്പിന് അകമ്പടി സേവിക്കുക കുത്തിയോട്ട ബാലന്മാരാണ്. തിരികെ ക്ഷേത്രത്തിലെത്തി ഈ ചൂരല്‍ ഇളക്കുന്നതോടെ വ്രതം അവസാനിക്കുകയും ചെയ്യും..



കോവിഡ് നിയന്ത്രണങ്ങള്‍ മാറിയ സാഹചര്യത്തില്‍ കൂടുതല്‍ ഭക്തജനങ്ങള്‍ എത്താന്‍ സാധ്യതയുള്ളതിനാല്‍ പഴുതടച്ച സംവിധാനങ്ങളാണ് ഒരുക്കുക.

വിവിധ സംഘടനകളും മറ്റും ഭക്തജനങ്ങള്‍ക്കുള്ള ഭക്ഷണവിതരണം നടത്തുന്നത് ഇത്തവണ ഭക്ഷ്യ സുരക്ഷാ വകുപ്പിന്റെ കര്‍ശന മേല്‍നോട്ടത്തില്‍ ആയിരിക്കുമെന്ന് പൊതുവിദ്യാഭ്യാസ വകുപ്പ് മന്ത്രി വി.ശിവന്‍കുട്ടി . വൃത്തിഹീനമായ സാഹചര്യത്തിലും കൃത്രിമ നിറങ്ങള്‍ ഉപയോഗിച്ചും ഭക്ഷണപാനീയങ്ങള്‍ വിതരണം ചെയ്യാന്‍ ഒരുകാരണവശാലും അനുവദിക്കില്ല. ക്ഷേത്ര പരിസരത്തും നഗരത്തിന്റെ വിവിധ ഭാഗങ്ങളിലുമുള്ള ഹോട്ടലുകള്‍, താല്‍ക്കാലിക വിപണന കേന്ദ്രങ്ങള്‍ എന്നിവിടങ്ങളില്‍ നല്‍കുന്ന കുടിവെള്ളം, ആഹാരസാധനങ്ങള്‍ എന്നിവയുടെ സാമ്പിളുകള്‍ ശേഖരിച്ച് ഗുണനിലവാരം ഉറപ്പുവരുത്തും. പരിശോധനയ്ക്കായി ഭക്ഷ്യസുരക്ഷാ വകുപ്പിന്റെ പ്രത്യേക സ്‌ക്വാഡുകള്‍ പ്രവര്‍ത്തിക്കുന്നതാണ്. ക്ഷേത്ര പരിസരത്ത് ലഹരി ഉപയോഗവും വില്‍പനയും തടയാന്‍ കര്‍ശനമായ പരിശോധന നടത്തും.