ഇന്ത്യയില്‍ മാത്രം ഒതുങ്ങിനിന്ന വിവാദ ആള്‍ദൈവം നിത്യാനന്ദ സ്വാമി ഇപ്പോള്‍ ലോകത്ത് തന്നെ നിറഞ്ഞ് നില്‍ക്കുകയാണ്. ഇന്ത്യയില്‍നിന്ന് ഒളിച്ചോടി സ്വന്തം രാജ്യം പ്രഖ്യാപിച്ച നിത്യാനന്ദയുടെ പ്രതിനിധി ഐക്യരാഷ്ട്രസഭ സംഘടിപ്പിച്ച പരിപാടിയില്‍ പങ്കെടുത്തതില്‍ വിശദീകരണവുമായി യു.എന്‍. ജനീവയില്‍നടന്ന യോഗത്തില്‍ പങ്കെടുത്തതായി സ്ഥിരീകരിച്ചെങ്കിലും പ്രതിനിധിയുടെ നിര്‍ദേശങ്ങള്‍ സമ്മേളനത്തിന്റെ അന്തിമരേഖയിലുണ്ടാവില്ലെന്ന് യു.എന്‍. മനുഷ്യാവകാശവിഭാഗം വക്താവ് വ്യക്തമാക്കി.

പൊതുജനങ്ങള്‍ക്കും സന്നദ്ധസംഘടനകള്‍ക്കും പങ്കെടുക്കാവുന്ന പൊതുപരിപാടിയിലാണ് നിത്യാനന്ദയുടെ സ്വയംപ്രഖ്യാപിത രാജ്യമായ 'യുണൈറ്റഡ് സ്റ്റേറ്റ്‌സ് ഓഫ് കൈലാസ'യുടെ പ്രതിനിധി പങ്കെടുത്തത്. മാ വിജയപ്രിയ നിത്യാനന്ദ എന്ന വനിതയാണ് സമ്മേളനത്തിനെത്തിയത്. അവര്‍ മുന്നോട്ടുവെച്ച നിര്‍ദേശങ്ങള്‍ അപ്രസക്തമാണെന്ന് യു.എന്‍. വക്താവ് വിശദീകരിച്ചു.

യോഗത്തില്‍ ലഘുലേഖകള്‍ വിതരണംചെയ്യാനുള്ള പ്രതിനിധിയുടെ ശ്രമം തടഞ്ഞിരുന്നുവെന്നും അറിയിച്ചു. ഫെബ്രുവരി 22-നും 24-നുമായി രണ്ടുയോഗങ്ങളിലാണ് നിത്യാനന്ദയുടെ പ്രതിനിധി പങ്കെടുത്തത്. ഓസ്‌ട്രേലിയന്‍ മുന്‍ പ്രധാനമന്ത്രി ജൂലിയ ഗിലര്‍ഡ്, മനുഷ്യാവകാശ പ്രവര്‍ത്തകര്‍ തുടങ്ങിയവര്‍ പങ്കെടുത്ത യോഗത്തില്‍ വിജയപ്രിയ ചോദ്യങ്ങള്‍ ചോദിച്ചിട്ടുമുണ്ട്.

ഇവര്‍ സംസാരിക്കുന്ന ദൃശ്യങ്ങള്‍ സാമൂഹികമാധ്യമങ്ങളില്‍ പ്രചരിച്ചതോടെയാണ് യു.എന്‍. വിശദീകരണവുമായി എത്തിയത്. ബലാത്സംഗം ഉള്‍പ്പെടെയുള്ള കുറ്റങ്ങളില്‍ പ്രതിയായ തമിഴ്‌നാട് സ്വദേശി നിത്യാനന്ദ 2019 നവംബറിലാണ് ഇന്ത്യയില്‍നിന്ന് മുങ്ങിയത്. തുടര്‍ന്ന്, ഇക്വഡോറിനുസമീപമുള്ള ദ്വീപിലാണ് 'കൈലാസ റിപ്പബ്‌ളിക്' സ്ഥാപിച്ചത്. ഇദ്ദേഹത്തിന്റെ പേരില്‍ ഇന്ത്യയില്‍ അറസ്റ്റ് വാറന്റ് നിലനില്‍ക്കുന്നുണ്ട്.

നിത്യാനന്ദ ചില്ലറക്കാരനല്ല. ബലാത്സംഗക്കേസിലകപ്പെട്ട് ഇന്ത്യയില്‍ ജയില്‍വാസം അനുഭവിച്ച വിവാദ ആള്‍ദൈവം. ഒളിക്യാമറ വിവാദം അടക്കം നിരവധി ആരോപണങ്ങള്‍ പിന്നാലെയും. ഒടുവില്‍ മറ്റൊരു പീഡന പരാതിയില്‍ നിയമനടപടി നേരിടാനിരിക്കേ ഇന്ത്യയില്‍ നിന്ന് പലായനം ചെയ്യേണ്ടി വരുന്നു. അങ്ങനെ തന്റെ ആശ്രമത്തിലെ അന്തേവാസികളെ ലൈംഗികമായി പീഡിപ്പിച്ചതിനും അനധികൃതമായി സ്ത്രീകളെ തടവില്‍ പാര്‍പ്പിച്ചു എന്ന കുറ്റത്തിനും നിരന്തരം വാര്‍ത്തകളില്‍ നിറഞ്ഞിരുന്ന വിവാദനായകനായിരുന്നു നിത്യാനന്ദ.

എന്നാല്‍ 2020-ല്‍ രാജ്യം വിട്ടതിന് ശേഷം നിത്യാനന്ദ സ്വന്തമായി സ്ഥാപിച്ച കൈലാസ രാജ്യത്തിന്റെ പ്രതിനിധി യു എന്‍ സഭയെ പ്രതിനിധീകരിച്ചതോടെയാണ് അദ്ദേഹത്തിന്റെ ഇന്ത്യന്‍ വേരുകളും വിവാദപരമായ ചെയ്തികളും പലരും വീണ്ടും ഓര്‍ത്തെടുക്കാന്‍ തുടങ്ങുന്നത്.

ഇന്ത്യയില്‍ നിന്ന് കടന്ന ശേഷം നിത്യാനന്ദ തന്റെ അനുയായികള്‍ക്കായി ഒരു രാജ്യം തന്നെ സൃഷ്ടിച്ചു എന്ന വാര്‍ത്ത പുറത്തുവന്നിരുന്നു. ബലാത്സംഗകേസില്‍ ഇന്ത്യ തിരയുന്ന കുറ്റവാളിയായ നിത്യാനന്ദയുടെ രാജ്യം എവിടെയാണെന്ന കാര്യത്തില്‍ അപ്പോഴും വ്യക്തയുണ്ടായിരുന്നില്ല. കൂടാതെ ഇന്ത്യ വിട്ടതിന് ശേഷം പൊതുവേദിയില്‍ പ്രത്യക്ഷപ്പെടാതിരുന്ന നിത്യാനന്ദയെക്കുറിച്ചുള്‌ല വാര്‍ത്തകളുടെ ആധികാരികതയും പലപ്പോഴും ചോദ്യം ചെയ്യപ്പെട്ടു. എങ്കിലും യുണൈറ്റഡ് സ്റ്റേറ്റ്‌സ് ഓഫ് കൈലാസയെക്കുറിച്ചുള്ള വിവരങ്ങള്‍ അവരുടേതെന്ന് പറയപ്പെടുന്ന ട്വിറ്റര്‍ ഹാന്‍ഡിലിലൂടെ പുറത്തു വന്നിരുന്നു.

രാജ്യത്തിന് സ്വന്തമായി റിസര്‍വ് ബാങ്ക് നിര്‍മിക്കുമെന്നുള്ള നിത്യാനന്ദയുടെ പ്രഖ്യാപനവും അതുപോലെ തന്നെ തന്റെ രാജ്യത്തിന് സ്വന്തമായി നാണയം പുറത്തിറക്കിയതായുമുള്ള വാര്‍ത്തകള്‍ ട്വിറ്റര്‍ വഴി പുറത്തു വന്നു. എന്നാല്‍ നിത്യാനന്ദ സ്ഥാപകനും പരമാധികാരിയും എന്ന് പറയപ്പെടുന്ന കൈലാസ എന്ന നിഗൂഢ രാജ്യത്തെക്കുറിച്ച് കൂടുതല്‍ ആധികാരികതയോടെ ആളുകളെ നോക്കിക്കാണാന്‍ പ്രേരിപ്പിച്ചത് അടുത്തിടെയുണ്ടായ യുഎന്‍ മീറ്റിംഗായിരുന്നു.

യു എന്‍ മീറ്റിംഗില്‍ പ്രത്യക്ഷപ്പെട്ട കൈലാസയുടെ പ്രതിനിധി വിജയപ്രിയ വാര്‍ത്തകളില്‍ നിറഞ്ഞു. മാനിബോറ്റ സര്‍വകലാശാലയില്‍ നിന്നും മൈക്രോബയോളജിയില്‍ ബിഎസ്സി ബിരുദം കരസ്ഥമാക്കിയിട്ടുള്ള വ്യക്തിയാണ് കൈലാസയുടെ ആജീവാനന്ത അംബാസഡര്‍ എന്ന് വിശേഷിപ്പിക്കുന്ന വിജയപ്രിയ. കൂടാതെ ഇംഗ്‌ളീഷ്, ഹിന്ദി, ഫ്രഞ്ച്, ക്രിയോള്‍ ആന്റ് പിന്‍ജിന്‍ എന്നീ ഭാഷകള്‍ വശമുള്ളതായും ലിങ്ക്ഡ്-ഇന്‍ പ്രൊഫൈല്‍ വിശദമാക്കുന്നു.