കെ.ടി.ഡി.എഫ്.സി ഭവനവായ്പ അഴിമതി കേസില്‍ മുന്‍ എം.ഡി രാജശ്രീ അജിത്തുള്‍പ്പെടെ ഏഴു പ്രതികളെ ഹാജരാകാന്‍ കോടതി ഉത്തരവിട്ടു. തിരുവനന്തപുരം വിജിലന്‍സ് പ്രത്യേക കോടതിയുടേതാണുത്തരവ്. പ്രതികളെ ഏപ്രില്‍ 17ന് ഹാജരാക്കാന്‍ വിജിലന്‍സ് എസ് പിയോടാണ് കോടതി ഉത്തരവിട്ടത്.

കെ.ടി.ഡി.എഫ്.സി മുന്‍ സാമ്പത്തികവിഭാഗം ചീഫ് മാനേജര്‍ പി. നിര്‍മലദേവി, മുന്‍ അഡ്മിനിസ്ട്രേറ്റര്‍ ശ്രീകുമാരന്‍ നായര്‍, എം.ഡിയുടെ പി.എ അജിതകുമാരി, മുന്‍ സീനിയര്‍ അസിസ്റ്റന്റ് ശാലിനിദേവി, മുന്‍ കമ്പനി സെക്രട്ടറി ഹരികൃഷ്ണന്‍, മുന്‍ നിയമോപദേശകന്‍ വഴുതക്കാട് നരേന്ദ്രന്‍, രാജശ്രീയുടെ ഭര്‍ത്താവ് അജിത്കുമാര്‍ എന്നിവരാണ് വിജിലന്‍സ് കേസിലെ 1 മുതല്‍ 7 വരെയുള്ള പ്രതികള്‍.

ഇന്ത്യന്‍ ശിക്ഷാനിയമത്തിലെ വകുപ്പുകളായ 420 ( ചതിക്കലും വിശ്വാസ വഞ്ചനയും) , 467 (വ്യാജരേഖ ചമയ്ക്കല്‍),120 ബി ( കുറ്റകരമായ ഗൂഢാലോചന എന്നീ വകുപ്പുകളും അഴിമതിനിരോധന നിയമത്തിലെ 13 (1 )(ഡി), 13 (2) (പൊതുസേവകന്‍ തന്റെ ഔദ്യോഗിക പദവി ദുരുപയോഗം ചെയ്ത് മൂന്നാം കക്ഷികളായ സ്വകാര്യ വ്യക്തികള്‍ക്ക് അവിഹിത മാര്‍ഗ്ഗത്തിലൂടെ അനര്‍ഹമായ സാമ്പത്തിക നേട്ടം ഉണ്ടാക്കി നല്‍കല്‍) എന്നീ വകുപ്പുകള്‍ പ്രകാരമുള്ള കുറ്റങ്ങള്‍ക്ക് കലണ്ടര്‍ കേസെടുത്താണ് പ്രതികളെ ഹാജരാക്കാന്‍ കോടതി ആവശ്യപ്പെട്ടത്..


2005ല്‍ കെ.ടി.ഡി.എഫ്.സി നടപ്പാക്കിയ ഐശ്വര്യ ഗ്രഹ എന്ന ഭവന വായ്പപദ്ധതിയുമായി ബന്ധപ്പെട്ട് ക്രമക്കേട് നടത്തി കെ.ടി.ഡി.എഫ്.സിക്ക് 76,33,893 രൂപയുടെ നഷ്ടം വരുത്തി എന്നാണ് വിജിലന്‍സ് കേസ്. രാജശ്രീ അജിത്ത് കെ.ടി.ഡി.എഫ്.സിയുടെ എം.ഡി ആയിരുന്ന 1996-2008 കാലഘട്ടത്തില്‍ ഇവരുടെ ഭര്‍ത്താവും എട്ടാം പ്രതിയുമായ അജിത്കുമാറിന്റെ തൈക്കാടുള്ള 17.25 സെന്റ് വസ്തു ഈടുവെച്ച് 46 ലക്ഷം രൂപ വായ്പ അനുവദിച്ചു.

എന്നാല്‍, ഈ വസ്തുതന്നെ മുമ്പ് ഈടു വെച്ച് 1995ല്‍ കോഴിക്കോട്ടെ പഞ്ചാബ് നാഷനല്‍ ബാങ്കില്‍ നിന്ന് 75 ലക്ഷം രൂപ വായ്പ എടുത്തിരുന്നു. ഈ കേസില്‍ കൊച്ചിയിലെ ട്രൈബ്യൂണല്‍ കോടതിയില്‍ നിയമനടപടികള്‍ നിലനില്‍ക്കുമ്പോഴാണ് ഈ കാര്യം മറച്ചുവെച്ച് കെ.ടി.ഡി.എഫ്.സിയില്‍നിന്ന് ഭവന വായ്പ അനുവദിച്ചുനല്‍കിയത്. ഇതിന്റെ നിയമ വശം അറിയാമായിരുന്നിട്ടും അത് മറച്ചു വെച്ച് കെ.ടി.ഡി.എഫ്.സി മുന്‍ നിയമ ഉപദേശകന്‍ വഴുതക്കാട് നരേന്ദ്രന്‍ ക്ലിയറന്‍സ് സര്‍ട്ടിഫിക്കറ്റ് നല്‍കുകയും ചെയ്തു എന്നാണ് വിജിലന്‍സ് കുറ്റപത്രം. 2023 മാര്‍ച്ച് 1 നാണ് കോടതിയില്‍ വിജിലന്‍സ് കുറ്റപത്രം സമര്‍പ്പിച്ചത്.