ആനകള്‍ തിരക്കിലാണ്....ചെണ്ടപ്പുറത്ത് കോല് വീണതോടെ ഇനി ആനകള്‍ക്ക് വിശ്രമമില്ല. പൂരങ്ങള്‍ കൊടിയേറിയതോടെ ഈ ഒന്‍പത് ആനകള്‍ക്കായ് പിടി. കേരളത്തിലെ അമ്പലക്കമ്മിറ്റിക്കാര്‍ ആഗ്രഹിക്കുന്ന താരങ്ങളായ 9 ആനകള്‍ക്കായാണ് പിടിവലി നടക്കുന്നത്. എഴുന്നള്ളത്ത് താരങ്ങള്‍പാമ്പാടി രാജന്‍, ഗുരുവായൂര്‍ ഇന്ദ്രസെന്‍, ഈരാറ്റുപേട്ട അയ്യപ്പന്‍, എറണാകുളം ശിവകുമാര്‍, തൃക്കടവൂര്‍ ശിവരാജു, തെച്ചിക്കോട്ടുകാവ് രാമചന്ദ്രന്‍, ചിറയ്ക്കല്‍ കാളിദാസന്‍, മംഗലാംകുന്ന് അയ്യപ്പന്‍, ശരണ്‍ അയ്യപ്പന്‍. ലക്ഷങ്ങള്‍ കൊടുക്കാനും തയ്യാറാണ് ഈ കൊമ്പന്മാര്‍ക്കായ്. പൂരം കൊഴുപ്പിക്കാന്‍ ഗജവീരന്മാരെ കിട്ടിയേ തീരു. ഉത്സവത്തില്‍ പണത്തിന്റെ വലിയൊരു ഒഴുക്ക് ആനകളിലേക്കാണ്.

സംസ്ഥാനത്തെ നാട്ടാനകളും പാപ്പാന്മാരും ഇനി ശരിക്കൊന്ന് ഉറങ്ങണമെങ്കില്‍ ഉത്സവകാലം കഴിയണം. എഴുന്നള്ളത്തിനടക്കം ഓടി നടന്ന് പങ്കെടുക്കുകയാണ് ആനകള്‍. സംസ്ഥാനത്ത് ആകെയുള്ള 443 നാട്ടാനകളില്‍ 350 എണ്ണം മാത്രമേ എഴുന്നള്ളത്തിന് യോഗ്യമായവയുള്ളൂ. ഒരു ആനയെ മുതല്‍ 128 ആനകളെ വരെ എഴുന്നള്ളിക്കുന്ന 3330 ആരാധനാലയങ്ങള്‍ സംസ്ഥാനത്തുണ്ട്. ഡിമാന്റ് ഏറിയതിനാല്‍ ചോദിക്കുന്ന തുക നല്‍കിയാണ് ബുക്ക് ചെയ്യുന്നത്. സാധാരണ ആനയ്ക്ക് ദിവസം അരലക്ഷം രൂപാ വരെ നല്‍കണം. പേരും പ്രശസ്തിയുമുള്ളവയ്ക്ക് 1.5 3 ലക്ഷം വരേയും. ലോറി? വാടകയും പാപ്പാന്മാരുടെ ബാറ്റയും പുറമേ. ക്ഷേത്ര കമ്മിറ്റിക്കാര്‍ ഉടമകളുടെയും ഏജന്റുമാരുടെയും മുന്നില്‍ കാത്തുകെട്ടിക്കിടന്നാണ് ആനകളെ ഉറപ്പാക്കുന്നത്. തൃശൂരിലെ ചെമ്പൂത്തറ കൊടുങ്ങല്ലൂര്‍ക്കാവ് ഭഗവതി ക്ഷേത്രത്തിലാണ് ഉത്സവ ദിനങ്ങളില്‍ 128 ആനകളെ എഴുന്നള്ളിക്കാന്‍ അനുമതിയുള്ളത്.

ഉത്സവച്ചെലവിന്റെ വലിയൊരു ഭാഗം ആനകള്‍ക്ക് മാറ്റി വയ്‌ക്കേണ്ട സ്ഥിതിയാണ്. എറണാകുളം ശിവക്ഷേത്രത്തിലെ ഉത്സവത്തിന് 60 ലക്ഷത്തോളം രൂപ ആനയ്ക്ക് മാത്രം ചെലവായി. സീസണില്‍ കഴിയുന്നത്ര വരുമാനമെടുക്കാനുള്ള ശ്രമത്തിലാണ് ഉടമകള്‍. തലയെടുപ്പുള്ള ആനകള്‍ക്കൊന്നും ഒരു ദിവസത്തെ പോലും വിശ്രമമില്ല. കഴിഞ്ഞ ദിവസം പാലക്കാട്ട് എഴുന്നള്ളത്തിനിടെ പേരുകേട്ട ഒരാന നിന്നുറങ്ങി വീഴാന്‍ പോയ ദൃശ്യം വൈറലായിരുന്നു.ആനകളെ എഴുന്നള്ളിക്കുന്നതില്‍ ഏതാനും മുസ്‌ളീം, ക്രിസ്ത്യന്‍ ദേവാലയങ്ങളുമുണ്ട്. പാലക്കാട്ട് ആന എഴുന്നള്ളിപ്പുള്ള 773 ക്ഷേത്രങ്ങളുണ്ട്. 703 എണ്ണവുമായി തൃശൂരാണ് രണ്ടാമത്. ഏറ്റവും കുറവ് കാസര്‍കോട് മൂന്നെണ്ണം. നാട്ടാനയി?ല്ലാത്ത ഏക ജില്ലയും ഇതാണ്. ഏറ്റവുമധികം ആനകള്‍ തൃശൂര്‍ ജില്ലയിലാണ് 114. ഗുരുവായൂര്‍ ക്ഷേത്രത്തില്‍ 42 ആനകളുണ്ട്. ഗുരുവായൂര്‍ ഇന്ദ്രസെന്നിനെ 2,72,727 രൂപയ്ക്കാണ് കഴിഞ്ഞ ദിവസം ഒരു ദിവസത്തേക്ക് ലേലം കൊണ്ടത്.അതേസമയം, നാട്ടാനകളുടെ എണ്ണം കുറഞ്ഞു വരികയാണ്. അഞ്ചുവര്‍ഷത്തിനിടെ 78 ആനകള്‍ ചരിഞ്ഞു. ജനുവരിയിലും ഫെബ്രുവരിയിലുമായി രണ്ടെണ്ണം കൂടി നഷ്ടമായി.

ആനക്കണക്ക്

കൊമ്പന്‍... 337
പിടി............. 89
മോഴ........... 17
ആകെ........ 443

ഉടമസ്ഥര്‍

വനം വകുപ്പ് 36
ദേവസ്വം ബോര്‍ഡുകള്‍ 75
സ്വകാര്യ ദേവസ്വങ്ങള്‍ 41
വ്യക്തികള്‍ 282
സര്‍ക്കസ 09

പൂരങ്ങള്‍ കൊഴുപ്പിക്കാന്‍ ആന കൂടിയേ തീരു എന്ന അവസ്ഥയാണിപ്പോള്‍. എന്നാല്‍ ആനകളെ എഴുന്നളിച്ചുളള പൂരങ്ങള്‍ക്കെതിരെ ഒരു വിഭാഗം വലിയ എതിര്‍പ്പും ഉയര്‍ത്തുന്നുണ്ട്. കടുത്ത ദ്രോഹമാണ് ആനകളോട് കാണിക്കുന്നത്. മണിക്കൂറുകള്‍ ആനയെ നിര്‍ത്തി അവയോട് ക്രൂരത കാട്ടുന്നു. പൂരത്തിനും മറ്റും കൊണ്ടുവരുമ്പോള്‍ അതിനെ ചട്ടം പഠിപ്പിക്കാനെന്ന പേരില്‍ ക്രൂര മര്‍ദ്ദനം, കൂടാതെ നടത്തിക്കുക. ഇതൊക്കെ ആനപ്രേമമല്ല മറിച്ച് ദ്രോഹമാണെന്ന് ഒരുപക്ഷം മുറവിളി ഉയര്‍ത്തുന്നു. ഈ എതിര്‍പ്പുകല്‍ ഒരുവഴിക്ക് ശക്തമാകുമ്പോള്‍ മറുവശത്ത് ആനകള്‍ക്കായുള്ള പിടിവലി.