മുഖ്യമന്ത്രി പിണറായി വിജയന്റെ കുടുംബം നാടിന്റെ ഐശ്വര്യമാണെന്ന് ഇ.പി. ജയരാജന്‍ പറഞ്ഞു. പിണറായിയുടെ കുടുംബത്തെ യു.ഡി.എഫുകാര്‍ വേട്ടയാടുകയാണെന്നും ഇ.പി പറഞ്ഞു. സി.പി.എം സംസ്ഥാന സെക്രട്ടറി എം.വി. ഗോവിന്ദന്‍ നയിക്കുന്ന ജനകീയ പ്രതിരോധ യാത്രയ്ക്ക് തൃശൂര്‍ തേക്കിന്‍കാട് മൈതാനത്ത് നല്‍കിയ സ്വീകരണ യോഗത്തില്‍ പങ്കെടുത്ത് സംസാരിക്കുകയായിരുന്നു അദ്ദേഹം.

ഫെബ്രുവരി 20ന് കാസര്‍കോട്ട് നിന്ന് തുടങ്ങിയ ജനകീയ പ്രതിരോധ യാത്രയില്‍ ആദ്യമായാണ് ഇ.പി. ജയരാജന്‍ പങ്കെടുക്കുന്നത്. താന്‍ ജാഥയില്‍ അംഗമല്ലെന്നും അതിനാല്‍ എന്തുകൊണ്ട് പങ്കെടുത്തില്ല എന്ന ചോദ്യം തന്നെ അപ്രസക്തമാണ് എന്നായിരുന്നു ജയരാജന്‍ നേരത്തെ പ്രതികരിച്ചിരുന്നത്.

മുടി ബോബ് ചെയ്ത് കറുത്ത ഷര്‍ട്ടിട്ട് കറുത്ത തുണിയില്‍ കല്ലുംകെട്ടി അക്രമം നടത്തിയാല്‍ ജനങ്ങള്‍ നേരിടും.കരിങ്കൊടിയുടെ പേരില്‍ മുഖ്യമന്ത്രിയെ ആക്രമിച്ചാല്‍ നോക്കിനില്‍ക്കില്ലെന്നും ഇ.പി. ജയരാജന്‍ പറഞ്ഞു . യു.ഡി.എഫ് നാശത്തിന്റെ കുഴിയാണ് സൃഷ്ടിച്ചത്. നിപയും കൊവിഡും പ്രളയവും വരട്ടെയെന്ന് ആഗ്രഹിച്ച് നടക്കുന്നവരാണ് യു.ഡി.എഫുകാരെന്നും അദ്ദേഹം പരിഹസിച്ചു.