ബ്രഹ്മപുരത്ത് തീയണയ്ക്കാനുള്ള ശ്രമം തുടരുന്നു. തീ ആളികത്തുന്നത് നിയന്തണ വിധേയമായെങ്കിലും മാലിന്യ കൂമ്പാരത്തിന്റെ അടിയില്‍ നിന്ന് തീ പുകയുന്നതാണ് പ്രശ്‌നമെന്ന് കളക്ടര്‍. നേവിയുടെ ഹെലികോപ്റ്റര്‍ എത്തിച്ച് തീയണക്കാനായി ശ്രമിച്ചപ്പോള്‍ താഴെനിന്ന് തീണയ്ക്കാന്‍ പറ്റാത്ത സാഹചര്യമായി. ഈ സാഹചര്യം ആവര്‍ത്തിക്കാതിരിക്കാനായി നിലവില്‍ ഹെലികോപ്റ്ററുകള്‍ എത്തിക്കേണ്ടെന്നാണ് തീരുമാനമെന്ന് വ്യക്തമാക്കി കളക്ടര്‍.
ഇന്ന് ഞായറാഴ്ചയായതിനാല്‍ അത്യാവശ്യ കാര്യങ്ങള്‍ക്കല്ലാതെ ജനങ്ങള്‍ പുറത്തിറങ്ങുന്നത് കഴിയുന്നതും ഒഴിവാക്കുകയും വീടുകളില്‍ തന്നെ കഴിയണമെന്ന് കളക്ടര്‍ പറഞ്ഞു. ആരോഗ്യ സെക്രട്ടറിയുടെ നിര്‍ദേശപ്രകാരമാണ് നടപടി. കടകളും സ്ഥാപങ്ങളും അടച്ചിടാനായി കര്‍ശന നിര്‍ദേശമില്ലെങ്കിലും കഴിയുന്നതും സ്ഥാപനങ്ങള്‍ അടച്ചിടേണ്ടതാണ്. പൊതുജനങ്ങളും സ്ഥാപന ഉടമകള്‍ സഹകരിക്കണമെന്ന് കലക്ടര്‍ വാര്‍ത്താ സമ്മേളനത്തില്‍ പറയുകയുണ്ടായി.

ചീഫ് സെക്രട്ടറിയുടെ അധ്യക്ഷതയില്‍ യോഗം ചേര്‍ന്ന് സാഹചര്യങ്ങള്‍ വിലയിരുത്തുകയും തീയണയ്ക്കല്‍ ശ്രമം നിലവിലെ രീതിയില്‍ തന്നെ തുടരാനാണ് തീരുമാനമായത്.

ഇരുപതോളം ഫയര്‍ എഞ്ചിന്‍ യൂണിറ്റുകള്‍ക്ക് പുറമേ കൂടുതല്‍ ഫയര്‍ എഞ്ചിനുകള്‍ എത്തിക്കുകയും തൊട്ടടുത്തുള്ള പുഴയില്‍ നിന്ന് വെള്ളം പമ്പു ചെയ്യാനായി ശക്കതിയുള്ള പമ്പുകള്‍ ആലപ്പുഴയില്‍ നിന്നെത്തിക്കുകയും ചെയ്യും. അതിനു സഹായത്തിനായി വ്യോമസേനയുടെ കോയമ്പത്തൂര്‍ സ്‌റ്റേഷനുമായി ബന്ധപ്പെടുകയും ആവശ്യമാണെങ്കില്‍ മൂന്നുമണിക്കൂറിനുള്ളില്‍ ഹെലികോപ്റ്ററുകള്‍ എത്തിക്കാമെന്ന് അവര്‍ അറിയിക്കുകയും ചെയ്തിട്ടുണ്ട്.

അതേസമയം തീപിടിത്തവുമായി ബന്ധപ്പെട്ട ആരോഗ്യപ്രശ്‌നങ്ങള്‍ കാരണം ആശുപത്രികളില്‍ ആരും എത്തിയിട്ടില്ലെന്ന് ഡിഎംഒ അറിയിച്ചു. പിഎച്ച്‌സി, ജനറല്‍ ആശുപത്രികളില്‍ സജ്ജീകരണങ്ങള്‍ വര്‍ധിപ്പിക്കാനായി നിര്‍ദേശം നല്‍കിയിട്ടുണ്ട്.


നഗരത്തിലെ മാലിന്യനീക്കം ഇന്ന് വീണ്ടും പുനരാരംഭിക്കുമെന്നും മാലിന്യ നിക്ഷേപത്തിന് മറ്റു സ്ഥലങ്ങള്‍ കണ്ടെത്താന്‍ ശ്രമം തുടങ്ങിയെന്നും കളക്ടര്‍ അറിയിച്ചിട്ടുണ്ട്. പുക ശല്യം നേരിടുന്ന സ്ഥലങ്ങളിലെ കടകള്‍ അടച്ചിടാന്‍ ശ്രമിക്കണമെന്നും മാലിന്യം കത്തിക്കുകയോ തീയിടുകയോ ചെയ്യരുതെന്നും പൊതുജനങ്ങള്‍ക്ക് നിര്‍ദേശം നല്‍കി.