ഇടത് മുന്നണി കണ്‍വീനര്‍ ഇ.പി. ജയരാജന്‍ അവസാനം പാര്‍ട്ടിയുടെ പൊതു പരിപാടിയിലെത്തി. ഇടവേളയ്ക്ക് ശേഷമെത്തിയ ഇപി സിപിഎം നേതാക്കള്‍ക്കെതിരെ ആഞ്ഞടിക്കുമെന്ന് കരുതിയവര്‍ക്ക് തെറ്റി. പിണറായി വിജയനെ വാനോളം പുകഴ്ത്തി. ഫെബ്രുവരി 20-ന് തുടങ്ങിയ യാത്രയില്‍ ഇതാദ്യമായാണ് ഇപി ജയരാജന്‍ പങ്കെടുക്കുന്നത്. പിണറായി വിജയന്റെ കുടുംബം നാടിന്റെ ഐശ്വര്യമാണെന്ന് ഇ.പി ജയരാജന്‍ പറഞ്ഞു.

പിണറായിയുടെ കുടുംബത്തെ യുഡിഎഫുകാര്‍ വേട്ടയാടുകയാണെന്നും നിപയും കോവിഡും പ്രളയവും വരട്ടെയെന്ന് ആഗ്രഹിച്ചു നടക്കുകയാണ് യുഡിഎഫുകാരെന്നും ഇപി ജയരാജന്‍ പറഞ്ഞു. സിപിഎം സംസ്ഥാന സെക്രട്ടറി എം.വി ഗോവിന്ദന്‍ നയിച്ച ജനകീയ പ്രതിരോധ യാത്രയ്ക്ക് തൃശ്ശൂര്‍ തേക്കിന്‍കാട് മൈതാനത്ത് നല്‍കിയ സ്വീകരണയോഗത്തില്‍ പങ്കെടുത്ത് സംസാരിക്കുകയായിരുന്നു ഇപി ജയരാജന്‍.

നിപയും കോവിഡും പ്രളയവും വരട്ടെയെന്ന് ആഗ്രഹിച്ചു നടക്കുന്നവരാണ് യുഡിഎഫുകാര്‍. പിണറായി വിജയന്റെ കുടുംബത്തെ വേട്ടയാടുകയാണ് ഇവര്‍. പിണറായിയുടെ കുടുംബം ഈ നാടിന്റെ ഐശ്വര്യമാണ്. കറുത്ത തുണിയില്‍ കല്ലും കെട്ടി അക്രമത്തിന് തുനിഞ്ഞാല്‍ ജനങ്ങള്‍ നോക്കി നില്‍ക്കില്ല.

മറിയം റഷീദയെയും ഹൗസിയ ഹസനെയും ഉപയോഗിച്ച് നമ്പി നാരായണനെ ജയിലില്‍ അടച്ചവരാണ് കോണ്‍ഗ്രസ്. പിണറായിയെയും ഇടത് പക്ഷത്തെയും കളങ്കപ്പെടുത്താന്‍ മക്കളേ നിങ്ങള്‍ പോരണ്ട....ഇത് കേരളമാണ്. നാശത്തിന്റെ കുഴിയാണ് യുഡിഎഫ് സൃഷ്ടിച്ചത്. ഒരു കുഴല്‍ മാടന്‍ ഇറങ്ങിയിരിക്കുന്നു. എന്തും പറയാമെന്ന് ആരും കരുതേണ്ട. സംസ്ഥാന സര്‍ക്കാര്‍ കടം വാങ്ങിയാല്‍ എന്താ കുഴപ്പം? സംസ്ഥാനം ജപ്തി ചെയ്ത് കൊണ്ടുപോകുമോ. സംസ്ഥാന സര്‍ക്കാരിനെ ആരും ജപ്തി ചെയ്യില്ല.

അടിസ്ഥാന സൗകര്യം വികസിപ്പിച്ച് നാടിനെ അഭിവൃത്തിപ്പെടുത്തി തിരിച്ചു കൊടുക്കും. പത്രക്കാര്‍ എന്നെ അന്വേഷിച്ചു നടക്കുകയായിരുന്നു. എനിക്കിന്ന് ഒരുപാട് പരിപാടികളുണ്ടെങ്കിലും ഞാനിന്ന് ഇവിടെ പ്രത്യക്ഷപ്പെട്ടല്ലോ... എനിക്ക് ആരോഗ്യപ്രശ്‌നങ്ങള്‍ ഉണ്ടായിരുന്നു, എങ്കിലും ഇവിടെ വന്നപ്പോള്‍ പഴയ പല നേതാക്കളെയും കാണാനായി.

സിപിഎം സംസ്ഥാന സെക്രട്ടറി എംവി ഗോവിന്ദന്‍ നയിക്കുന്ന ജനകീയ പ്രതിരോധ യാത്ര തൃശ്ശൂര്‍ ജില്ലയില്‍ പന്ത്രണ്ട് ഇടങ്ങളില്‍ സ്വീകരണം നല്‍കിയിരുന്നു. തുടര്‍ന്ന് വൈകീട്ട് അഞ്ച് മണിക്ക് തേക്കിന്‍കാട് മൈതാനത്ത് നടക്കുന്ന പൊതുസമ്മേളനത്തിലാണ് ഇപി ജയരാജന്‍ എത്തിയത്. കഴിഞ്ഞ മാസം 20ന് കാസര്‍കോട് നിന്ന് തുടങ്ങിയ ജാഥയില്‍ ഇപി ഇതുവരെ പങ്കെടുക്കാത്തിരുന്നത് വലിയ വിവാദമായിരുന്നു.

റിസോര്‍ട്ട് വിവാദത്തില്‍ പാര്‍ട്ടിയോട് അകന്ന ജയരാജന്‍ അതൃപ്തി തുടരുന്നതിന്റെ ഭാഗമായിട്ടാണ് ജാഥയോട് നിസ്സഹകരണം പുലര്‍ത്തിയത്. ഒടുവില്‍ മുഖ്യമന്ത്രി അടക്കം ഇടപെട്ട് നടത്തിയ അനുരജ്ഞന നീക്കത്തിനൊടുവിലാണ് ജാഥയില്‍ ഇപി പങ്കെടുക്കുന്നതെന്നാണ് വിവരം.

അതേസമയം സിപിഎം കേന്ദ്ര കമ്മിറ്റി അംഗവും എല്‍ഡിഎഫ് കണ്‍വീനറുമായ ഇ.പി.ജയരാജന്‍ ജനകീയ പ്രതിരോധ യാത്രയില്‍ പങ്കെടുത്തത് അനുനയ നീക്കത്തിനു പോകേണ്ടതില്ലെന്ന സംസ്ഥാന നേതൃത്വത്തിന്റെ നിലപാടു കാരണമെന്ന വ്യാഖ്യാനവും വന്നു. പാര്‍ട്ടി വേണോ എന്ന് ഇപി സ്വയം തീരുമാനിക്കട്ടെയെന്ന ആലോചനയിലേക്കു നേതൃത്വം നീങ്ങിയതാണു സമ്മര്‍ദമായത്. പിണങ്ങി മാറിനിന്നിട്ടും നേതൃത്വം അവഗണിക്കുകയും അനുനയ നീക്കം നടത്താതിരിക്കുകയും ചെയ്തതോടെ ഭാവി പന്തിയല്ലെന്നു തിരിച്ചറിഞ്ഞാണ് ഇപി മയപ്പെട്ടതെന്നാണു വിവരം.

ജൂനിയറായ എം.വി.ഗോവിന്ദനെ സംസ്ഥാന സെക്രട്ടറിയാക്കിയതില്‍ ഇപിക്കു നീരസമുണ്ടായിരുന്നു. കുടുംബം നടത്തുന്ന ആയുര്‍വേദ റിസോര്‍ട്ടിനെപ്പറ്റി പി.ജയരാജന്‍ ഉന്നയിച്ച പരാതിയില്‍ വിശദീകരണം നല്‍കിയിട്ടും പാര്‍ട്ടി തീരുമാനം പ്രഖ്യാപിക്കാത്തതിലും പരിഭവമുണ്ടായി. ഇതു പ്രകടിപ്പിക്കാനാണ് യാത്രയില്‍ നിന്ന് അദ്ദേഹം വിട്ടുനിന്നത്.