തരൂര് കളംനിറയും... ശശി തരൂര് വിഷയത്തില് പാര്ടി നേതൃത്വത്തെ വെള്ളം കുടിപ്പിച്ച എം കെ രാഘവനെതിരെ നിലപാട് കുടപ്പിക്കാന് വിഡി സതീശനും സുധാകരനും; തരൂരിനൊപ്പം നിന്ന് പരസ്യമായി പാര്ടി നേതൃത്വത്തെ വെല്ലുവിളിച്ചെന്ന് കെപിസിസി നേതൃത്വത്തിന്റെ കുറ്റപത്രം
കഴിഞ്ഞ ലോക്സഭാ തെരഞ്ഞെടുപ്പില് എംകെ രാഘവനെ തോല്പിക്കാന് എതിരാളികള് പഠിച്ച പണി പതിനെട്ടും നോക്കിയതാണ് നടന്നില്ല. അവസാനം ശശി തരൂരിന്റെ വലംകൈയ്യായി നിന്ന് വാര്ത്തകളില് നിറഞ്ഞുനിന്നു. ശശി തരൂര് വിഷയത്തില് പാര്ടി നേതൃത്വത്തെ വെള്ളം കുടിപ്പിച്ച എം കെ രാഘവനെതിരെ കിട്ടിയ അവസരം ഉപയോഗിക്കാന് വി ഡി സതീശനും കെ സുധാകരനും നീക്കം തുടങ്ങി.
തരൂരിനൊപ്പം നിന്ന് ശക്തമായ നിലപാടെടുത്ത് പരസ്യമായി പാര്ടി നേതൃത്വത്തെ വെല്ലുവിളിച്ചെന്നതാണ് എം കെ രാഘവനെതിരെയുള്ള കെപിസിസി നേതൃത്വത്തിന്റെ കുറ്റപത്രം. കോഴിക്കോട് പ്രസംഗത്തിന്റെ പേരില് ഹൈക്കമാന്ഡിനെ ഇടപെടുവിച്ച് നടപടിയെടുക്കാനാണ് ശ്രമം. കോഴിക്കോട് ഡിസിസി രാഘവനെതിരായ റിപ്പോര്ട്ടാണ് കെപിസിസിക്ക് കൈമാറിയത്.
അനവസരത്തില് പാര്ടിയെ വിമര്ശിച്ച് പൊതുജനമധ്യത്തില് നാണംകെടുത്തിയെന്നാണ് ഡിസിസി വിലയിരുത്തല്. പാര്ട്ടിക്കുള്ളില് പറയേണ്ടത് പുറത്തുപറഞ്ഞാല് ശക്തമായ നടപടിയെടുക്കുമെന്ന് എഐസിസി ജനറല് സെക്രട്ടറി കെ സി വേണുഗോപാല് മുന്നറിയിപ്പുനല്കി. കെപിസിസി അധ്യക്ഷനും പ്രതിപക്ഷ നേതാവും ചേര്ന്ന് നടത്തുന്ന പാര്ടി പുനഃസംഘടനയില് ജനാധിപത്യപരമായ ചര്ച്ച നടക്കുന്നില്ലെന്നും അര്ഹരെ പുറത്ത് നിര്ത്തിയിരിക്കുകയാണെന്നുമാണ് എം കെ രാഘവന് കോഴിക്കോട്ട് പറഞ്ഞത്.
രാഘവനെ അനുകൂലിച്ച് കെ മുരളീധരന് രംഗത്തുവന്നു. മിണ്ടാതിരിക്കുന്നവര്ക്കാണ് പാര്ടിയില് പരിഗണന കിട്ടുന്നതെന്ന് അദ്ദേഹം തുറന്നടിച്ചു. എം കെ രാഘവന് എംപി പാര്ടിക്കെതിരെ ഉന്നയിച്ച വിമര്ശം പൊതുവായ വികാരമെന്ന് മുതിര്ന്ന നേതാവ് കെ മുരളീധരന് എംപി പറഞ്ഞു. രാഘവന് പറഞ്ഞത് അച്ചടക്ക ലംഘനമല്ല. തനിക്കും വിമര്ശനങ്ങളുണ്ട്. ഒരു കാര്യവും തന്നോടും ആലോചിക്കാറില്ല. മിണ്ടാതിരിക്കുന്നവര്ക്കാണ് പാര്ടിയില് പരിഗണന കിട്ടുന്നത്. അടിയന്തരമായി രാഷ്ട്രീയകാര്യ സമിതിയോ സംസ്ഥാന എക്സിക്യൂട്ടീവോ വിളിക്കണം.
പരസ്പര ചര്ച്ചകള് പാര്ടിയില് നടക്കുന്നില്ല. 30 അംഗങ്ങളെ മാത്രമേ കെപിസിസി പ്രസിഡന്റിന് നോമിനേറ്റ് ചെയ്യാനാവൂ. എങ്ങനെ 60 ആയെന്ന് അറിയില്ല. രാഘവന്റെ പ്രതികരണവുമായി ബന്ധപ്പെട്ട വിഷയത്തില് കെപിസിസി റിപ്പോര്ട്ട് തേടിയതില് തെറ്റില്ല. എന്നാല്, അതുസംബന്ധിച്ച് ഡിസിസി പ്രസിഡന്റ് കെ പ്രവീണ് കുമാര് പരസ്യ പ്രതികരണം നടത്തിയത് ശരിയല്ലെന്നും മുരളീധരന് മാധ്യമങ്ങളോട് പറഞ്ഞു.
അതേസമയം എം.കെ.രാഘവന് കോണ്ഗ്രസ് പ്ലീനറി സമ്മേളനത്തില് പങ്കെടുത്തിരുന്നെന്നും അഭിപ്രായം അവിടെ പറയണമായിരുന്നെന്നും എഐസിസി ജനറല് സെക്രട്ടറി കെ.സി.വേണുഗോപാല് പറഞ്ഞു. കോണ്ഗ്രസിന്റെ ഹാഥ് സെ ഹാഥ് ജോഡോ അഭിയാന് ജനസമ്പര്ക്ക പരിപാടിയുടെ ഭാഗമായി ജില്ലയില് ഭവനസന്ദര്ശനം നടത്തുകയായിരുന്നു അദ്ദേഹം.
പരസ്യ പ്രതികരണം പാര്ട്ടിക്ക് ഗുണം ചെയ്യില്ല. ആഭ്യന്തര ജനാധിപത്യം ഉറപ്പാക്കുന്ന പാര്ട്ടിയാണ് കോണ്ഗ്രസ്. അഭിപ്രായങ്ങള് പറയേണ്ടത് പാര്ട്ടിക്കുള്ളിലാണ്. ജനാധിപത്യ പാര്ട്ടിയില് വിമര്ശനങ്ങള് സ്വാഭാവികമാണ്. പക്ഷേ, അത് പറയേണ്ടത് പാര്ട്ടിക്കുള്ളിലാണ്.
കേരളത്തില് ബിജെപിക്ക് കിട്ടുന്ന സീറ്റ് സീറോ ആയിരിക്കും. വടക്കു കിഴക്കന് സംസ്ഥാനങ്ങളിലെ വിജയം കണ്ടു കേരളത്തില് അധികാരം കിട്ടുമെന്ന് നരേന്ദ്ര മോദി കരുതുന്നത് കേരളത്തിന്റെ മതനിരപേക്ഷ മനസ്സിനെപ്പറ്റി അറിവില്ലാത്തതു കൊണ്ടാണ്.
അധികാരത്തിലിരിക്കുന്നവരെ വിജയിപ്പിക്കുന്ന ശൈലിയാണ് വടക്ക് കിഴക്കന് സംസ്ഥാനങ്ങളിലേത്. നരേന്ദ്ര മോദിയെ മാതൃകയാക്കുന്ന മുഖ്യമന്ത്രിയാണ് പിണറായി വിജയനെന്നും വേണുഗോപാല് പറഞ്ഞു. മാധ്യമ സ്ഥാപനങ്ങള്ക്കെതിരായ ആക്രമണത്തെ വേണുഗോപാല് വിമര്ശിച്ചു.
"
https://www.facebook.com/Malayalivartha
