മങ്കടയില്‍ മുക്കുപണ്ടം പണയം വെച്ച് ബാങ്കില്‍ നിന്ന് ലക്ഷങ്ങള്‍ തട്ടിയ യുവതിയെ പോലീസ് അറസ്റ്റ് ചെയ്തു. വെള്ളില ആയിരനാഴിപ്പടി പൊട്ടന്‍കണ്ടത്തില്‍ ആമിനയെ(32) യാണ് മങ്കട എസ്.ഐ. ഷിജോ സി. തങ്കച്ചന്റെ നേതൃത്വത്തിലുള്ള പോലീസ് അറസ്റ്റ് ചെയ്തത്.

 കടന്നമണ്ണ സര്‍വീസ് സഹകരണബാങ്ക് കോഴിക്കോട്ടുപറമ്പ് ശാഖ, വെള്ളില വനിതാ ബാങ്ക് എന്നിവിടങ്ങളില്‍നിന്ന് മുക്കുപണ്ടം പണയം വെച്ച് ലക്ഷങ്ങള്‍ തട്ടിയെടുത്ത കേസിലാണ് യുവതിയെ അറസ്റ്റ് ചെയ്തത്.

ആദ്യസമയങ്ങളില്‍ കുടുംബസമേതം വന്ന് യഥാര്‍ഥ സ്വര്‍ണം തന്നെ പണയം വെച്ചും കൃത്യമായി പണം തിരിച്ചടച്ചും ഇവര്‍ ബാങ്കുകളുടെ വിശ്വാസമാര്‍ജിച്ചെടുത്തു. അതിനാല്‍ പിന്നീട് പണയം വെച്ച സമയങ്ങളില്‍ മുഴുവന്‍ പണയവസ്തുക്കളുടെയും കൃത്യമായ പരിശോധന നടന്നിട്ടില്ലായിരുന്നു. വായ്പ തിരിച്ചടയ്ക്കാതായതോടെ പണയവസ്തു ലേലം ചെയ്യാനായി പരിശോധിച്ചപ്പോഴാണ് തട്ടിപ്പ് മനസ്സിലാകുന്നതെന്ന് പോലീസ് .
അതേസമയം ലക്ഷങ്ങള്‍ തട്ടിയെടുത്തശേഷം മുങ്ങിയ പ്രതി പലപ്പോഴും ഫോണുകള്‍ ഉപയോഗിക്കാറില്ല. പിന്നെ വേഷം മാറിയാണ് പല സ്ഥലങ്ങളിലും താമസിക്കുക. ഇത് പോലീസിനെ വല്ലാതെ കുഴക്കിയിരുന്നു. ഒടുവില്‍ രഹസ്യമായി താമസിക്കുന്നിടത്തുനിന്നാണ് ഇവര്‍ പിടിയിലായത്. കോടതിയില്‍ ഹാജരാക്കിയ പ്രതിയെ 14 ദിവസത്തേക്ക് ജുഡീഷ്യല്‍ കസ്റ്റഡിയില്‍ റിമാന്‍ഡിലാക്കി.