സ്‌കൂള്‍ വേനല്വധിയ്ക്കായി അടക്കുന്നതിനു മുമ്പായി തന്നെ പാഠപുസ്തകങ്ങളും യൂണിഫോമും അരിയും ഒന്നിച്ചുനല്‍കി സംസ്ഥാന സര്‍ക്കാര്‍ കുട്ടികള്‍ക്ക് കരുതലായി മാറുന്നു.

മുമ്പ് പാഠപുസ്തകങ്ങള്‍ നേരത്തെ നല്‍കിയിട്ടുണ്ടെങ്കിലും യൂണിഫോമും അരിയുമുള്‍പ്പെടെ ഒന്നിച്ച് സ്‌കൂള്‍ അടയ്ക്കും മുമ്പേ നല്‍കുന്നത് ചരിത്രത്തില്‍ ആദ്യമായാണെന്ന് വിദ്യാഭ്യാസ മന്ത്രി വി ശിവന്‍കുട്ടി വാര്‍ത്താസമ്മേളനത്തില്‍ പറഞ്ഞു. ഒമ്പത്, 10 ക്ലാസുകളിലെ ഒന്നാം വോള്യം പാഠപുസ്തകങ്ങളുടെ അച്ചടി പൂര്‍ത്തിയായി കഴിഞ്ഞു.

സംസ്ഥാനതല വിതരണോദ്ഘാടനം 25ന് പകല്‍ മൂന്നിന് ആലപ്പുഴയില്‍ നടക്കും. 40 ലക്ഷം പാഠപുസ്തകം വിതരണത്തിന് ജില്ലാ ഹബ്ബുകളിലെത്തിച്ചു.
കുടുംബശ്രീ വഴിയാണ് പുസ്തകവിതരണം നടക്കുക. 2023- 24 അധ്യയനവര്‍ഷം മുഴുവന്‍ ക്ലാസുകളിലുമായി 2. 9 കോടി പാഠപുസ്തകമാണ് ആവശ്യമുള്ളത്. മറ്റു ക്ലാസുകളിലെ പുസ്തക അച്ചടി അതിവേഗം പുരോഗമിക്കുകയാണ്. അടുത്ത അധ്യയനവര്‍ഷത്തെ യൂണിഫോമിന് 130 കോടി രൂപ വകയിരുത്തിയിട്ടുണ്ട്. സൗജന്യ കൈത്തറി യൂണിഫോമിനുള്ള 42 ലക്ഷം മീറ്റര്‍ തുണിസജ്ജമാക്കി. 10 ലക്ഷം കുട്ടികള്‍ക്ക് ഇവ ലഭ്യമാകും.

സംസ്ഥാന ഉദ്ഘാടനം 25ന് രാവിലെ 10ന് എറണാകുളത്ത് നടത്തും. യൂണിഫോം ലഭ്യമാകാത്ത കുട്ടികള്‍ക്ക് തുക അനുവദിക്കും. സ്‌കൂള്‍ ഉച്ചഭക്ഷണ പദ്ധതിയിലുള്‍പ്പെട്ട ഒന്നുമുതല്‍ എട്ടുവരെ ക്ലാസിലെ കുട്ടികള്‍ക്ക് മധ്യവേനലവധിക്ക് അഞ്ചുകിലോ അരി വീതം നല്‍കുകയും ചെയ്യും.