തങ്ങളുടെ ബലൂണ്‍ അമേരിക്ക വെടിവച്ചിട്ടതിന് പിന്നാലെ യുദ്ധത്തിനായി അവസരം കാത്തിരിക്കുകയാണ് ചൈന. അതിനിടെ അതിര്‍ത്തിമേഖലകളില്‍ യുദ്ധസജ്ജരായിരിക്കാന്‍ സൈന്യത്തോട് പ്രധാനമന്ത്രി ലീ കെച്യാങ് നിര്‍ദേശിച്ചു.

പ്രസിഡന്റ് ഷി ചിന്‍പിങ്ങിന്റെ മൂന്നാം തുടര്‍ഭരണത്തിന്റെ ഔപചാരിക തുടക്കം പ്രഖ്യാപിച്ച് അവതരിപ്പിച്ച ദേശീയ ബജറ്റില്‍ പ്രതിരോധച്ചെലവ് വര്‍ധിപ്പിച്ചിരിക്കുകയാണ് ചൈന. 10 വര്‍ഷത്തിനുശേഷം സ്ഥാനമൊഴിയുന്ന രീതിയാണു ചൈനീസ് കമ്യൂണിസ്റ്റ് പാര്‍ട്ടിയുടെ കീഴ്വഴക്കമെങ്കിലും ഷി ചിന്‍പിങ്ങിനെ പാര്‍ട്ടിയുടെ പരമോന്നത നേതാവായി തിരഞ്ഞെടുത്ത ചൈനീസ് പാര്‍ട്ടി കോണ്‍ഗ്രസ് കഴിഞ്ഞ ഒക്ടോബറില്‍ മൂന്നാം ഊഴത്തിന് അംഗീകാരം നല്‍കി പാര്‍ട്ടി ഭരണഘടനാഭേദഗതി വരുത്തിയിരുന്നു.

തുടര്‍ച്ചയായി എട്ടാം വര്‍ഷമാണു ചൈന പ്രതിരോധ ബജറ്റ് വര്‍ധിപ്പിക്കുന്നത്. ഈ ബജറ്റില്‍ 7.2% ആണ് വര്‍ധന. അതേ സമയം, 5% ആണ് രാജ്യം ഈ വര്‍ഷം പ്രതീക്ഷിക്കുന്ന വളര്‍ച്ചാനിരക്ക്. ആഭ്യന്തര മാന്ദ്യം നിലനില്‍ക്കെ വളര്‍ച്ചാ നിരക്കില്‍ കുറവ് പ്രതീക്ഷിക്കുമ്പോഴും പ്രതിരോധച്ചെലവു വര്‍ധിപ്പിക്കുന്നത് ആസന്നമായ സൈനികനടപടികള്‍ മുന്നില്‍ക്കണ്ടാണെന്നാണു വിലയിരുത്തല്‍.

സൈനികശേഷി വര്‍ധിപ്പിച്ചും യുദ്ധസജ്ജരായും ഏകോപനം കര്‍ശനമാക്കേണ്ടതുണ്ടെന്ന് പാര്‍ലമെന്റിന്റെ വാര്‍ഷിക പ്രവര്‍ത്തന റിപ്പോര്‍ട്ടില്‍ ലീ കെച്യാങ് വ്യക്തമാക്കി. 10 വര്‍ഷ കാലാവധി പൂര്‍ത്തിയാക്കി പ്രസിഡന്റ് ലീ കെച്യാങ് (67) സ്ഥാനമൊഴിയുമ്പോള്‍ പ്രധാനമന്ത്രി സ്ഥാനത്തേക്ക് ലീ ചിയാങ്ങിനാണു സാധ്യത.

ലോകസാഹചര്യങ്ങളുടെ പശ്ചാത്തലത്തിലാണ് ചൈന പ്രതിരോധ ബജറ്റ് വര്‍ധിപ്പിക്കും. പാര്‍ലമെന്റ് യോഗത്തില്‍ നാഷനല്‍ പീപ്ള്‍സ് കോണ്‍ഗ്രസ് വക്താവ് വാങ് ചാവോ ആണ് ഇതുസംബന്ധിച്ച സൂചന നല്‍കിയത്. സുരക്ഷ വെല്ലുവിളികളും പ്രധാന രാജ്യമെന്ന നിലയിലുള്ള ഉത്തരവാദിത്തവും പരിഗണിച്ച് പ്രതിരോധ ബജറ്റ് വര്‍ധിപ്പിക്കേണ്ടത് അനിവാര്യമാണെന്ന് അദ്ദേഹം പറഞ്ഞു.

ചില രാജ്യങ്ങള്‍ അന്താരാഷ്ട്ര, ആഭ്യന്തര നിയമങ്ങള്‍ പാലിക്കാതെ പരമാധികാരത്തിലേക്ക് കടന്നുകയറുകയാണെന്ന് അമേരിക്കയുടെ പേരുപറയാതെ അദ്ദേഹം സൂചിപ്പിച്ചു. കഴിഞ്ഞ വര്‍ഷം 23,000 കോടി ഡോളറായിരുന്നു ചൈനയുടെ പ്രതിരോധ ബജറ്റ്. 77,700 കോടി ഡോളര്‍ വരുന്ന അമേരിക്കക്കു പിറകില്‍ രണ്ടാമത്തെ വലിയ തുകയാണിത്.

എത്രയാണ് വര്‍ധിപ്പിക്കുകയെന്ന് അദ്ദേഹം വ്യക്തമാക്കിയില്ല. യുക്രെയ്ന്‍ യുദ്ധവും അമേരിക്കയുമായുള്ള കൊമ്പുകോര്‍ക്കലുമാണ് പ്രതിരോധ വിഹിതം വര്‍ധിപ്പിക്കാന്‍ ചൈനയെ പ്രേരിപ്പിക്കുന്നത്. ചൈന രാജ്യം ഈ വര്‍ഷം പ്രതീക്ഷിക്കുന്നത് അഞ്ച് ശതമാനം സാമ്പത്തിക വളര്‍ച്ചയാണ്. പത്തുവര്‍ഷത്തിലെ കുറഞ്ഞ നിരക്കാണിത്.

1.2 കോടി നഗരകേന്ദ്രീകൃത തൊഴില്‍ സൃഷ്ടിക്കാനും പാര്‍ലമെന്റ് യോഗം തീരുമാനിച്ചു. ജി.ഡി.പി കഴിഞ്ഞ വര്‍ഷം മൂന്ന് ശതമാനമാണ് ഉയര്‍ന്നത്. ദശകത്തിലെ കുറഞ്ഞ വളര്‍ച്ച നിരക്കാണിത്. കോവിഡ് നിയന്ത്രണങ്ങളും കയറ്റുമതി കുറഞ്ഞതുമാണ് വളര്‍ച്ച നിരക്ക് കുറയാന്‍ കാരണം.

അമേരിക്കയെ പിന്തള്ളി ഏറ്റവും വലിയ ലോകസാമ്പത്തിക ശക്തിയാവാന്‍ അഭിലാഷമുള്ള ചൈന, കരയിലും കടലിലുമായി 17 രാജ്യങ്ങളുമായാണ് സംഘര്‍ഷഭൂമിക സൃഷ്ടിച്ചിട്ടുള്ളത്. ഭൂപ്രദേശത്തിന് മുകളിലുള്ള അവകാശവാദമുന്നയിക്കുന്നത് സൈനിക ശക്തിയെന്ന നിലയിലെ വിപുലീകരണത്തിനെന്ന് ഒറ്റനോട്ടത്തില്‍ തോന്നാമെങ്കിലും അതില്‍ സാമ്പത്തിക ലക്ഷ്യങ്ങള്‍ കൂടിയുണ്ട്.

പ്രതിവര്‍ഷം അഞ്ച് ട്രില്ല്യണ്‍ ഡോളറിന്റെ വാണിജ്യ ചരക്കുനീക്കം നടക്കുന്ന ദക്ഷിണ ചൈനാ കടലില്‍ തയ്‌വാന്‍, വിയറ്റ്‌നാം, ഫിലിപ്പീന്‍സ്, മലേഷ്യ, ബ്രൂണെ എന്നീ രാജ്യങ്ങള്‍ക്കൊപ്പം ചൈനയും അവകാശവാദം ഉന്നയിക്കുന്നത് മേഖലയില്‍ തര്‍ക്കങ്ങള്‍ക്ക് കാരണമാകുന്നു. കൃത്രിമ ദ്വീപുകള്‍ നിര്‍മിച്ച് സൈനിക താവളങ്ങളുണ്ടാക്കാന്‍ ശ്രമിക്കുന്ന ചൈനയുടെ നോട്ടം പ്രദേശത്തെ എണ്ണ- പ്രകൃതി വാതക നിക്ഷേപത്തിലാണ്.