25,000 രൂപയുടെ കൈക്കൂലി ട്രാപ്പ് കേസില്‍ തിരുവല്ല നഗരസഭാ സെക്രട്ടറിയെയും അസിസ്റ്റന്റിനെയും തലസ്ഥാന വിജിലന്‍സ് കോടതി റിമാന്റ് ചെയ്തു... വിജിലന്‍സ് കൊണ്ടു വന്ന പൊട്ടാസ്യം പെര്‍മാംഗനേറ്റ് ലായനിയില്‍ സെക്രട്ടറിയുടെയും ഒ.എ. യുടെയും കൈവിരലുകള്‍ മുക്കിയപ്പോള്‍ ലായനി പിങ്ക് നിറമായി മാറി. ഇതോടെ കൈക്കൂലി പണമായ കെണിപ്പണം ഇവര്‍ കൈപ്പറ്റിയതായി ശാസ്ത്രീയമായി സ്ഥിരീകരിച്ചു


25,000 രൂപയുടെ കൈക്കൂലി ട്രാപ്പ് കേസില്‍ പത്തനംതിട്ട ജില്ലയിലെ തിരുവല്ല നഗരസഭാ സെക്രട്ടറിയെയും ഓഫീസ് അസിസ്റ്റന്റിനെയും തലസ്ഥാന വിജിലന്‍സ് കോടതി റിമാന്റ് ചെയ്തു.


തിരുവല്ല മുന്‍സിപ്പല്‍ സെക്രട്ടറി അമ്പലപ്പുഴ സദാനന്ദപുരം അനുപമയില്‍ സ്റ്റാലിന്‍ (51), ഓഫീസ് അസിസ്റ്റന്റ് മണ്ണടി പാലവിള കിഴക്കേതില്‍ ഹസീന ബീഗം (42) എന്നിവരെയാണ് റിമാന്റ് ചെയ്തത്. തിരുവനന്തപുരം വിജിലന്‍സ് സ്‌പെഷ്യല്‍ കോടതി ജഡ്ജി രാജകുമാര അവധിയിലായതിനാല്‍ ചുമതല വഹിക്കുന്ന ഒന്നാം അഡീ. ജില്ലാ സെഷന്‍സ് ജഡ്ജി കെ. സനില്‍കുമാറാണ് പ്രതികളെ 14 ദിവസത്തേക്ക് ജുഡീഷ്യല്‍ കസ്റ്റഡിയില്‍ ജയിലിലടച്ചത്.

തിരുവല്ലയിലെ ഖരമാലിന്യ സംസ്‌കരണ യൂണിറ്റിന്റെ ഫിറ്റ്‌നസ് സര്‍ട്ടിഫിക്കറ്റ് പുതുക്കാന്‍ 25000 രൂപ കൈക്കൂലി വാങ്ങുന്നതിനിടെ തിരുവല്ല നഗരസഭാ സെക്രട്ടറിയും ഓഫീസ് അസിസ്റ്റന്റും മാര്‍ച്ച് 3 ന് വിജിലന്‍സിന്റെ പിടിയിലായിരുന്നു.



നഗരസഭയിലെ ഖരമാലിന്യ സംസ്‌കരണ കരാറുകാരനായ ക്രിസ്റ്റഫറില്‍ നിന്ന് കൈക്കൂലി വാങ്ങിയെന്നാണ് കേസ്. അറസ്റ്റിന് പിന്നാലെ ഇവരുടെ വീടുകളിലും വിജിലന്‍സ് പരിശോധന നടത്തിയതില്‍ ഒരേ നമ്പര്‍ പ്ലേറ്റുള്ള രണ്ടു മോട്ടോര്‍ ബൈക്കുകള്‍ സെക്രട്ടറിയുടെ വീട്ടില്‍ നിന്നും കണ്ടെത്തി.

ഫിറ്റ്‌നസ് സര്‍ട്ടിഫിക്കറ്റ് പുതുക്കുന്നതിന് രണ്ടുലക്ഷം രൂപയാണ് സെക്രട്ടറി ക്രിസ്റ്റഫറോട് ആവശ്യപ്പെട്ടത്. ഇതില്‍ 25000 രൂപ ഇന്നലെ അത്യാവശ്യമായി വേണമെന്ന് ശഠിച്ചു. ഇതോടെ ക്രിസ്റ്റഫര്‍ വിജിലന്‍സിനെ സമീപിച്ചു. ഫിനോഫ്തിലിന്‍ പുരട്ടിയ 500 ന്റെ 50 നോട്ടുകള്‍ കേസ് രജിസ്റ്റര്‍ ചെയ്ത ശേഷം നോട്ടു നമ്പരുകള്‍ രേഖപ്പെടുത്തിയ എന്‍ട്രസ്റ്റ്‌മെന്റ് മഹസര്‍ തയ്യാറാക്കി വിജിലന്‍സ് ക്രിസ്റ്റഫറിന്റെ കൈവശം കൊടുത്തുവിട്ടു.


3 ന് വൈകിട്ട് നാലിന് സെക്രട്ടറിയുടെ ഓഫീസിലെത്തി പണം കൈമാറി. സെക്രട്ടറി പണം മേശയിലിട്ടശേഷം ഹസീനയെ വിളിച്ച് കൈമാറി. പണമടങ്ങിയ കവറുമായി ഹസീന പുറത്തേക്ക് ഇറങ്ങുമ്പോഴാണ് വിജിലന്‍സ് പിടികൂടിയത്. സെക്രട്ടറിയുടെ സ്വകാര്യ അക്കൗണ്ടില്‍ നിക്ഷേപിക്കാനാണ് തുക തന്റെ പക്കല്‍ തന്നതെന്ന് ഹസീന വിജിലന്‍സില്‍ മൊഴിനല്‍കി. വിജിലന്‍സ് കൊണ്ടു വന്ന പൊട്ടാസ്യം പെര്‍മാംഗനേറ്റ് ലായനിയില്‍ സെക്രട്ടറിയുടെയും ഒ.എ. യുടെയും കൈവിരലുകള്‍ മുക്കിയപ്പോള്‍ ലായനി പിങ്ക് നിറമായി മാറി. ഇതോടെ കൈക്കൂലി പണമായ കെണിപ്പണം ഇവര്‍ കൈപ്പറ്റിയതായി ശാസ്ത്രീയമായി സ്ഥിരീകരിച്ചു. തുടര്‍ന്ന് ചോദ്യം ചെയ്ത ശേഷം അറസ്റ്റ് രേഖപ്പെടുത്തുകയായിരുന്നു.



രണ്ടു ഗസറ്റഡ് ഉദ്യോഗസ്ഥരെ സാക്ഷികളാക്കിയാണ് ട്രാപ്പും അറസ്റ്റും നടത്തിയത്. പത്തനംതിട്ട സോയില്‍ കണ്‍സര്‍വേഷന്‍ ഓഫീസര്‍ കോശിക്കുഞ്ഞിനെയും തിരുവല്ല മേജര്‍ ഇറിഗേഷന്‍ അസിസ്റ്റന്റ് എന്‍ജിനിയര്‍ സുനിലിനെയും സാക്ഷികളായി ക്രിസ്റ്റഫര്‍ക്കൊപ്പം കൂട്ടിയിരുന്നു. ഇവര്‍ സാധാരണക്കാരെപ്പോലെ പെരുമാറിയതിനാല്‍ സെക്രട്ടറിക്ക് സംശയം തോന്നിയില്ല. വിജിലന്‍സ് ഏതു ഡിപ്പാര്‍ട്ടുമെന്റില്‍ നിന്നും എപ്പോള്‍ ആവശ്യപ്പെട്ടാലും രണ്ട് ഗസറ്റഡ് ഉദ്യോഗസ്ഥരെ വിട്ടു നല്‍കണമെന്ന് വിജിലന്‍സ് സര്‍ക്കുലര്‍ നിലവിലുണ്ട്. പത്തനംതിട്ട വിജിലന്‍സ് ഡിവൈ.എസ്.പി. ഹരി വിദ്യാധരന്റെ നേതൃത്വത്തിലായിരുന്നു അറസ്റ്റ്.