ക്ലാസ് കഴിഞ്ഞ് കൂട്ടുകാരോടൊപ്പം വന്ന പ്ലസ് വണ്‍ വിദ്യാര്‍ത്ഥിനിയ്ക്ക് നേരെ നാലംഗസംഘത്തിന്റെ ആക്രമണം. തിരുവനന്തപുരം ചേങ്കോട്ടുകോണത്ത് വിദ്യാര്‍ത്ഥിനിയ്ക്ക് നേരെയാണ് ആക്രമണമുണ്ടായത്. ഇന്ന് ക്ലാസ് കഴിഞ്ഞ് കൂട്ടുകാരോടൊപ്പം ബസ് സ്‌റ്റോപ്പിലേയ്ക്ക് പോകുമ്പോഴായിരുന്നു സംഭവം.

രണ്ട് ബൈക്കുകളിലായെത്തിയവര്‍ പെണ്‍കുട്ടിയെ കടന്നുപിടിച്ച് മര്‍ദിക്കുകയായിരുന്നു. ആക്രമണത്തില്‍ കുട്ടിയുടെ ചെവിയ്ക്ക് പരിക്കേറ്റിട്ടുണ്ട്. പരിക്കേറ്റ കുട്ടിയെ മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.

ആണ്‍കുട്ടിയാണെന്ന് കരുതി സംഘം പെണ്‍കുട്ടിയുമായി തര്‍ക്കമുണ്ടാക്കുകയും മര്‍ദിക്കുകയും ചെയ്തു. പിന്നീടാണ് പെണ്‍കുട്ടിയാണെന്ന് സംഘം തിരിച്ചറിയുന്നത്. ഉടന്‍ തന്നെ ഇവര്‍ ബൈക്കുമായി കടന്നു കളയുകയായിരുന്നുവെന്ന് പോത്തന്‍കോട് പൊലീസ് പറഞ്ഞു. ബൈക്കുകളുടെ നമ്പര്‍ അടിസ്ഥാനമാക്കി നടത്തിയ അന്വേഷണത്തില്‍ പെണ്‍കുട്ടിയെ ആക്രമിച്ച നാല് പ്രതികളെ പൊലീസ് കസ്റ്റഡിയിലെടുത്തു.