ചാവക്കാട് നഗരസഭയുടെ പകൽവീട് പ്രസക്തി ഗ്രാമീണ വായനശാലക്ക് സമീപം പ്രവർത്തനം ആരംഭിച്ചു. എൻ കെ അക്ബർ എംഎൽഎ പകൽവീടിന്റെ ഉദ്ഘാടനം നിർവഹിച്ചു. നഗരസഭാ ചെയർപേഴ്സൺ ഷീജ പ്രശാന്ത് അധ്യക്ഷത വഹിച്ചു.

പ്രസക്തി ഗ്രാമീണ വായനശാല കെട്ടിടത്തിൽ വായനശാല അധികൃതർ നഗരസഭയ്ക്ക് കൈമാറി നൽകിയ സ്ഥലത്താണ് പകൽവീട് ആരംഭിച്ചത്. പകൽ സമയങ്ങളിൽ വീടുകളിൽ ഒറ്റയ്ക്കാകുന്ന വയോജനങ്ങൾക്ക് വിശ്രമിക്കുന്നതിനും വിനോദങ്ങളിൽ ഏർപ്പെടുന്നതിനും തങ്ങളുടെ വിഷമതകളും സന്തോഷങ്ങളും പങ്കുവയ്ക്കുന്നതിനായി സുരക്ഷിതമായ ഒരിടം എന്ന ലക്ഷ്യത്തോടെയാണ് നഗരസഭ പകൽ വീട് ആരംഭിച്ചത്. നഗരസഭയുടെ 2022- 23 വർഷത്തെ ജനകീയാസൂത്രണ പദ്ധതിയിൽ ഉൾപ്പെടുത്തി 50,000 രൂപ ചിലവഴിച്ച് പകൽ വീട്ടിലേക്ക് ആവശ്യമായ അടുക്കള ഉപകരണങ്ങൾ, ഫർണിച്ചർ, ഇലക്ട്രിക് ഉപകരണങ്ങൾ തുടങ്ങിയവ നഗരസഭ ഒരുക്കി നൽകി. തുടർന്നുള്ള വർഷങ്ങളിൽ കെയർ ടേക്കർ ഉൾപ്പെടെയുള്ള സംവിധാനങ്ങൾ ഒരുക്കി പകൽവീടിന്റെ പ്രവർത്തനം കൂടുതൽ മെച്ചപ്പെടുത്തുന്നതിനാണ് നഗരസഭ ലക്ഷ്യമിടുന്നത്.

നഗരസഭ വൈസ് ചെയർമാൻ കെ കെ മുബാറക്ക്, സ്ഥിരംസമിതി അധ്യക്ഷരായ ഷാഹിന സലീം, അബ്ദുൽ റഷീദ് പി എസ്, ബുഷറ ലത്തീഫ്, മുഹമ്മദ് അൻവർ എ വി, പ്രസന്ന രണദിവെ, കൗൺസിലർമാരായ എം ആർ രാധാകൃഷ്ണൻ, വാർഡ് കൗൺസിലർ രമ്യ ബിനേഷ്, സെക്രട്ടറി കെ ബി വിശ്വനാഥൻ, പ്രസക്തി ഗ്രാമീണ വായനശാല പ്രസിഡന്റ് പത്മജ എസ്, കൗൺസിലർമാർ, ജനപ്രതിനിധികൾ തുടങ്ങിയവർ പങ്കെടുത്തു.