ഈ വര്‍ഷത്തെ എസ്.എസ്.എല്‍.സി പരീക്ഷ ഇന്ന് അവസാനിക്കും. ഒന്നാം ഭാഷ രണ്ടാം ഭാഗമാണ് ഇന്ന് നടക്കുക.ഹയര്‍ സെക്കന്‍ഡറി, വൊക്കേഷണല്‍ ഹയര്‍ സെക്കന്‍ഡറി, ഒന്നു മുതല്‍ ഒമ്പതു വരെയുള്ള സ്‌കൂള്‍ പരീക്ഷകള്‍ എന്നിവ നാളെ (വ്യാഴം) പൂര്‍ത്തിയാകും. 31ന് സ്‌കൂളുകള്‍ മദ്ധ്യവേനലവധിക്കായി അടയ്ക്കും. ജൂണ്‍ ഒന്നിന് തന്നെ പുതിയ അദ്ധ്യയന വര്‍ഷം ആരംഭിക്കും.

മാര്‍ച്ച് ഒമ്പതിന് ആരംഭിച്ച എസ്.എസ്.എല്‍.സി പരീക്ഷ 2,960 സെന്ററുകളിലായി 4,19,362 റഗുലര്‍ വിദ്യാര്‍ത്ഥികളും 192 പ്രൈവറ്റ് വിദ്യാര്‍ത്ഥികളുമാണ് എഴുതിയത്. ഉത്തരക്കടലാസ് മൂല്യനിര്‍ണയം സംസ്ഥാനത്തെ 70 ക്യാമ്പുകളിലായി ഏപ്രില്‍ മൂന്നിന് ആരംഭിക്കും.

18000 അദ്ധ്യാപകരെ ഇതിനായി നിയോഗിച്ചിട്ടുണ്ട്. മൂല്യനിര്‍ണയ ക്യാമ്പുകള്‍ക്ക് സമാന്തരമായി ടാബുലേഷന്‍ പ്രവര്‍ത്തനങ്ങള്‍ക്ക് ഏപ്രില്‍ അഞ്ചു മുതല്‍ പരീക്ഷാഭവനില്‍ തുടക്കമാകും. റിസല്‍ട്ട് മേയ് രണ്ടാം വാരം പ്രഖ്യാപിക്കും.

അതേസമയം പ്ലസ് ടു ബാച്ചുകളുടെ പുനഃക്രമീകരണത്തിനായി റിപ്പോര്‍ട്ട് സമര്‍പ്പിക്കാന്‍ രൂപീകരിച്ച പ്രൊഫ. വി. കാര്‍ത്തികേയന്‍ നായര്‍ കമ്മിറ്റി മേഖലാതലങ്ങളില്‍ നിശ്ചയിച്ചിരുന്ന സിറ്റിംഗ് തീയതിയില്‍ മാറ്റം.

ഏപ്രില്‍ ഒന്നിന് എറണാകുളത്തും മൂന്നിന് തിരുവനന്തപുരത്തും നടത്താനിരുന്ന സിറ്റിംഗുകളാണ് മാറ്റിയത്. തിരുവനന്തപുരം, കൊല്ലം, ആലപ്പുഴ, പത്തനംതിട്ട, ആലപ്പുഴ ജില്ലകള്‍ക്കായി മൂന്നിന് തിരുവനന്തപുരത്തുള്ള സിറ്റിംഗ് നാലിന് അട്ടക്കുളങ്ങരയിലെ സീമാറ്റ് ആസ്ഥാനത്തും പാലക്കാട്, തൃശൂര്‍, എറണാകുളം, കോട്ടയം, ഇടുക്കി ജില്ലകള്‍ക്കായി ഏപ്രില്‍ അഞ്ചിന് എറണാകുളം ഗവ. ഗേള്‍സ് ഹയര്‍സെക്കന്‍ഡറി സ്‌കൂളിലുമായിരിക്കും സിറ്റിംഗ്. കമ്മിറ്റിയുടെ പരിഗണനയ്ക്കായി നിര്‍ദ്ദേശങ്ങളും അഭിപ്രായങ്ങളും അപേക്ഷകളും നല്‍കിയിട്ടുള്ളവര്‍ വരേണ്ടതില്ല.


അതേസമയം ഒന്നാം ക്ലാസ് പ്രവേശനത്തിന് ആറ് വയസാക്കണമെന്ന കേന്ദ്ര നിര്‍ദ്ദേശം സംസ്ഥാനത്ത് നടപ്പാക്കുന്നത് സംബന്ധിച്ച തീരുമാനം ഇന്ന് ചേരുന്ന മന്ത്രിസഭാ യോഗം കൈക്കൊള്ളുമെന്ന് മന്ത്രി വി. ശിവന്‍കുട്ടി വാര്‍ത്താസമ്മേളനത്തില്‍ പറഞ്ഞു.

സര്‍ക്കാര്‍ സ്‌കൂളുകള്‍ ഉള്‍പ്പെടെ ഒട്ടു മിക്ക വിദ്യാലയങ്ങളിലും അടുത്ത അദ്ധ്യയന വര്‍ഷത്തേക്കുള്ള അഡ്മിഷന്‍ ആരംഭിച്ചത് 5 വയസ് വച്ചാണ്. അഞ്ച് വയസെന്ന നിലവിലെ സ്ഥിതി അടുത്ത അദ്ധ്യയന വര്‍ഷം തുടരാനാണ് സാദ്ധ്യത.