സ്കോളര്ഷിപ്പോടെ മികച്ച കോളേജില് പഠനം... വിദ്യാര്ഥികള് അറിയാതെ സ്ഥാപനം ലോണെടുത്തത് രണ്ടര ലക്ഷം മുതല് നാലര ലക്ഷം രൂപ വരെ; കോഴ്സിന് അംഗീകാരമില്ലെന്ന് മനസിലാക്കിയ മലയാളി വിദ്യാര്ഥികള്; പരാതിയില് വഞ്ചനാക്കുറ്റം ചുമത്തി കേസെടുത്തു
സ്കോളര്ഷിപ്പോടെ മികച്ച കോളേജില് പഠനം വാഗ്ദാനം ചെയ്ത ഏജന്സി വഞ്ചിച്ചതായി പരാതി. കര്ണാടകയില് ഏവിയേഷന് കോഴ്സിന് ചേര്ന്ന മലയാളി വിദ്യാര്ഥികളാണ് ചതിക്കുഴിയില് വീണത്. ദേവാമൃത ചാരിറ്റബിള് ട്രസ്റ്റിനെതിരെയാണ് 15 വിദ്യാര്ത്ഥികള് പരാതിയുമായെത്തിയത്. ചാത്തന്നൂര് പൊലീസ് അഞ്ച് പേര്ക്കെതിരെ ജാമ്യമില്ലാ വകുപ്പ് പ്രകാരം കേസെടുത്തു.
തട്ടിപ്പിനിരയായ ഓയൂര് സ്വദേശിയായ വിദ്യാര്ഥി നല്കിയ പരാതിയില് ചാത്തന്നൂര് പൊലീസ് വഞ്ചനാക്കുറ്റം അടക്കം ചുമത്തി കേസെടുത്തു. കുന്നിക്കോട് സ്വദേശി ശ്യാംകുമാ!ര്, ലിജോജോണ് തുടങ്ങീ അഞ്ചുപേര്ക്കെതിരെയാണ് പൊലീസ് കേസ്. ശ്യാം കുമാര് സമാന തട്ടിപ്പ് കേസില് നേരത്തെയും പ്രതി ആയിട്ടുള്ളയാളാണ്. അതേസമയം വിദ്യാര്ഥികളുടെ ആരോപണം തള്ളുകയാണ് ദേവാമൃത ചാരിറ്റബിള് ട്രസ്റ്റ്. ലോണ് തിരിച്ചടയ്ക്കുന്നത് തങ്ങളാണെന്നും വിദ്യാര്ഥികള്ക്ക് ബാധ്യതയുണ്ടാകില്ലെന്നുമാണ് സ്ഥാപനത്തിന്റെ വിശദീകരണം. പ്രശ്നങ്ങള് ചര്ച്ചയിലൂടെ പരിഹരിക്കാന് ശ്രമിക്കുമെന്നും ദേവാമൃത ചാരിറ്റബിള് ട്രസ്റ്റ് അറിയിച്ചു.
സ്കോളര്ഷിപ്പോടെ മികച്ച കോളേജില് പഠനമെന്നായിരുന്നു വാഗ്ദാനം. ഡിഗ്രി പൂര്ത്തിയാക്കിയാല് ഉടന് ജോലിയെന്നും പറഞ്ഞു. കുന്നിക്കോട് സ്വദേശിയായ ശ്യാംകുമാറിന്റെ മോഹന വാഗ്ദാനങ്ങളിലാണ് മലയാളി വിദ്യാര്ഥികള് വീണത്. ശ്യാംകുമാറിന്റെ നേതൃത്വത്തില് ദേവാമൃത ചാരിറ്റബിള് ട്രസ്റ്റ് വിദ്യാര്ത്ഥികളെ എത്തിച്ചത് ഡെക്കാന് കോളേജ് എന്ന നഴ്സിങ് കോളേജിലേക്ക്. ഇവിടുത്തെ ഒരു മുറിയിലാണ് ഏവിയേഷന് ക്ലാസ് തുടങ്ങിയത്. ഇവിടെ കോഴ്സിന് അംഗീകാരമില്ലെന്ന് മനസിലാക്കിയ വിദ്യാര്ഥികള് പ്രശ്നമുണ്ടാക്കി.
ഇതോടെ കര്ണാടക കോളേജ് ഓഫ് മാനേജ്മെന്റ് ആന്റ് സയന്സിലേക്ക് മാറ്റി. സൗകര്യങ്ങളൊന്നുമില്ലാതെ ഹോസ്റ്റലുകളില് ഏജന്സി താമസിപ്പിച്ചു. മൂന്നാം സെമസ്റ്റര് പരീക്ഷയെഴുതാനെത്തിയപ്പോള് മാത്രമാണ് കോളേജില് ഇതുവരെ ഒരു രൂപ പോലും ഏജന്സി അടച്ചിട്ടില്ലെന്ന കാര്യം തിരിച്ചറിഞ്ഞതെന്ന് വിദ്യാര്ഥികള് പറയുന്നു.
ചതിക്കപ്പെട്ടെന്ന് മനസിലാക്കി നില്ക്കുമ്പോഴാണ് ഡല്ഹി ആസ്ഥാനമായി പ്രവര്ത്തിക്കുന്ന സ്വകാര്യ ധനകാര്യ സ്ഥാപനത്തില് നിന്നും ലോണ് തിരിച്ചടയ്ക്കാന് ആവശ്യപ്പെട്ട് വിദ്യാര്ത്ഥികള്ക്ക് നോട്ടീസ് കിട്ടിയത്. രണ്ടര ലക്ഷം മുതല് നാലര ലക്ഷം രൂപ വരെയാണ് വിദ്യാര്ഥികള് അറിയാതെ ഏജന്സി ലോണെടുത്തത്. സ്കോളര്ഷിപ്പ് ശരിയാക്കിക്കൊടുക്കാമെന്ന വ്യാജേന രേഖകളും ഒപ്പുകളും ശേഖരിച്ചാണ് വിദ്യാര്ഥികള് അറിയാതെ സ്ഥാപനം ലോണെടുത്തത്.
https://www.facebook.com/Malayalivartha
