സര്ക്കാര് ജോലി ലഭിക്കാത്തതില് മാനംനൊന്ത് 23 വയസ്സുകാരന് ജീവനൊടുക്കി
സര്ക്കാര് ജോലി ലഭിക്കാത്തതിലുള്ള മാനസികവിഷമത്തെ തുടര്ന്ന് 23 വയസ്സുകാരന് ആത്മഹത്യ ചെയ്തു. ബിടെക് സ്വര്ണ മെഡല് ജേതാവുകൂടിയായ യുവാവാണ് വീടിനുള്ളില് തൂങ്ങിമരിച്ചത്. കാണ്പുര് ഗോവിന്ദ് നഗര് സ്വദേശിയായ ആനന്ദ് ആണ് മരിച്ചത്. ''പപ്പാ, എന്നോട് ക്ഷമിക്കണം. ഒരു സര്ക്കാര് ജോലിക്കായി ഞാന് അമ്പതോളം തവണ ശ്രമിച്ചു, പക്ഷേ വിജയിച്ചില്ല'' – എന്ന് എഴുതിയ ആത്മഹത്യാക്കുറിപ്പ് പൊലീസ് കണ്ടെടുത്തു.
2024ല് കാണ്പുരിലെ പിഎസ്ഐടി എന്ന സ്വകാര്യ എന്ജിനിയറിങ് കോളജില് നിന്ന് ഇലക്ട്രിക്കല് എന്ജിനിയറിങ്ങില് ആനന്ദ് ഒന്നാം റാങ്കോടെയാണ് വിജയിച്ചത്. ഉത്തര്പ്രദേശ് സംസ്ഥാന തലത്തില് മൂന്നാം റാങ്കും ഇദ്ദേഹം സ്വന്തമാക്കിയിരുന്നു. 2024 ഓഗസ്റ്റില് നടന്ന ചടങ്ങില് കോളജ് അധികൃതര് ആനന്ദിന് സ്വര്ണമെഡല് സമ്മാനിക്കുകയും ചെയ്തിരുന്നു. ആനന്ദിന്റെ മൂത്ത സഹോദരന്റെ വിവാഹാലോചനയുമായി ബന്ധപ്പെട്ട് മാതാപിതാക്കള് ബിഹാറിലേക്ക് പോയിരിക്കുകയായിരുന്നു. ഈ സമയം വീട്ടില് തനിച്ചായിരുന്ന ആനന്ദിനെ, വീട്ടുജോലിക്കാരി വന്ന് പലതവണ വിളിച്ചിട്ടും വാതില് തുറക്കാത്തതിനെ തുടര്ന്ന് അയല്ക്കാരെയും പൊലീസിനെയും വിവരം അറിയിക്കുകയായിരുന്നു.
പൊലീസ് എത്തി വാതില് പൊളിച്ച് അകത്തുകടന്നപ്പോഴാണ് ഫാനില് കെട്ടിത്തൂങ്ങിയ നിലയില് മൃതദേഹം കണ്ടെത്തിയത്. ബിടെക് പഠനത്തിനു ശേഷം പവര് ഗ്രിഡില് ഒരു വര്ഷത്തെ അപ്രന്റീഷിപ്പ് ആനന്ദ് പൂര്ത്തിയാക്കിയിരുന്നു. പിന്നീട് വിവിധ മത്സരപരീക്ഷകള്ക്കായി നിരന്തരം തയ്യാറെടുപ്പിലായിരുന്നു. പരീക്ഷകളില് പരാജയപ്പെട്ടതോടെ കഴിഞ്ഞ ഏതാനും മാസങ്ങളായി ആനന്ദ് കടുത്ത മാനസിക സമ്മര്ദ്ദത്തിലായിരുന്നുവെന്ന് പിതാവ് രാജ്കുമാര് പറഞ്ഞു. പൊലീസ് ഇന്ക്വസ്റ്റ് നടപടികള് പൂര്ത്തിയാക്കിയ മൃതദേഹം പോസ്റ്റ്മോര്ട്ടത്തിനു ശേഷം ഭൈരവ് ഘട്ടില് സംസ്കരിച്ചു.
https://www.facebook.com/Malayalivartha
