അനില്‍ ആന്റണി കേരളത്തിലെ കോണ്‍ഗ്രസിനെ സംബന്ധിച്ച് പുച്ഛമായിരിക്കും. പക്ഷേ ദേശീയ തലത്തില്‍ എകെ ആന്റണിയുടെ മകനെന്ന നിലയില്‍ വലിയ സ്വീകാര്യതയാണ് കിട്ടുന്നത്. അതിനാല്‍ കോണ്‍ഗ്രസ് ദേശീയ നേതൃത്വത്തിന് വലിയ നാണക്കേടായി. അതിനിടെ നാലുഭാഗത്ത് നിന്നും കോണ്‍ഗ്രസിനെ ആക്രമിക്കുകയാണ്.

എകെ ആന്റണിയുടെ പ്രസ്താവന ശിരസാ വഹിച്ചാണ് അനില്‍ ആന്റണി ബിജെപിയില്‍ ചേര്‍ന്നതെന്ന് സിപിഎം പിബി അംഗവും സംസ്ഥാന സെക്രട്ടറിയുമായ എംവി ഗോവിന്ദന്റെ പരിഹാസം. രാത്രി ആര്‍എസ്എസ് ആയവര്‍ കോണ്‍ഗ്രസില്‍ വേണ്ടെന്ന ആന്റണിയുടെ പ്രസ്താവന മകന്‍ തന്നെ ശിരസാ വഹിച്ചു.

പകലും രാത്രിയും ബിജെപി ആയി പ്രവര്‍ത്തിക്കാന്‍ അനില്‍ ആന്റണി തീരുമാനിച്ചുവെന്നും എംവി ഗോവിന്ദന്‍ കുറ്റപ്പെടുത്തി. കോണ്‍ഗ്രസിന് അധമ സംസ്‌കാരമാണെന്നാണ് അനില്‍ ആന്റണി പറഞ്ഞത്. രാഹുല്‍ ഗാന്ധിക്കെതിരെയും അനില്‍ ആന്റണി വിമര്‍ശനം ഉന്നയിച്ചു. എന്നാല്‍ പ്രതിപക്ഷ നേതാവ് വിഡി സതീശനും കെപിസിസി അധ്യക്ഷന്‍ കെ സുധാകരനും ഇദ്ദേഹത്തിനെതിരെ ഒന്നും പറഞ്ഞില്ല.

ആര്‍എസ്എസിനെതിരെയും ഇവര്‍ ഒന്നും പറഞ്ഞില്ല. എന്തുകൊണ്ടാണ് ഇങ്ങനെ നിലപാട് സ്വീകരിക്കുന്നതെന്ന് കോണ്‍ഗ്രസുകാര്‍ തന്നെ സംശയിക്കുന്നു. വേണമെങ്കില്‍ ബിജെപിയില്‍ പോകുമെന്ന് പറഞ്ഞ ആളെയാണ് കെപിസിസി പ്രസിഡന്റാക്കിയത്. നെഹ്‌റു ആര്‍എസ്എസുമായി സന്ധി ചെയ്‌തെന്ന് പറഞ്ഞ ആളാണ് കെ സുധാകരനെന്നും അദ്ദേഹം പറഞ്ഞു.

ജനാധിപത്യ സംരക്ഷണത്തിനും രാജ്യത്തെ വീണ്ടെടുക്കുന്നതിനും ഉള്ള കോണ്‍ഗ്രസിന്റെ പരിമിതിയാണ് ഇതിലൂടെ വ്യക്തമാകുന്നത്. രാഹുല്‍ ഗാന്ധിക്കും പ്രതിപക്ഷ നേതാക്കള്‍ക്കും നേരെയുള്ള കേന്ദ്ര സര്‍ക്കാരിന്റെ കടന്നാക്രമണത്തെ ശക്തമായി എതിര്‍ക്കുന്നത് ഇടതുപക്ഷമാണെന്നും എംവി ഗോവിന്ദന്‍ പ്രസ്താവിച്ചു.

മകന്‍ അനില്‍ ആന്റണി ബിജെപിയില്‍ ചേരാനെടുത്ത തീരുമാനം വേദനയുണ്ടാക്കിയെന്ന് മുതിര്‍ന്ന കോണ്‍ഗ്രസ് നേതാവ് എകെ ആന്റണി പറഞ്ഞു. അനിലിന്റേത് തികച്ചും തെറ്റായ തീരുമാനമായിപ്പോയെന്നും അദ്ദേഹം മാധ്യമങ്ങളോട് പ്രതികരിച്ചു. മകന്റെ ബിജെപി പ്രവേശനത്തോട് വളരെ വികാരാധീതനായാണ് ആന്റണി പ്രതികരിച്ചത്. അവസാന ശ്വാസം വരെയും താന്‍ കോണ്‍ഗ്രസുകാരനായിരിക്കുമെന്നും എത്രനാള്‍ ജീവിച്ചിരുന്നാലും താന്‍ ബിജെപിക്കും ആര്‍എസ് എസിനുമെതിരെ ശബ്ദമുയര്‍ത്തുമെന്നും അദ്ദേഹം കൂട്ടിച്ചേര്‍ത്തു.

മോദി സര്‍ക്കാരിന്റെ നയങ്ങളെ വിമര്‍ശിച്ചും ഇന്ദിരാ ഗാന്ധിയെയും കോണ്‍ഗ്രസ് കുടുബത്തോടുമുള്ള ആദരവ് എടുത്തു പറഞ്ഞുമാണ് എകെ ആന്റണി സംസാരിച്ചത്. ഒരു ഘട്ടത്തില്‍ ഇന്ധിരാഗാന്ധിയുമായി താന്‍ അകന്നുവെങ്കിലും പിന്നീട് തിരിച്ച് വന്ന ശേഷം മുമ്പില്ലാത്ത രീതിയില്‍ ആദരവും സ്‌നേഹവുമാണ് അവരോടുണ്ടായിരുന്നത്. ഇന്ത്യന്‍ ഭരണഘടനയുടെ അടിസ്ഥാന മൂല്യം സംരക്ഷിക്കാന്‍ വിട്ടു വീഴ്ചയില്ലാതെ പോരാടിയത് ആ കുടുംബമാണ്. അതിനാല്‍ എന്നും എന്റെ കൂറ് ആ കുടുംബത്തോടായിരിക്കും.

അനില്‍ ആന്റണി ബി.ജെ.പിയില്‍ ചേര്‍ന്നത് കൊണ്ട് കോണ്‍ഗ്രസിന് ഒന്നും സംഭവിക്കില്ലെന്ന് പ്രതിപക്ഷ നേതാവ് വിഡി സതീശന്‍ പറഞ്ഞു. കോണ്‍ഗ്രസിനോ പോക്ഷക സംഘടനകള്‍ക്കോ നേരിട്ടോ അല്ലാതെയോ എന്തെങ്കിലും സേവനങ്ങള്‍ അനില്‍ ആന്റണി ചെയ്തിട്ടില്ല. ഏല്‍പ്പിച്ച ചുമതല പോലും അനില്‍ കൃത്യമായി നിര്‍വഹിച്ചിരുന്നില്ല. അനില്‍ ആന്റണി ബി.ജെ.പിയുടെ കെണിയില്‍ വീഴുകയായിരുന്നു. ബിജെപി ബാന്ധവത്തിന് കാരണമായി തീര്‍ത്തും വിചിത്രമായ കാര്യങ്ങളാണ് അനില്‍ ആന്റണി പറയുന്നത്. അതിന്റെ അപകടം പിന്നാലെ ബോധ്യപ്പെടും. തീര്‍ത്തും അപക്വമായ ഈ തീരുമാനത്തില്‍ അനില്‍ ആന്റണിക്ക് പിന്നീട് ദുഃഖിക്കേണ്ടി വരുമെന്നും സതീശന്‍ പറഞ്ഞു.