മലപ്പുറം താനൂരില്‍ അപകടത്തില്‍പ്പെട്ട ബോട്ടിന്റെ ഉടമയായ നാസര്‍ പോലീസ് പിടിയില്‍. 22 പേരുടെ മരണത്തിന് കാരണമായ അപകടത്തിന് ശേഷം ഒളിവില്‍ പോയ പ്രതിയെ കോഴിക്കോട് നിന്നാണ് അറസ്റ്റ് ചെയ്തത്. ഇയാളെ ഉടനെ തന്നെ താനൂരിലേയ്ക്ക് എത്തിക്കുമെന്നാണ് വിവരം.

നാസറിനെതിരെ ജാമ്യമില്ലാ വകുപ്പനുസരിച്ച് പൊലീസ് കേസെടുത്തു. നരഹത്യയ്ക്കാണ് കേസെടുത്തിരിക്കുന്നത്. നാസറിന്റെ കാര്‍ വാഹനപരിശോധനയ്ക്കിടെ പൊലീസ് നേരത്തെ പിടികൂടിയിരുന്നു. കാറില്‍ നിന്നും നാസറിന്റെ സഹോദരന്‍ സലാം, അയല്‍വാസിയായ മുഹമ്മദ് ഷാഫി എന്നിവരെ പൊലീസ് കസ്റ്റഡിയിലെടുത്തു. ഇവരില്‍ നിന്നും നാസറിന്റെ ഫോണും പൊലീസ് പിടിച്ചെടുത്തിട്ടുണ്ട്.സഹോദരനും അയല്‍ക്കാരനുമല്ലാതെ രണ്ടുപേര്‍ കൂടി കാറിലുണ്ടായിരുന്നതായാണ് വിവരം. ഇവരും കസ്റ്റഡിയിലായി.

അതേസമയം കഴിഞ്ഞ ദിവസം അപകടത്തില്‍പെട്ട ബോട്ട് സുരക്ഷാക്രമീകരണങ്ങളില്‍ ഗുരുതര വീഴ്ച വരുത്തിയതായി കണ്ടെത്തിയിരുന്നു. ബോട്ടിന് ഇന്‍ലാന്‍ഡ് നാവിഗേഷന്‍, തുറമുഖ വകുപ്പ് എന്നിവയുടെ ലൈസന്‍സുണ്ട്. എന്നാല്‍ ഈ ബോട്ട് പൊന്നാനിയിലെ അംഗീകാരമില്ലാത്ത യാര്‍ഡില്‍ വച്ച് രൂപമാറ്റം വരുത്തിയ മീന്‍പിടിത്ത ബോട്ടാണെന്നാണ് സ്ഥലത്ത് രക്ഷാപ്രവര്‍ത്തനത്തിനിറങ്ങിയവരടക്കമുള്ള മത്സ്യ തൊഴിലാളികള്‍ നല്‍കുന്ന സൂചന.

രജിസ്‌ട്രേഷന്‍ നടപടികള്‍ പൂര്‍ത്തിയാകും മുന്‍പ്തന്നെ ബോട്ട് സര്‍വീസിനിറക്കിയിരുന്നു. മാത്രമല്ല അനുവദനീയമായതിന്റെ ഇരട്ടിയോളം പേരെയാണ് അപകടം നടന്ന സമയം യാത്രചെയ്യാന്‍ അനുവദിച്ചത്. ആകെ 37 പേരാണ് ബോട്ടിലുണ്ടായിരുന്നത് എന്നതാണ് ഇപ്പോള്‍ ലഭിക്കുന്ന വിവരം.