തിരുവനന്തപുരം കഴക്കൂട്ടം ടെക്‌നോപാര്‍ക്കില്‍ രാത്രി ജോലി കഴിഞ്ഞ് മടങ്ങുന്ന യുവതികളെ കയറിപ്പിടിച്ച് ആക്രമിക്കുന്ന പ്രതിയെ പിടികൂടി. കാച്ചാണി അയണിക്കാട് വിജി ഭവനില്‍ വിഷ്ണു (33) ആണ് തുമ്ബ പോലീസിന്റെ പിടിയിലായത്. നിരവധി ടെക്കി യുവതികളെയാണ് ഇയാള്‍ ആക്രമിച്ചത്. തുമ്ബ പോലീസ് കസ്റ്റഡിയിലെടുത്ത ഇയാള്‍ക്കെതിരെ മൂന്നു കേസുകളാണ് രജിസ്റ്റര്‍ ചെയ്തത്.പ്രതിയെ കസ്റ്റഡിയില്‍ വാങ്ങുമെന്ന് തുമ്ബ പോലീസ് പറഞ്ഞു. പ്രതി സഞ്ചരിച്ച ബൈക്കും പോലീസ് കസ്റ്റഡിയിലെടുത്തു. വഞ്ചിയൂര്‍ കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

ഒരു മാസം മുന്‍പ് രാതി ഒരു മണിക്ക് ഇന്‍ഫോസിസിനു മുന്നില്‍ വച്ച് ഒരു യുവതിയെ സ്വകാര്യ ഭാഗങ്ങളില്‍ ഇയാള്‍ കടന്നു പിടിച്ചിരുന്നു. കഴക്കൂട്ടം ശ്രീകാര്യം പോലീസ്‌റ്റേഷന്‍ പരിധിയിലും സമാനരീതിയില്‍ ഇയാള്‍ യുവതികളെ ആക്രമിച്ചിട്ടുണ്ട്.

ഡ്രൈവറായ വിഷ്ണു ജോലി കഴിഞ്ഞ് മടങ്ങുന്ന വഴിയിലാണ് പതിവായി യുവതികളെ കടന്നു പിടിച്ചിരുന്നത്. പലരും പരാതി പോലീസില്‍ വിളിച്ചറിയിക്കുമെങ്കിലും തുടര്‍ നടപടികള്‍ക്ക് പോകാറില്ല. പല കോണുകളില്‍ നിന്നും പരാതി ഉയര്‍ന്നെങ്കിലും ആളെ പിടികിട്ടാത്തത് പൊലീസിന് തലവേദനയായിരുന്നു.

ആളെ തിരിച്ചറിയാതിരിക്കാന്‍ ബൈക്കിന്റെ നമ്ബര്‍ പ്ലേറ്റ് ഇളക്കി നമ്ബര്‍ കാണാത്ത വിധം തിരിച്ചു വച്ചാണ് ഇയാള്‍ സഞ്ചരിച്ചിരുന്നത്. യുവതികളെ കടന്നു പിടിച്ച ശേഷം ഒഴിഞ്ഞ സ്ഥലത്തെത്തി നമ്ബര്‍ പ്ലേറ്റ് തിരികെ വച്ച ശേഷം രക്ഷപ്പെടുന്നതാണ് ഇയാളുടെ രീതി.

നിരവധി സംഭവങ്ങള്‍ ഉണ്ടായതോടെ പ്രതി സഞ്ചരിച്ചത് ഹോണ്ട ഡ്രീംസ് ബൈക്കാണെന്ന് തിരിച്ചറിഞ്ഞ പോലീസ് മോട്ടോര്‍ വെഹിക്കിള്‍ ഡിപ്പാര്‍ട്ടുമെന്റിന്റെ സഹായത്തോടെ ഈ തരത്തിലുള്ള ബൈക്ക് ഉടമകളുടെ വിലാസം ശേഖരിച്ച് അന്വേഷണം നടത്തുന്നതിനിടെയാണ് ഇയാള്‍ പിടിയിലായത്.

വെള്ളിയാഴ്ച കുളത്തൂര്‍ ഭാഗത്ത് വച്ച് ഇയാള്‍ ഒരു യുവതിയെ കടന്നു പിടിച്ചിരുന്നു. പോലീസ് സ്ഥലത്തെത്തിയെങ്കിലും ഇയാളെ പിടികൂടാന്‍ കഴിഞ്ഞില്ല. ഒരു മണിക്കൂറിനു ശേഷം വീണ്ടും മറ്റൊരു യുവതിയെ കടന്നു പിടിച്ച ഇയാളെ യുവതിയും നാട്ടുകാരും ചേര്‍ന്ന് തടഞ്ഞുവച്ചതിന് ശേഷം തുമ്ബ പോലീസിനു കൈമാറുകയായിരുന്നു.