കാക്കനാട് പൊലീസ് സ്‌റ്റേഷന് സമീപത്തുള്ള ജിയോ ഇന്‍ഫോടെക് എന്ന സ്വകാര്യ ഐ ടി കമ്പനിയുടെ കെട്ടിടത്തില്‍ തീപിടിത്തം. പൊലീസ് സ്‌റ്റേഷന് എതിര്‍വശത്തുള്ള ബഹുനില മന്ദിരത്തില്‍ പ്രവര്‍ത്തിക്കുന്ന കമ്പനിയില്‍ ഇന്ന് വൈകുന്നേരം ആറ് മണിയോടെയാണ് തീപിടിച്ചത്. കിന്‍ഫ്രാ പാര്‍ക്കിനുള്ളിലാണ് തീപിടിച്ച കമ്പനി സ്ഥിതിചെയ്യുന്നത്. 15 യൂണിറ്റ് ഫയര്‍ഫോഴ്‌സ് സ്ഥലത്തെത്തിയിട്ടുണ്ട്. കെട്ടിടത്തിനുള്ളില്‍ ആളുകള്‍ കുടുങ്ങിക്കിടക്കുന്നതായാണ് വിവരം. പൊള്ളലേറ്റ ജീവനക്കാരെ ആശുപത്രിയിലേയ്ക്ക് മാറ്റി.

20 വര്‍ഷത്തിലധികം പഴക്കമുള്ള കെട്ടിടമാണിത്. ഷോര്‍ട്ട് സര്‍ക്യൂട്ടാണ് അപകടകാരണം എന്നാണ് പ്രാഥമിക നിഗമനം. മൂന്നാം നിലയിലെ ശുചിമുറിയില്‍ നിന്നാണ് തീ കെട്ടിടത്തിലേയ്ക്ക് പടര്‍ന്നതെന്നാണ് ദൃക്‌സാക്ഷികള്‍ അറിയിക്കുന്നത്. തൃക്കാക്കര, ഗാന്ധിനഗര്‍ എന്നിവടങ്ങളില്‍ നിന്നുള്ള ഫയര്‍ഫോഴ്‌സ് യൂണിറ്റെത്തി തീ നിയന്ത്രണ വിധേയമാക്കിയെങ്കിലും പൂര്‍ണമായും അണയ്ക്കാനായിട്ടില്ല.

മൂന്നാം നിലയില്‍ നിന്ന് ഇപ്പോഴും തീ ഉയരുന്നുണ്ട് ഓഫീസിലെ എസികള്‍ പൊട്ടിത്തെറിച്ച് തീ പടരുന്നതായും സംശയമുണ്ട്. കെട്ടിടത്തിന്റെ ഗ്‌ളാസ് വാതില്‍ പൊട്ടിത്തെറിച്ച് ഒരു ഫയര്‍ഫോഴ്‌സ് ഉദ്യോഗസ്ഥന് പരിക്കേറ്റിട്ടുണ്ട്. രണ്ടാം ശനി ആയതിനാല്‍ അധികം ജീവനക്കാര്‍ ഓഫീസിലെത്താതിരുന്നതാണ് അപകടത്തിന്റെ വ്യാപ്തി കുറച്ചത്.