കടത്താന്‍ ശ്രമിച്ചത് 12,000 കോടി രൂപ വിലമതിക്കുന്ന മയക്കുമരുന്ന്...  കൊച്ചിയില്‍ പാക്പൗരന്‍ പിടിയില്‍. 2500 കിലോഗ്രാം മെതാംഫെറ്റാമിന്‍ എന്ന മയക്കുമരുന്ന് നാവിക സേനയും നാര്‍കോട്ടിക് കണ്‍ട്രോള്‍ ബ്യൂറോയും ചേര്‍ന്നാണ് കൊച്ചി തീരത്തുന്നിന്ന് പിടികൂടിയത്. ഇത് കടത്തുകയായിരുന്ന സ്പീഡ് ബോട്ട് ഓടിച്ചിരുന്ന പാകിസ്താനിയെന്ന് സംശയിക്കുന്നയാളെയും പിടികൂടിയിട്ടുണ്ട്.

രാജ്യംകണ്ട ഏറ്റവും വലിയ മയക്കുമരുന്ന് വേട്ടയാണിതെന്ന് മയക്കുമരുന്ന് കടത്ത് കണ്ടെത്താന്‍ ആരംഭിച്ച ഓപറേഷന്‍ സമുദ്രഗുപ്ത് പദ്ധതിയുടെ ഡെപ്യൂട്ടി ഡയറക്ടര്‍ ജനറല്‍ (ഒപറേഷന്‍സ്) സഞ്ജയ് കുമാര്‍ സിങ് വാര്‍ത്തസമ്മേളനത്തില്‍ പറയുകയുണ്ടായി.

കലര്‍പ്പില്ലാത്ത മയക്കുമരുന്ന് പാകിസ്താനില്‍ നിന്ന് ശ്രീലങ്കയിലേക്ക് കടത്തുകയായിരുന്നു എന്നാണ് കരുതുന്നത്. സംഭവത്തില്‍ കൂടുതല്‍ അന്വേഷണം നടത്തിവരുന്നു. നാര്‍കോട്ടിക് കണ്‍ട്രോള്‍ ബ്യൂറോയും (എന്‍.സി.ബി) ഇന്ത്യന്‍ നേവിയും സംയുക്തമായി നടത്തിയ പ്രവര്‍ത്തന ഫലമായാണ് ഇത്രയും വലിയ മയക്കുമരുന്ന് ശേഖരം പിടികൂടാനായതെന്ന് സഞ്ജയ് കുമാര്‍ സിങ് . പാകിസ്താനിലെ മക്രാന്‍ തീരത്തുനിന്ന് വന്‍തോതില്‍ മെതാംഫെറ്റാമിന്‍ വഹിച്ച് കപ്പല്‍ പുറപ്പെട്ടതായി വിവരം ലഭിച്ചിരുന്നു.

ഇതനുസരിച്ചാണ് സൂക്ഷ്മ നിരീക്ഷണം ഏര്‍പ്പെടുത്തിയത്. കപ്പല്‍ പോകാന്‍ സാധ്യതയുള്ള റൂട്ട് തിരിച്ചറിയാന്‍ സാധിച്ചു. അതനുസരിച്ച് നാവികസേനയും നാവിക കപ്പലും സംയുക്തമായി നടത്തിയ തിരച്ചിലിലാണ് കപ്പല്‍ കണ്ടെത്താന്‍ കഴിഞ്ഞത്. അതില്‍ നിന്ന് 134 ചാക്ക് മെതാംഫെറ്റാമിനാണ് കണ്ടെടുത്തത്. കപ്പലില്‍നിന്ന് കണ്ടെടുത്ത ചാക്കുകെട്ടുകളും മറ്റ് ചില വസ്തുക്കളും ശനിയാഴ്ച കൊച്ചി മട്ടാഞ്ചേരി വാര്‍ഫില്‍ എത്തിച്ച് നാര്‍കോട്ടിക് ബ്യൂറോക്ക് കൈമാറുകയും ചെയ്തു.