കര്‍ണാടക തെരഞ്ഞെടുപ്പോടെ ഒരു ത്രിമെന്‍ ആര്‍മിക്കാണ് തുടക്കമായത്. ദക്ഷിണേന്ത്യയില്‍ ബിജെപിയുടെ സമ്പൂര്‍ണ പതനം പിണറായിയ്ക്കും സ്റ്റാലിനും സിദ്ധരാമയ്യയ്ക്കും കരുത്താകുമെന്ന കാര്യത്തില്‍ തര്‍ക്കം വേണ്ട. വരുന്ന ലോക്‌സഭാ തെരഞ്ഞെടുപ്പില്‍ നിര്‍ണായക ശക്തികളായി ഇവര്‍ മാറും. ഗവര്‍ണര്‍മാര്‍ ഉണ്ടാക്കുന്ന തലവേദന ഇനി കര്‍ണാടകയിലും കാണാം.

ദ്രാവിഡ മണ്ണിനെ ബിജെപി മുക്തമാക്കാനായത് 2024 ലോക്‌സഭാ തിരഞ്ഞെടുപ്പിന്റെ തുടക്കമെന്ന് തമിഴ്നാട് മുഖ്യമന്ത്രി എം.കെ.സ്റ്റാലിന്‍ പറഞ്ഞു. 'കോണ്‍ഗ്രസിന്റെ വിജയം സമാനസ്വഭാവമുള്ള രാഷ്ട്രീയ പാര്‍ട്ടികള്‍ ഒത്തൊരുമിച്ച് പ്രവര്‍ത്തിക്കണമെന്ന സന്ദേശമാണ് നല്‍കുന്നത്. രാഹുല്‍ ഗാന്ധിയുടെ എംപി സ്ഥാനം അയോഗ്യമാക്കുക, രാജ്യത്ത് ഹിന്ദി അടിച്ചേല്‍പ്പിക്കുക, എതിരാളികളെ അന്വേഷണ ഏജന്‍സികളെ ഉപയോഗിച്ച് അടിച്ചമര്‍ത്തുക, ജനങ്ങളെ കൊള്ളയടിക്കുന്ന അഴിമതി എന്നിവയ്‌ക്കെതിരെയുള്ള വിധിയെഴുത്താണ് കോണ്‍ഗ്രസിന്റെ വിജയം. കന്നഡിഗര്‍ അവരുടെ അഭിമാനം തിരഞ്ഞെടുപ്പില്‍ ഉയര്‍ത്തിപ്പിടിച്ചു എന്നും എം.കെ.സ്റ്റാലിന്‍ പറഞ്ഞു.

കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖര്‍ഗെ, മുതിര്‍ന്ന നേതാക്കളായ സോണിയ ഗാന്ധി, രാഹുല്‍ ഗാന്ധി,സിദ്ധരാമയ്യ,ഡി.കെ.ശിവകുമാര്‍ എന്നിവരെ ഫോണില്‍ വിളിച്ച് എം.കെ.സ്റ്റാലിന്‍ അഭിനന്ദിച്ചു. കര്‍ണാടക ഹിന്ദുത്വ ലാബോറട്ടറിയാക്കാനുള്ള ശ്രമങ്ങള്‍ക്കാണ് തിരിച്ചടിയേറ്റതെന്ന് എംഡിഎംകെ അധ്യക്ഷന്‍ വൈകോ പ്രതികരിച്ചു.

മക്കള്‍ നീതി മയ്യം പ്രസിഡന്റ് നടന്‍ കമല്‍ഹാസനും രാഹുല്‍ ഗാന്ധിയെ ട്വിറ്ററിലൂടെ അഭിനന്ദനം അറിയിച്ചു. മഹാത്മാ ഗാന്ധിയെപ്പോലെ, രാഹുല്‍ ഗാന്ധിയും ജനങ്ങളുടെ ഹൃദയത്തിലേക്ക് നടന്നു കയറി. രാഹുല്‍ ഗാന്ധിയെ വിശ്വസിച്ചാണ്, ജനങ്ങള്‍ കോണ്‍ഗ്രസിന് വോട്ടു ചെയ്തതെന്നും അദ്ദേഹം പറഞ്ഞു.

ജനവിരുദ്ധ നയങ്ങള്‍ക്കെതിരെ രാജ്യത്ത് ഉയര്‍ന്നുവന്ന ജനവിധിയാണ് കര്‍ണാടകയിലേതെന്ന് മുഖ്യമന്ത്രി പിണറായി വിജയന്‍ പറഞ്ഞു. തെക്കേഇന്ത്യയില്‍ ബിജെപി ഒരിടത്തും ഇല്ലാത്ത ദിവസമാണ്. ബിജെപി തോല്‍വിയുമായി പൊരുത്തപ്പെട്ടിട്ടില്ല. ബിജെപിയെ അധികാരത്തില്‍നിന്ന് മാറ്റിനിര്‍ത്തുക എന്നതാവണം ലക്ഷ്യം. കോണ്‍ഗ്രസ് പാഠങ്ങള്‍ ഉള്‍ക്കൊണ്ട് മുന്നോട്ട് പോകണം. നേരത്തെ ഉണ്ടായ കാര്യങ്ങള്‍ ആവര്‍ത്തിക്കരുത്.

കോണ്‍ഗ്രസ് കുറേക്കാലം ഒറ്റയ്ക്ക് രാജ്യം ഭരിച്ചതാണ്. ഇനി അതിനാകില്ലെന്ന് എല്ലാവര്‍ക്കും അറിയാമെങ്കിലും ഓരോ സംസ്ഥാനത്തെയും ബിജെപി വിരുദ്ധ വോട്ടുകള്‍ എകീകരിക്കാന്‍ കോണ്‍ഗ്രസ് തയാറാകണമെന്നും പിണറായി വിജയന്‍ പറഞ്ഞു.

അതേസമയം ദക്ഷിണേന്ത്യ 2024 ലെ ലോക്‌സഭാ തിരഞ്ഞെടുപ്പില്‍ പിടിച്ചെടുക്കണമെന്ന ബിജെപിയുടെ സ്വപ്നങ്ങള്‍ക്ക് കിട്ടിയത് വലിയ തിരിച്ചടിയാണ്. കേന്ദ്രഭരണപ്രദേശമായ പുതുച്ചേരിയിലെ ഭരണം മാത്രമാണ് ദക്ഷിണേന്ത്യയില്‍ ഇനി പാര്‍ട്ടിയുടെ കൈവശമുള്ളത്. തെലങ്കാനയിലെ സാധ്യതകളെ കര്‍ണാടകയിലെ പരാജയം സ്വാധീനിക്കുമോ എന്നു പറയാറായിട്ടില്ലെങ്കിലും ഉത്തരേന്ത്യയില്‍ ബിജെപിക്കു വന്‍ ജയം സമ്മാനിക്കുന്ന 'മോദി മാജിക്' ദക്ഷിണേന്ത്യയില്‍ പറയത്തക്ക ഫലം ചെയ്യുന്നില്ല എന്നു വ്യക്തമായി.

ഇത് കേരളത്തിലടക്കം ബിജെപിയുടെ തന്ത്രങ്ങളെ സ്വാധീനിച്ചേക്കും. രാഹുല്‍ ഗാന്ധിയുടെ പാര്‍ലമെന്റ് അംഗത്വ അയോഗ്യത വിഷയത്തില്‍ ദക്ഷിണേന്ത്യയിലെ പ്രധാന പ്രതിപക്ഷ പാര്‍ട്ടികളെല്ലാം കോണ്‍ഗ്രസിനൊപ്പമാണു നിന്നത്. ഈ സമീപനം പാര്‍ലമെന്റ് തിരഞ്ഞെടുപ്പിലും തുടര്‍ന്നാല്‍ ബിജെപിയുടെ മോഹങ്ങള്‍ക്ക് വലിയ ദോഷം ചെയ്യും.

2019 ല്‍ ആന്ധ്ര, കര്‍ണാടക, കേരളം, തമിഴ്‌നാട്, തെലങ്കാന, പുതുച്ചേരി എന്നിവിടങ്ങളിലെ 130 പാര്‍ലമെന്റ് സീറ്റുകളില്‍ 29 എണ്ണമാണ് ബിജെപിക്കു ലഭിച്ചത്. അതില്‍ 25 എണ്ണവും കര്‍ണാടകയില്‍ നിന്നായിരുന്നു. നിയമസഭാ തിരഞ്ഞെടുപ്പിലെ വിരുദ്ധ വികാരം അടുത്ത വര്‍ഷവും തുടര്‍ന്നാല്‍ കര്‍ണാടകയില്‍ സീറ്റുകള്‍ കുറഞ്ഞേക്കാം. യുപിയും ഗുജറാത്തും കൊണ്ടു മാത്രം അടുത്ത തവണ വലിയ ഭൂരിപക്ഷം പിടിക്കാമെന്ന് പാര്‍ട്ടി കരുതുന്നുമില്ല. ബിജെപിക്കുള്ള മണ്ണ് ഇപ്പോഴും ദക്ഷിണേന്ത്യയില്‍ ഒരുങ്ങിയിട്ടില്ലെന്നാണ് കര്‍ണാടക നല്‍കുന്ന പാഠങ്ങളില്‍ മുഖ്യം.