അപ്രതീക്ഷിത വേര്‍പാട്.... പണം വച്ച് ചീട്ടുകളിച്ച അന്യസംസ്ഥാന തൊഴിലാളികളെ പിടിക്കാനെത്തിയ എസ്.ഐയ്ക്ക് കെട്ടിടത്തിന്റെ മൂന്നാം നിലയില്‍ നിന്ന് വീണ് ദാരുണാന്ത്യം.
പാലാ രാമപുരം പൊലീസ് സ്റ്റേഷനിലെ എസ്.ഐ പൊന്‍കുന്നം ഇരുപതാംമൈല്‍ വാഴേപ്പറമ്പില്‍ ജോബി ജോര്‍ജാണ് (52) ദാരുണമായി മരിച്ചത്. ശനിയാഴ്ച രാത്രി 11ന് രാമപുരം ബസ് സ്റ്റാന്‍ഡിന് സമീപത്തെ ആനത്താരയ്ക്കല്‍ ബില്‍ഡിംഗ്‌സിലായിരുന്നു സംഭവം നടന്നത്. ഇവിടെ ഇരുപതോളം അന്യസംസ്ഥാന തൊഴിലാളികള്‍ വാടകയ്ക്ക് താമസിക്കുന്നുണ്ട്.


മൂന്നാം നിലയില്‍ പണം വച്ച് ചീട്ടുകളിയും മദ്യപാനവുമുണ്ടെന്നും ശല്യം കാരണം ഉറങ്ങാനാകുന്നില്ലെന്നും കാണിച്ച് ഇവിടെ താമസിക്കുന്ന പുനീത് കുമാര്‍ ശനിയാഴ്ച രാത്രി പൊലീസ് സ്റ്റേഷനില്‍ പരാതി നല്‍കിയിട്ടുണ്ടായിരുന്നു. ഈ സമയം എസ്.ഐ ജോബിയും സി.പി.ഒ വിനീത് രാജും നൈറ്റ് പട്രോളിംഗിന് ഇറങ്ങാന്‍ തുടങ്ങുകയായിരുന്നു.

തുടര്‍ന്ന് ജോബി വിനീതിനെയും കൂട്ടി ആനത്താരയ്ക്കല്‍ ബില്‍ഡിംഗിലെത്തി. പൊലീസിനെ കണ്ടതോടെ ചിതറിയോടിയ തൊഴിലാളികള്‍ മുറികളില്‍ കയറി വാതിലടച്ചു. പല തവണ ആവശ്യപ്പെട്ടിട്ടും തുറക്കാതിരുന്നതോടെ ജോബി ചവിട്ടിത്തുറക്കാനായി ശ്രമിച്ചപ്പോള്‍ ബാലന്‍സ് തെറ്റി പിന്നോട്ട് മറിഞ്ഞ് ചെറിയ പാരപ്പറ്റ് മാത്രമുള്ള മൂന്നാം നിലയില്‍ നിന്ന് വീഴുകയായിരുന്നു. താഴെയുള്ള രണ്ട് കൂര്‍ത്ത ഭിത്തികളില്‍ ദേഹമിടിച്ചാണ് താഴേക്ക് വീണത്.


ഗുരുതരമായി പരിക്കേറ്റ ജോബിയെ വിനീത് രാജ് എഴുന്നേല്‍പ്പിക്കാനായി ശ്രമിച്ചെങ്കിലും കഴിഞ്ഞില്ല. വിനീത് അറിയിച്ചതിനെ തുടര്‍ന്ന് രാമപുരം എസ്.എച്ച്.ഒയുടെ ചുമതലയുള്ള എസ്.ഐ വിഷ്ണുവും മറ്റൊരു പൊലീസുകാരന്‍ ലാലുവും കൂടിയെത്തി ജോബിയെ ജീപ്പില്‍ ആശുപത്രിയിലെത്തിച്ചു.

പാലാ ജനറല്‍ ആശുപത്രിയിലും തുടര്‍ന്ന് രാത്രി 12 മണിയോടെ ചേര്‍പ്പുങ്കല്‍ മാര്‍ സ്ലീവാ മെഡിസിറ്റിയിലും എത്തിച്ചെങ്കിലും ഇന്നലെ പുലര്‍ച്ചെ 1.50ന് മരിച്ചു. തലയ്ക്ക് പിന്നില്‍ മൂന്ന് സെന്റീ മീറ്റര്‍ ആഴത്തിലുള്ള മുറിവും നട്ടെല്ലിനും നെഞ്ചിലെ അസ്ഥികള്‍ക്കും പൊട്ടലുമുണ്ടായിരുന്നു. മൃതദേഹം കോട്ടയം മെഡിക്കല്‍ കോളേജ് ആശുപത്രി മോര്‍ച്ചറിയിലാണ് ഭാര്യ: ബിന്ദു. ഒരു മകളുണ്ട്. സംസ്‌കാരം നാളെ രാവിലെ 11ന് പൊന്‍കുന്നം തിരുകുടുംബ ദേവാലയ സെമിത്തേരിയില്‍ നടക്കും.