ഇടവമാസ പൂജകള്‍ക്കായി നടതുറന്ന ശബരിമലയില്‍ വന്‍ ഭക്തജനത്തിരക്ക്. ഇന്നലെ വൈകിട്ട് 5ന് തന്ത്രി കണ്ഠരര് മഹേഷ് മോഹനരുടെ സാന്നിദ്ധ്യത്തില്‍ മേല്‍ശാന്തി വി.ജയരാമന്‍ നമ്പൂതിരി ശ്രീകോവില്‍ നടതുറന്ന് ശ്രീലകത്ത് ദീപം തെളിച്ചു.

തുടര്‍ന്ന് മേല്‍ശാന്തി പതിനെട്ടാംപടി ഇറങ്ങി തിരുമുറ്റത്തെ ഹോമകുണ്ഡത്തില്‍ അഗ്‌നി പകര്‍ന്നു. മാളികപ്പുറം ക്ഷേത്രനട മേല്‍ശാന്തി ഹരിഹരന്‍ നമ്പൂതിരി തുറന്നു. തുടര്‍ന്ന് ഭക്തര്‍ക്ക് മഞ്ഞള്‍പ്രസാദം വിതരണം ചെയ്തു. ഇന്നലെ പ്രത്യേക പൂജകള്‍ ഉണ്ടായിരുന്നില്ല.

ഇന്ന് ഇടവമാസ പൂജകള്‍ ആരംഭിക്കും. രാവിലെ 4.30ന് പളളിയുണര്‍ത്തല്‍, 5ന് നടതുറപ്പ്, നിര്‍മ്മാല്യ ദര്‍ശനം, പതിവ് അഭിഷേകം. 5.30 ന് മഹാഗണപതിഹോമം, നെയ്യഭിഷേകം, അഷ്ടാഭിഷേകം, 7.30ന് ഉഷപൂജ, ഉദയാസ്തമയപൂജ, 25കലശാഭിഷേകം, കളഭാഭിഷേകം, പടിപൂജ, പുഷ്പാഭിഷേകം എന്നിവ നടക്കും.

വെര്‍ച്വല്‍ ക്യൂവിലൂടെ ബുക്ക് ചെയ്തും നിലക്കല്‍, പമ്പ എന്നിവിടങ്ങളില്‍ സ്പോട്ട് ബുക്ക് ചെയ്തും ദര്‍ശനം നടത്താന്‍ കഴിയുന്നതാണ്്. 19ന് രാത്രി 10ന് നടഅടയ്ക്കും. പ്രതിഷ്ഠാദിന പൂജകള്‍ക്കായി 29ന് വൈകുന്നേരം 5ന് നടതുറക്കും. പ്രതിഷ്ഠാദിനം 30നാണ് .