'നിര്മാല്യം' സിനിമയില് പാടിയ പാട്ടിന് 50 വയസ്സും ഗായികയ്ക്ക് 80 വയസ്സും .... സുകുമാരി നരേന്ദ്രമേനോന്റെ അശീതി ആഘോഷിച്ച് നാട്
'നിര്മാല്യം' സിനിമയില് പാടിയ പാട്ടിന് 50 വയസ്സും ഗായികയ്ക്ക് 80 വയസ്സും .... സുകുമാരി നരേന്ദ്രമേനോന്റെ അശീതി ആഘോഷിച്ച് നാട്
'അഷ്ട ദശാബ്ദി അഭിവന്ദനം' എന്ന പേരില് ലെക്കിടി യുണൈറ്റഡ് കണ്വന്ഷന് സെന്ററില് നടന്ന പിറന്നാള് ആഘോഷം ഉദ്ഘാടനം ചെയ്ത് കോട്ടക്കല് ആര്യവൈദ്യശാല മാനേജിങ് ട്രസ്റ്റി ഡോ. പി മാധവന് കുട്ടിവാര്യര്. അധ്യക്ഷനായി ഡോ. കെ എസ് മേനോന് . സ്വാമി സുനില്ദാസ്, സ്വാമി പ്രഭാകരാനന്ദ സരസ്വതി, സുകുമാരി നരേന്ദ്രമേനോന്, ഇ പി ചിത്രേഷ് നായര്, എന് പ്രദീപ് എന്നിവര് സംസാരിച്ചു.
ഇതേ തുടര്ന്ന് വിവിധ കലാപരിപാടികളും ഉണ്ടായിരുന്നു. എം ടി വാസുദേവന് നായര് എഴുതി സംവിധാനം ചെയ്ത നിര്മാല്യം എന്ന സിനിമയില് പനിമതി മുഖി ബാലേ..' എന്നു തുടങ്ങുന്ന സ്വാതിതിരുനാള് പദം പാടിയിട്ടുണ്ട്. പിന്നീട് അവസരം കിട്ടിയിട്ടും സിനിമയില് പാടാനായി പോയില്ല.
ചെമ്പൈ വൈദ്യനാഥ ഭാഗവതര് 'ഗാനകല്ലോലിനി' എന്ന വിശേഷണം നല്കിയ ശിഷ്യയാണ് സുകുമാരി. ദൂരദര്ശനിലും സ്വകാര്യ ചാനലുകളിലും രാഷ്ട്രപതിഭവന് ഉള്പ്പെടെ രാജ്യത്തിനകത്ത് ഒട്ടേറെ വേദികളിലും യുഎസ്, യുകെ, ഫ്രാന്സ്, നൈജീരിയ, യുഎഇ, ഖത്തര്, ബഹ്റൈന്, മലേഷ്യ, മൗറിഷ്യസ്, സിംഗപ്പുര്, ശ്രീലങ്ക എന്നിവിടങ്ങളിലുമായി ഒട്ടേറെ കച്ചേരികള് അവതരിപ്പിച്ചിട്ടുണ്ട്.
പുലാപ്പറ്റ കുതിരവട്ടത്തുകോട്ടയില് രാമവര്മ തമ്പാന്റെയും മണ്ണൂര് നായര് സ്വരൂപത്തില് ചിന്നമണി നേത്യാരുടെയും മകളാണ് സുകുമാരി. സംഗീത പഠനം ആറാം വയസ്സിലാണ് തുടങ്ങിയത്. ആദ്യഗുരു അമ്മയായിരുന്നു. പിന്നീട് പി ആര് സുബ്രഹ്മണ്യ അയ്യരുടെ കീഴില് പരിശീലനം നേടി. ഒമ്പത് വയസ്സുമുതല് കച്ചേരി അവതരിപ്പിക്കാനും തുടങ്ങി.
പത്തിരിപ്പാല ഗവ. ഹൈസ്കൂളില്നിന്ന് പത്താം ക്ലാസ് പൂര്ത്തിയാക്കിയശേഷം മദ്രാസിലെ സെന്ട്രല് കോളേജ് ഓഫ് കര്ണാട്ടിക് മ്യൂസിക്കില് നിന്ന് 'സംഗീതവിദ്വാന്' ബിരുദം നേടുകയും ചെയ്തു. കേരള കലാമണ്ഡലത്തില് സംഗീതാധ്യാപികയായിരുന്ന കാലത്താണ് എം ടി ആവശ്യപ്പെട്ടതുപ്രകാരം നിര്മാല്യത്തിലെ പാട്ട് പാടിയത്.
കവിയും അഭിഭാഷകനുമായ പി ടി നരേന്ദ്രമേനോനാണ് ഭര്ത്താവ്. വിവാഹശേഷം കലാമണ്ഡലത്തിലെ ജോലിരാജി വച്ചെങ്കിലും വിസിറ്റിങ് പ്രൊഫസറായും മ്യൂസിക് എക്സാമിനറായും സേവനം തുടരുകയായിരുന്നു.
https://www.facebook.com/Malayalivartha
