സംസ്ഥാനത്ത് ഒരാഴ്ചയ്ക്കിടെ റേഷന്‍ വാങ്ങാന്‍ എത്തിയ 1.89 ലക്ഷം കാര്‍ഡ് ഉടമകളുടെ ബയോമെട്രിക് വിവരശേഖരണം പരാജയപ്പെട്ടു. കടകളിലെ ഇലക്ട്രോണിക് പോയിന്റ് ഓഫ് സെയില്‍ (ഇ പോസ്) യന്ത്രങ്ങളില്‍ വിരല്‍ പതിപ്പിച്ചെങ്കിലും സംവിധാനത്തിലെ സാങ്കേതികത്തകരാറാണു പരാജയപ്പെടാന്‍ കാരണമായി തീര്‍ന്നത്. ഇവരുടെ റജിസ്റ്റര്‍ ചെയ്ത മൊബൈല്‍ ഫോണ്‍ വഴി ലഭിച്ച ഒടിപി നമ്പര്‍ ഉപയോഗിച്ചാണു പിന്നീടു വിതരണം നടത്തിയത്.

ഈ മാസം ഇതു വരെ 17.82 ലക്ഷം പേര്‍ റേഷന്‍ വാങ്ങിയപ്പോഴാണ് 1.89 ലക്ഷം പേര്‍ക്ക് ഒടിപി സംവിധാനത്തെ ആശ്രയിക്കേണ്ടി വന്നത്. ഇതില്‍ പകുതിയും കഴിഞ്ഞ ശനിയാഴ്ചയായിരുന്നു.

രണ്ടാം ശനിയാഴ്ചയും പൊതു അവധിയും ആയതിനാല്‍ നീല, വെള്ള കാര്‍ഡ് ഉടമകള്‍ കൂടുതലായി എത്തിയ ദിവസവുമായിരുന്നു ഇത്. ശനിയാഴ്ച 2.59 ലക്ഷം പേര്‍ റേഷന്‍ വാങ്ങിയപ്പോള്‍ അതില്‍ 73,257 പേര്‍ക്കും ആശ്രയമായത് ഒടിപി സംവിധാനമായിരുന്നു.
അതേസമയം കേന്ദ്ര സര്‍ക്കാര്‍ പ്രത്യേക ബില്‍ നല്‍കുന്നതിനായി ഇ പോസ് സംവിധാനത്തില്‍ വരുത്തിയ സോഫ്റ്റ്വെയര്‍ അപ്‌ഡേഷനെ തുടര്‍ന്ന് ഈ മാസത്തെ ആദ്യ രണ്ടു ദിനം റേഷന്‍ വിതരണം മുടങ്ങിയിട്ടുണ്ടായിരുന്നു