തെറ്റ് എല്ലാ കാലവും മറച്ചുപിടിക്കാനാകില്ല, ഒരിക്കല്‍ പിടികൂടുമെന്ന ബോധ്യം വേണം. ശ്ശെടാ വന്ന് വന്ന് ശൈലജ ടീച്ചറും പിണരായിയെ ട്രോളുന്നു. പിന്നെ മാധ്യമങ്ങള്‍ ട്രോളുന്നതില്‍ ഗോവിന്ദന്‍ മാഷിന് എന്തേ ഇത്ര കലിപ്പ്. വിദ്യയുടെ കാര്യത്തില്‍ സ്രീമതി ടീച്ചറിന്റെ എന്നാലും എന്റെ വിദ്യേ വിളിക്ക് പിന്നാലെ ശൈലജ ടീച്ചറിന്റെ വകയും വന്നിട്ടുണ്ട് ഒരു ഐറ്റം ഡയലോഗ്. പക്ഷെ എന്താന്നറിയില്ലെ ടീച്ചര്‍ മുഖ്യനെ നൈസാ ട്രോളിയതാണോ ആവോ. വ്യാജ സര്‍ട്ടിഫിക്കറ്റ് കേസില്‍ കെ വിദ്യയെ തള്ളിപ്പറഞ്ഞിരിക്കുകയാണ് കെകെ ശൈലജ ടീച്ചര്‍. വിദ്യായുടെ കാര്യത്തില്‍ പാര്‍ട്ടിയില്‍ തന്നെ അടി തുടങ്ങിയിട്ടുണ്ട്. ഇപി ജയരാജനും ശ്രീമതിയും ശൈലജ ടീച്ചറുമൊക്കെ വിദ്യയെ തള്ളിക്കളഞ്ഞു പക്ഷെ പാര്‍ട്ടി സെക്രട്ടറി ഗോവിന്ദന്‍ മാഷ് ചേര്‍ത്ത് പിടിച്ചിട്ടുണ്ട്.

അപ്പോള്‍ പറഞ്ഞുവന്നത് ടീച്ചര്‍ പിണറായിയെ ട്രോളിയ സംഭവം. തെറ്റ് എല്ലാ കാലവും മറച്ചുപിടിക്കാനാകില്ലെന്നും ഒരിക്കല്‍ പിടികൂടുമെന്ന ബോധ്യം വേണമെന്നും ടീച്ചര്‍ പറഞ്ഞത് പക്ഷെ ചെന്ന് തറയ്ക്കുന്നത് മുഖ്യനിട്ടും. സോഷ്യല്‍മീഡിയ ടീച്ചറിനേയും ഒന്ന് പൊരിച്ചിട്ടുണ്ട്. പിപിഇ കിറ്റ് അഴിമതിയും ഈ പറഞ്ഞതില്‍ ഉള്‍പ്പെടുമോ എന്ന് ടീച്ചറിന് നേരെ ചോദ്യശരം. സിപിഎമ്മുകാര്‍ ആരെ ഉപദേശിച്ചാലും ബൂമറാങ് പോലെ തിരിച്ചടിക്കുമല്ലോ മുത്തപ്പാ. ഇല്ലാത്ത ബിരുദങ്ങളോ, കഴിവോ ഉണ്ടെന്ന് ധരിപ്പിക്കുന്ന രീതി ശരിയില്ല. അങ്ങനെ തെറ്റ് ചെയ്താല്‍ ഒരിക്കല്‍ പിടിക്കപ്പെടും. അതെല്ലാ കാലവും മറച്ച് വയ്ക്കാന്‍ പറ്റില്ലെന്നായിരുന്നു ശൈലജ ടീച്ചറുടെ പ്രതികരണം. അഖിലയുമായി ബന്ധപ്പെട്ട വിഷയങ്ങള്‍ എന്റെ മുന്നിലില്ല. ആര്‍ഷോ നല്‍കിയ പരാതിയിലാണ് കേസെടുത്തത് എന്നാണ് അറിവ്. അത്തരം ആരോപണങ്ങള്‍ ശരിയാണോ അല്ലയോ എന്ന് അന്വേഷണത്തില്‍ തെളിയും. പങ്കാളിയല്ലെങ്കില്‍ അതും, ആണെങ്കില്‍ അതും തെളിയിക്കപ്പെടും. അതുകൊണ്ടുതന്നെ അക്കാര്യത്തില്‍ തനിക്ക് അഭിപ്രായം പറയാനാകില്ല എന്നായിരുന്നു ശൈലജയുടെ വാക്കുകള്‍.

പിപിഇ കിറ്റ് അഴിമതിയില്‍ കൈ മുഖ്യന്റേതാണ് പക്ഷെ ശൈലജ ടീച്ചറിന്റെ തലയില്‍ കൃത്യമായ് ഇട്ടുകൊടുത്ത് മുഖ്യന്‍ മുങ്ങി. എഐ ക്യാമറ കെ ഫോണ്‍ തുടങ്ങി സകലമാന അഴിമതിയിലും കാശടിച്ചത് മുഖ്യന്‍. ഈ വിഷയത്തില്‍ പാര്‍ട്ടിയില്‍ പോരുണ്ട്. ചേരിതിരിഞ്ഞ് അടിയും തുടങ്ങിയിട്ടുണ്ട്. അതിന്റെ കൂടെ നേതാക്കന്മാര്‍ ഇടയ്ക്കിടെ വന്ന് കുത്തുന്ന പോലൊരു വര്‍ത്താനം. ശൈലജ ടീച്ചര്‍ പ്രഥമദൃഷ്ട്യാ പറഞ്ഞത് വിദ്യയെ ആണെങ്കിലും താങ്ങിയത് മുഖ്യനിട്ടല്ലേയെന്ന് സോഷ്യല്‍മീഡിയയില്‍ ട്രോള്‍. ഇതിന്റെ കൂടെ വിദ്യയെ തള്ളിപ്പറഞ്ഞ് ഒരു വിഭാഗം നേതാക്കളും ചേര്‍ത്തുപിടിച്ച് മറ്റൊരു വിഭാഗവും. അങ്ങനെ ആകെമൊത്തം പാര്‍ട്ടിയില്‍ അടിയാണ്.

ഇതിനിടെ വിദ്യയെ രക്ഷിക്കാന്‍ പോലീസിന്റെ കള്ളക്കളി. ഗെസ്റ്റ് ലക്ചറര്‍ നിയമനത്തിനു വ്യാജ പ്രവൃത്തിപരിചയ സര്‍ട്ടിഫിക്കറ്റ് ഹാജരാക്കിയ കേസില്‍ സിസിടിവി ദൃശ്യങ്ങള്‍ ഇല്ലെന്നു സ്ഥാപിക്കാന്‍ പൊലീസ് ശ്രമം. കേസില്‍ പ്രതിയായ എസ്എഫ്‌ഐ മുന്‍നേതാവ് കെ.വിദ്യ അട്ടപ്പാടി ഗവ. കോളജില്‍ അഭിമുഖത്തിന് എത്തിയതിന്റെ ദൃശ്യങ്ങള്‍ ലഭ്യമല്ലെന്നു പറഞ്ഞ പൊലീസ്, അതു ശരിയല്ലെന്നു പ്രിന്‍സിപ്പല്‍ പറഞ്ഞതോടെ വൈകിട്ടു രേഖകള്‍ ശേഖരിച്ചു. സിസിടിവി ദൃശ്യങ്ങള്‍ പരിശോധിച്ചോ എന്നു തിരക്കിയ മാധ്യമപ്രവര്‍ത്തകരോട്, 6 ദിവസത്തെ ദൃശ്യങ്ങള്‍ മാത്രമേ ഉള്ളൂ എന്നാണു രാവിലെ പൊലീസ് പറഞ്ഞത്. എന്നാല്‍, 12 ദിവസത്തെ ദൃശ്യങ്ങള്‍ കിട്ടുമെന്നു പ്രിന്‍സിപ്പലിന്റെ ചുമതല വഹിക്കുന്ന ലാലി വര്‍ഗീസ് മാധ്യമപ്രവര്‍ത്തകരുടെ ചോദ്യത്തിനു മറുപടി നല്‍കി. ജൂണ്‍ 2ലെ ദൃശ്യങ്ങള്‍ കൈവശമുണ്ടെന്നും അവര്‍ പറഞ്ഞതോടെ പൊലീസ് വെട്ടിലായി. ഇന്നലെ വൈകിട്ട് പൊലീസ് ടെക്‌നിക്കല്‍ ടീമിന്റെ സഹായത്തോടെ ദ്യശ്യങ്ങള്‍ പരിശോധിച്ചു. ജൂണ്‍ 2നു രാവിലെ 10.10നു വിദ്യ കാറില്‍ കോളജില്‍ എത്തുന്നതും 10.13ന് ഓഫിസില്‍ നിന്നു ഫോം വാങ്ങി തിരികെ പോകുന്നതും 10.26ന് അഞ്ചാമത്തെയാളായി അഭിമുഖത്തിന് എത്തുന്നതും 12.19ന് അതേ കാറില്‍ മടങ്ങുന്നതും ദൃശ്യങ്ങളില്‍ ഉണ്ടെന്നാണ് വിവരം.