സൗദിയില്‍ ആത്മഹത്യ ചെയ്ത മലയാളി ദമ്പതികളുടെ മൃതദേഹങ്ങള്‍ നാട്ടിലെത്തിക്കുന്നതിനുള്ള നിയമനടപടികള്‍ പൂര്‍ത്തിയായി. റിയാദ് കിങ് ഫഹദ് മെഡിക്കല്‍ സിറ്റിയിലെ സ്റ്റാഫ് നഴ്‌സായ കോട്ടയം ചങ്ങനാശ്ശേരി തൃക്കൊടിത്താനം ആശാരിപ്പറമ്പില്‍ ഹൗസില്‍ ലിധിയ തോമസ് (31), റിയാദില്‍ െ്രെഡവറായിരുന്ന കോട്ടയം കടയനിക്കാട് ഒലിക്കുന്നേല്‍ ഹൗസില്‍ ആല്‍ബിന്‍ തോമസ് (33) എന്നിവരുടെ മൃതദേഹങ്ങളാണ് ഈ ആഴ്ച നാട്ടിലെത്തിക്കുന്നത്. കഴിഞ്ഞ മെയ് അഞ്ചിന് ആത്മഹത്യാ ശ്രമത്തെ തുടര്‍ന്ന് ഗുരുതരാവസ്ഥയിലായ ലിധിയ, റിയാദ് ശുമൈസി കിങ് സഊദ് ആശുപത്രിയില്‍ ചികിത്സയില്‍ കഴിയുന്നതിനിടെ മെയ് 20നാണ് അന്തരിച്ചത്.

അന്ന് രാവിലെ ആശുപത്രിയില്‍ നിന്ന് ഭാര്യയുടെ മൃതദേഹം ഏറ്റുവാങ്ങി മോര്‍ച്ചറിയിലേക്ക് മാറ്റിയ ശേഷം, ശുമൈസിയിലെ സ്വന്തം ഫ്‌ലാറ്റില്‍ തിരിച്ചെത്തിയ ആല്‍ബിന്‍ അന്നുച്ചയോടെ ജീവനൊടുക്കുകയായിരുന്നു. ദമ്പതികള്‍ അവധിക്ക് നാട്ടിലേക്ക് പോകാന്‍ തയാറെടുക്കുന്നതിനിടെയാണ് പ്രവാസലോകത്തെ നടുക്കിയ ഈ ദൗര്‍ഭാഗ്യകരമായ സംഭവമുണ്ടായത്. നിലവില്‍ ശുമൈസി കിങ് സഊദ് മെഡിക്കല്‍ സിറ്റി മോര്‍ച്ചറിയില്‍ സൂക്ഷിച്ചിരിക്കുന്ന മൃതദേഹങ്ങള്‍ നാട്ടിലെത്തിക്കുന്നതിനുള്ള നടപടികള്‍ക്ക് സാമൂഹിക പ്രവര്‍ത്തകരായ മാത്യു ജോസഫ്, നാസര്‍ കല്ലറ, ഷാജഹാന്‍ താജ് കോള്‍ഡ് സ്‌റ്റോര്‍ എന്നിവരാണ് നേതൃത്വം നല്‍കിയത്.

ആല്‍ബിന്റെ മൃതദേഹം ചൊവ്വാഴ്ച പുലര്‍ച്ചെ 7.15നുള്ള എയര്‍ ഇന്ത്യ എക്‌സ്പ്രസ് വിമാനത്തില്‍ റിയാദില്‍ നിന്ന് കൊണ്ടുപോകും. ഇത് രാത്രി 10.20ഓടെ നെടുമ്പാശ്ശേരിയിലെത്തിക്കും. ലിധിയയുടെ മൃതദേഹം വ്യാഴാഴ്ച രാവിലെ 11ന് പുറപ്പെടുന്ന സൗദി എയര്‍ലൈന്‍സ് വിമാനത്തിലാണ് നാട്ടിലേക്ക് കൊണ്ടുപോകുക. വൈകീട്ട് 6.30ന് മൃതദേഹം നെടുമ്പാശ്ശേരിയില്‍ എത്തിക്കും. കഴിഞ്ഞ കുറച്ചു വര്‍ഷങ്ങളായി കിങ് ഫഹദ് മെഡിക്കല്‍ സിറ്റിയില്‍ സ്റ്റാഫ് നഴ്‌സായി സേവനമനുഷ്ഠിക്കുകയായിരുന്നു ലിധിയ. രണ്ടു വര്‍ഷം മുമ്പാണ് ആല്‍ബിന്‍ തോമസ് റിയാദിലെത്തിയത്. ദമ്പതികള്‍ക്ക് സാറ ആല്‍ബിന്‍ (6) എന്നൊരു മകളുണ്ട്. കുട്ടി നിലവില്‍ നാട്ടില്‍ ബന്ധുക്കളുടെ സംരക്ഷണയിലാണ്. തോമസ് ജോസഫ്, മിനി തോമസ് ദമ്പതികളുടെ മകനാണ് മരിച്ച ആല്‍ബിന്‍ തോമസ്. തോമസ് മാത്യൂ, ആന്‍സി തോമസ് എന്നിവരാണ് ലിധിയയുടെ മാതാപിതാക്കള്‍.