അക്രമകാരികളായ തെരുവുനായ്ക്കളെയും പേപ്പട്ടികളെയും കൊല്ലാനുള്ള അനുമതി തേടി കണ്ണൂര്‍ ജില്ലാ പഞ്ചായത്ത് സുപ്രീം കോടതിയെ സമീപിച്ച കണ്ണൂര്‍ ജില്ലാ പഞ്ചായത്ത് പ്രസിഡന്റ് പി പി ദിവ്യയ്ക്ക് വധഭീഷണി. മൃഗസ്‌നേഹികള്‍ അംഗങ്ങളായ വാട്‌സാപ്പ് ഗ്രൂപ്പിലാണ് ഭീഷണി സന്ദേശം പ്രത്യക്ഷമായത്. വാട്‌സാപ്പ് സന്ദേശം അടക്കം ഉള്‍പ്പെടുത്തി പി പി ദിവ്യ നല്‍കിയ പരാതിയുടെ അടിസ്ഥാനത്തില്‍ കണ്ണൂര്‍ ടൗണ്‍ പൊലീസ് കേസ് രജിസ്റ്റര്‍ ചെയ്തിട്ടുണ്ട്.

ജനജീവിതം ഭീതിയിലാഴ്ത്തുന്ന തരത്തില്‍ ജില്ലയില്‍ തെരുവുനായകളുടെ ആക്രമണം വര്‍ദ്ധിച്ച് വരികയാണെന്ന് ജില്ലാ പഞ്ചായത്ത് കോടതിയെ രേഖാമൂലം അറിയിച്ചിരുന്നു. അഭിഭാഷകന്‍ കെ ആര്‍ സുഭാഷ് ചന്ദ്രനാണ് ജില്ലാ പഞ്ചായത്തിനായി സുപ്രീം കോടതിയില്‍ അപേക്ഷ സമര്‍പ്പിച്ചത്.

കേസ് ഇന്ന് പരിഗണിച്ച കോടതി തെരുവുനായ ആക്രമണത്തില്‍ ജീവഹാനിയുണ്ടാകുന്നത് ദൗര്‍ഭാഗ്യകരമാണെന്ന് നിരീക്ഷിച്ചു. കണ്ണൂരിലെ മുഴപ്പിലങ്ങാട് ഈയിടയ്ക്കുണ്ടായ തെരുവുനായ ആക്രമണത്തില്‍ സംസാരശേഷിയില്ലാത്ത പതിനൊന്നു വയസുകാരന് ജീവന്‍ നഷ്ടമായിരുന്നു. കേന്ദ്ര സര്‍ക്കാര്‍ അടക്കമുള്ള എതിര്‍കക്ഷികളുടെ മറുപടി പരിശോധിച്ച ശേഷം കേസ് ജൂലൈ 12ന് കോടതി വീണ്ടും പരിഗണിക്കും.

അതേസമയം മുഴപ്പിലങ്ങാട് കെട്ടിനകം ബൈത്തുല്‍ റഹ്മയില്‍ നൗഷാദ് നുസീഫ ദമ്പതികളുടെ മകന്‍ നിഹാല്‍ നൗഷാദിനെ അതിക്രൂരമായാണ് തെരുവുനായ്ക്കള്‍ കടിച്ചുകൊന്നത്. ശരീരമാസകലം മുറിവേറ്റിട്ടും നിലവിളിക്കാന്‍ പോലുമാകാതെ കുഞ്ഞ് നിഹാല്‍ യാതന അനുഭവിച്ചതിന്റെ ഞെട്ടല്‍ വിട്ട് മാറുന്നതിന് മുന്‍പ് കഴിഞ്ഞ ദിവസം മുഴപ്പിലങ്ങാട് മറ്റൊരു കുരുന്നിനെ തെരുവുനായ്ക്കള്‍ വളഞ്ഞിട്ട് ആക്രമിച്ചിരുന്നു.

വീടിന്റെ മുറ്റത്ത് കളിച്ചുകൊണ്ടു നില്‍ക്കുകയായിരുന്ന പാച്ചാക്കരയിലെ മൂന്നാം ക്‌ളാസ് വിദ്യാത്ഥിനിയായ ജാന്‍വി(9)ക്കാണ് പരിക്കേറ്റത്. കുട്ടിയുടെ തുടയിലും കൈയിലും അടക്കം ആഴത്തില്‍ മുറിവേറ്റിട്ടുണ്ട്. മൂന്ന് നായ്ക്കളാണ് കുട്ടിയെ വളഞ്ഞിട്ട് ആക്രമിച്ചത്. കുട്ടിയെ കടിച്ചിഴച്ച് കൊണ്ട് പോകാനും ശ്രമിച്ചതായാണ് ദൃക്‌സാക്ഷികള്‍ അറിയിക്കുന്നത്.