കെ വിദ്യയെ പിടികൂടിയത് പൊലീസിന്റെ നാടകമെന്ന് രമേശ് ചെന്നിത്തല... സിപിഎമ്മിന്റെ പാര്ട്ടി നേതാക്കളുടെ അനുവാദത്തോടെയുള്ള അറസ്റ്റാണ് വിദ്യയുടേത്; വിദ്യയെ കഴിഞ്ഞ രണ്ടാഴ്ചക്കാലം പിടികൂടാന് പൊലീസിന് കഴിഞ്ഞില്ലെന്ന് പറയുന്നത് അപമാനകരം
വ്യാജ തൊഴില് പരിചയ സര്ട്ടിഫിക്കറ്റ് നിര്മ്മിച്ച കേസില് കെ വിദ്യയെ പിടികൂടിയത് പൊലീസിന്റെ നാടകമെന്ന് വിമര്ശിച്ച് മുന് പ്രതിപക്ഷ നേതാവ് രമേശ് ചെന്നിത്തല. വിദ്യയെ കഴിഞ്ഞ രണ്ടാഴ്ചക്കാലം പിടികൂടാന് പൊലീസിന് കഴിഞ്ഞില്ലെന്ന് പറയുന്നത് അപമാനകരമാണെന്ന് അദ്ദേഹം വിമര്ശിച്ചു. സിപിഎമ്മിന്റെ പാര്ട്ടി നേതാക്കളുടെ അനുവാദത്തോടെയുള്ള അറസ്റ്റാണ് വിദ്യയുടേതെന്നും കേസില് തെളിവ് നശിപ്പിക്കാനുള്ള എല്ലാ അവസരവും വിദ്യക്ക് പൊലീസ് നല്കിയെന്നും അദ്ദേഹം പറഞ്ഞു.
ഇപ്പോള് ജനവികാരം എതിരാകുന്നുവെന്ന് കണ്ടപ്പോള് പ്രതിയെ പിടികൂടിയതാണ്. കേരളാ പൊലീസിന് വേണമെന്ന് വെച്ചാല് പത്ത് മിനിറ്റില് ഇത്തരം കേസില് പ്രതിയെ പിടികൂടാന് കഴിയും. അത് തനിക്ക് നേരിട്ടറിയാവുന്ന കാര്യമാണെന്നും സംസ്ഥാനത്തിന്റെ മുന് ആഭ്യന്തര മന്ത്രി കൂടിയായ അദ്ദേഹം പറഞ്ഞു.
വിദ്യക്കെതിരായ കേസില് ടവര് ലൊക്കേഷന് പോലും നോക്കാതെ പാര്ട്ടി നേതാക്കള് പറഞ്ഞത് കൊണ്ട് പൊലീസ് പ്രതിയെ പിടികൂടാതെ നിന്നതാണ്. ഇപ്പോള് ജനവികാരം എതിരാകുന്നുവെന്ന് മനസിലായപ്പോള് പാര്ട്ടിയുടെ അനുവാദത്തോടെയാണ് അറസ്റ്റെന്നാണ് തന്റെ വിശ്വാസം. പ്രതിക്ക് രക്ഷപ്പെടാനുള്ള എല്ലാ പഴുതും ഒരുക്കിയിട്ടാണ് അറസ്റ്റ് ചെയ്തതെന്ന് താന് കരുതുന്നുവെന്ന് പറഞ്ഞ അദ്ദേഹം, ഇക്കാര്യത്തില് പൊലീസിന് ഒരു ന്യായീകരണവും പറയാനില്ലെന്നും പറഞ്ഞു. പ്രതിയെ രക്ഷിക്കാനുള്ള ആസൂത്രിത നാടകമാണ് നടക്കുന്നതെന്നും അദ്ദേഹം പറഞ്ഞു.
ഇന്ന് രാത്രിയോടെ കോഴിക്കോട് മേപ്പയൂരില് സുഹൃത്തിന്റെ വീട്ടില് നിന്നാണ് വിദ്യയെ പൊലീസ് അറസ്റ്റ് ചെയ്തത്. മഹാരാജാസ് കോളേജിന്റെ പേരില് വ്യാജ തൊഴില് പരിചയ രേഖയുണ്ടാക്കിയ വിദ്യ ആദ്യം കാസര്കോട് കരിന്തളം ഗവണ്മെന്റ് കോളേജില് താത്കാലിക അധ്യാപികയായി ജോലി ചെയ്തിരുന്നു. പിന്നീട് പാലക്കാട് അട്ടപ്പാടി കോളേജില് ജോലിക്കായി ഇന്റര്വ്യൂവിന് മഹാരാജാസ് കോളേജിലെ രേഖ ഹാജരാക്കി. എന്നാല് ഇവിടുത്തെ മറ്റൊരു അധ്യാപിക മുന്പ് മഹാരാജാസ് കോളേജില് പഠിപ്പിച്ചിരുന്നതിനാല് ഇത് വ്യാജരേഖയാണെന്ന് സംശയം തോന്നി. തുടര്ന്ന് മഹാരാജാസ് കോളേജില് അറിയിക്കുകയായിരുന്നു.
https://www.facebook.com/Malayalivartha
