തിയേറ്റര് സമരം പിന്വലിച്ചു;സിനിമാ ടിക്കറ്റ് നിരക്ക് ഉയരും
ക്ഷേമനിധി നികുതി അഞ്ചുരൂപയാക്കാമെന്ന സര്ക്കാര് ഉറപ്പില് സിനിമാ തിയറ്റര് അടച്ചിടല് സമരം പിന്വലിച്ചു. മന്ത്രിമാരായ തിരുവഞ്ചൂര് രാധാകൃഷ്ണന്, മഞ്ഞളാംകുഴി അലി എന്നിവരുമായി ഫിലിം എക്സിബിറ്റേഴ്സ് ഫെഡറേഷനും മറ്റു സിനിമാ സംഘടനകളും നടത്തിയ ചര്ച്ചയിലുണ്ടായ ഒത്തുതീര്പ്പിനെത്തുടര്ന്നാണു നാലുദിവസമായി സിനിമാ തിയറ്റര് അടച്ചിട്ടുള്ള സമരം ഒത്തുതീര്ക്കാന് ധാരണയായത്.
അഞ്ചുരൂപയില് നിര്മാതാക്കളുടെ നിധിയിലേക്കു രണ്ടുരൂപയും തിയേറ്റര് ഉടമകള്ക്ക് ഒന്നരരൂപയും കെ.എസ്.എഫ്.ഡി.സിക്കും ചലച്ചിത്ര അക്കാദമിക്കും 25 പൈസ വീതവും വകയിരുത്താനാണു ധാരണ. അവശകലാകാരന്മാര്ക്കു വേണ്ടിയുള്ള ക്ഷേമനിധിയിലേക്ക് ഒരുരൂപ മാത്രമാണു ലഭിക്കുക. സെസ് വര്ധിപ്പിച്ചതോടെ സിനിമാ ടിക്കറ്റ് നിരക്കും ഉയരും. തീരുമാനത്തില് സാംസ്കാരിക ക്ഷേമനിധി ബോര്ഡ് ചെയര്മാന് ജി. സുരേഷ്കുമാര് അതൃപ്തി രേഖപ്പെടുത്തി.
സാംസ്കാരിക ക്ഷേമനിധിയിലേക്കു ടിക്കറ്റിനു മൂന്നുരൂപ നിരക്കില് നല്കാതെ ടിക്കറ്റ് സീല് ചെയ്തു നല്കില്ലെന്ന തദ്ദേശഭരണ സ്ഥാപനങ്ങളുടെ നിലപാടിനെതിരെയായിരുന്നു ഫിലിം എക്സിബിറ്റേഴ്സ് ഫെഡറേഷന് നേതൃത്വത്തില് തിങ്കളാഴ്ച സമരം പ്രഖ്യാപിച്ചത്.സമരം ഒത്തുതീര്ന്നതോടെ ഇന്നുമുതല് തിയേറ്ററുകള് തുറന്നു പ്രവര്ത്തിക്കുമെന്ന് ഫിലിം എക്സിബിറ്റേഴ്സ് ഫെഡറേഷന് പ്രസിഡന്റ് ലിബര്ട്ടി ബഷീര് അറിയിച്ചു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
