ഇന്ത്യ കാത്തിരുന്ന ആ സുന്ദര നിമിഷത്തിന് ഇനി വളരെ കുറച്ച് ദിവസം മാത്രം. ചന്ദ്രനില്‍ ഇറങ്ങാനുള്ള ഇന്ത്യയുടെ ചരിത്ര ദൗത്യത്തിന് ഇനി വെറും മൂന്ന് നാള്‍. ഇന്ന് പുലര്‍ച്ചെ രണ്ടിന് ലാന്‍ഡറിനെ വീണ്ടും ചന്ദ്രനിലേക്ക് അടുപ്പിച്ചു. അതോടെ ലക്ഷ്യത്തിലേക്കുള്ള ദൂരം വീണ്ടും കുറഞ്ഞു. ചന്ദ്രന് 30കിലോമീറ്റര്‍ അടുത്ത് ലാന്‍ഡറിനെ എത്തിച്ചു. ഇതും വിജയിച്ചതോടെ ആവേശത്തിലാണ് രാജ്യം.

ബുധനാഴ്ച രാവിലെയോടെ ചന്ദ്രനിലേക്ക് കുത്തനെ താഴ്ത്തുന്ന പ്രക്രിയ ആരംഭിച്ചത്. സങ്കീര്‍ണ്ണമായ ലാന്‍ഡിംഗ് ദൗത്യത്തിനായി ഐ.എസ്.ആര്‍.ഒ. യില്‍ വന്‍ ഒരുക്കങ്ങളാണ് നടത്തിയത്. ബംഗളൂരു പീനിയയിലെ ഇസ്ട്രാക് കേന്ദ്രത്തിലാണ് ലാന്‍ഡിംഗ് നിയന്ത്രിക്കുക. രാജ്യമാകെ ശ്വാസമടക്കി കാത്തിരിക്കുന്ന ചരിത്ര നിമിഷമാണ് കടന്നുപോയത്.

2019ല്‍ ചന്ദ്രനില്‍ പേടകമിറക്കാനും റോവറിനെ അവിടെ നടത്താനുമുള്ള ശ്രമം പരാജയപ്പെട്ടിരുന്നു. അതിന്റെ അനുഭവത്തില്‍ വന്‍ മുന്നൊരുക്കങ്ങളുമായാണ് ഇന്ത്യയുടെ പേടകം ചന്ദ്രന്റെ മുകളില്‍ വീണ്ടും എത്തിയിരിക്കുന്നത്. കൂടുതല്‍ കരുത്തോടെ കൂടുതല്‍ ആധുനികമായ ഉപകരണങ്ങളുമായാണ് പുതിയ ലാന്‍ഡര്‍ എത്തുന്നത്.

ചന്ദ്രന്റെ നിലംതൊടാനുള്ള അവസാനഘട്ട തയ്യാറെടുപ്പുകളുമായി ഇന്ത്യയുടെ അഭിമാനപേടകമായ ചന്ദ്രയാന്‍-3. ചാന്ദ്രപഥത്തില്‍ കറങ്ങുന്ന പ്രൊപ്പല്‍ഷന്‍ മൊഡ്യൂളില്‍നിന്ന് നാലുദിവസംമുമ്പ് സ്വതന്ത്രമായ ലാന്‍ഡര്‍ മൊഡ്യൂളിനെ ഘട്ടംഘട്ടമായി വേഗം കുറച്ച് ചന്ദ്രനിലിറക്കാനുള്ള ശ്രമങ്ങളാണ് നടത്തിവരുന്നത്.

ചന്ദ്രോപരിതലത്തില്‍നിന്ന് കുറഞ്ഞ അകലം 30 കിലോമീറ്റും കൂടിയ അകലം 100 കിലോമീറ്ററുമുള്ള ഭ്രമണപഥത്തില്‍ എത്തിച്ചശേഷമാകും ചന്ദ്രനിലേക്ക് ഇറക്കുക. ഒരുതവണകൂടി 'ഡീ ബൂസ്റ്റ്' പ്രകിയ നടത്തുമ്പോള്‍ കുറഞ്ഞ അകലം 30 കിലോമീറ്ററുള്ള ഭ്രമണപഥത്തിലെത്തുമെന്നാണ് പ്രതീക്ഷിക്കുന്നത്.

ഇതിനുശേഷം ചന്ദ്രോപരിതലത്തില്‍ സോഫ്റ്റ് ലാന്‍ഡിങ്ങിനുള്ള ശ്രമങ്ങള്‍ ആരംഭിക്കും. ലാന്‍ഡര്‍ മൊഡ്യൂളിലെ ത്രസ്റ്ററുകള്‍ പ്രവര്‍ത്തിപ്പിച്ചാണ് വേഗം കുറയ്ക്കുന്നത്. 23-ന് വൈകീട്ട് 5.47-നാണ് സോഫ്റ്റ് ലാന്‍ഡിങ് നിശ്ചയിച്ചിട്ടുള്ളത്. അന്ന് സാധിച്ചില്ലെങ്കില്‍ ഒരുദിവസംകൂടി വൈകിയാകും ചന്ദ്രനിലിറങ്ങുക.

ചന്ദ്രയാന്‍-3ന്റെ മാതൃപേടകമായ പ്രൊപ്പല്‍ഷന്‍ മൊഡ്യൂളില്‍നിന്ന് സ്വതന്ത്രമായ ലാന്‍ഡര്‍ മൊഡ്യൂളിനെ വേഗംകുറച്ച് താഴ്ന്ന ഭ്രമണപഥത്തിലേക്ക് മാറ്റുന്ന ആദ്യ 'ഡീ ബൂസ്റ്റ്' പ്രക്രിയ വിജയകരമായി നടത്തി. വെള്ളിയാഴ്ച വൈകീട്ട് 3.50-ന് ലാന്‍ഡര്‍ മൊഡ്യൂളിലെ ത്രസ്റ്ററുകള്‍ പ്രവര്‍ത്തിപ്പിച്ചാണ് ഈ ദൗത്യം നടപ്പാക്കിയത്. ഇതോടെ ചന്ദ്രോപരിതലത്തില്‍നിന്ന് കുറഞ്ഞ അകലം (പെരിലൂണ്‍) 113 കിലോമീറ്ററും കൂടിയ അകലം (അപ്പൊലൂണ്‍) 157 കിലോമീറ്ററുമുള്ള ഭ്രമണപഥത്തിലായി പേടകം. രണ്ടാമത്തെ ഡീ ബൂസ്റ്റ് പ്രക്രിയ ഞായറാഴ്ച പുലര്‍ച്ചെ രണ്ടിന് നടക്കുമെന്ന് ഇന്ത്യന്‍ ബഹിരാകാശ ഗവേഷണസംഘടന (ഐ.എസ്.ആര്‍.ഒ.) അറിയിച്ചു.

ഇന്ത്യയുടെ അഭിമാന ചാന്ദ്രദൗത്യമായ ചന്ദ്രയാന്‍-3 ചന്ദ്രോപരിതലത്തില്‍ ഇറങ്ങാനുള്ള പുറപ്പാടിലാണ്. ദിവസങ്ങള്‍ക്ക് മുന്‍പ് ചന്ദ്രോപരിതലത്തിന്റെ തൊട്ടടുത്ത് നിന്നുള്ള ചിത്രങ്ങള്‍ ചന്ദ്രയാന്‍-3 പകര്‍ത്തിയിരുന്നു. ഇത് ഐ എസ് ആര്‍ ഒ സോഷ്യല്‍ മീഡിയയില്‍ പങ്ക് വെക്കുകയും ചെയ്തിരുന്നു. വരുംകാല ചാന്ദ്രദൗത്യങ്ങള്‍ക്ക് ഏറെ ഗുണപരമാകുന്ന ചിത്രങ്ങളായിരുന്നു ചന്ദ്രയാന്‍ പകര്‍ത്തിയിരുന്നത്.

ചന്ദ്രയാന്‍ -3 ന്റെ ലാന്‍ഡര്‍ മൊഡ്യൂളില്‍ സ്ഥാപിച്ചിരിക്കുന്ന ക്യാമറകളുടെ ലെന്‍സിലൂടെ പകര്‍ത്തിയ ചിത്രങ്ങള്‍ ചന്ദ്രന്റെ ദുര്‍ഘടമായ ഭൂപ്രകൃതിയെ ആണ് അനാവരണം ചെയ്യുന്നത്. ചിത്രത്തില്‍ 'ഫാബ്രി', 'ജിയോര്‍ഡാനോ ബ്രൂണോ', 'ഹാര്‍ഖെബി ജെ' എന്നീ ഗര്‍ത്തങ്ങളും കാണിക്കുന്നുണ്ട്. ഓഗസ്റ്റ് 15-ന് ആണ് ലാന്‍ഡര്‍ പൊസിഷന്‍ ഡിറ്റക്ഷന്‍ ക്യാമറ ഈ ദൃശ്യങ്ങള്‍ വിദഗ്ധമായി പകര്‍ത്തിയത് എന്നാണ് ഐ എസ് ആര്‍ ഒ പറയുന്നത്.
ഓഗസ്റ്റ് 23 ന് ചന്ദ്രന്റെ ദക്ഷിണധ്രുവത്തില്‍ ലാന്‍ഡര്‍ സോഫ്റ്റ് ലാന്‍ഡിംഗ് ചെയ്യും എന്നാണ് ഐ എസ് ആര്‍ ഒ അറിയിച്ചിരിക്കുന്നത്.