സംസ്ഥാനത്ത് ഓണക്കിറ്റ് വാങ്ങാന്‍ ബാക്കിയുള്ള 90,822 മഞ്ഞ റേഷന്‍ കാര്‍ഡ് ഉടമകള്‍. കിറ്റ് വിതരണം ഇനി റേഷന്‍ കടകള്‍ തുറക്കുന്ന നാളെ തുടങ്ങും. പുതുപ്പള്ളി ഉപതെരഞ്ഞെടുപ്പിനെ തുടര്‍ന്ന് കോട്ടയത്ത് നിര്‍ത്തിവച്ച കിറ്റ് വിതരണവും പുനരാരംഭിക്കും.കോട്ടയം ജില്ലയില്‍ മാത്രം 33,399 പേര്‍ ആണ് കിറ്റ് വാങ്ങാനുള്ളത്.

തെരഞ്ഞെടുപ്പ് കമ്മീഷന്‍ ജില്ലയില്‍ ഏര്‍പ്പെടുത്തിയ വിലക്ക് നീക്കിയത് തിങ്കളാഴ്ച വൈകിട്ടാണ്. അതിനാല്‍ 1210 പേര്‍ക്കു മാത്രമേ കിറ്റ് വാങ്ങാനായുള്ളൂ. വയനാട് ജില്ലയില്‍ 7,000 പേരും ഇടുക്കിയില്‍ 6,000 പേരും കിറ്റ് കിട്ടാത്തവരുണ്ട്. മറ്റു ജില്ലകളില്‍ 2,000 4,000 വരെ പേര്‍ വാങ്ങാനുണ്ട്.

സംസ്ഥാനത്തെ എഎവൈ വിഭാഗത്തില്‍പ്പെട്ട കാര്‍ഡ് ഉടമകള്‍ക്കാണ് ഇത്തവണ ഓണക്കിറ്റ് നല്‍കിയത്. ക്ഷേമ സ്ഥാപനങ്ങളിലെയും ആദിവാസി ഊരുകളിലെയും കിറ്റ് വിതരണം പൂര്‍ത്തിയായതായി സര്‍ക്കാര്‍.