കാരുണ്യത്തിന്റെ കൈത്താങ്ങുമായി സമൂഹത്തിലേക്കിറങ്ങിയ മനുഷ്യസ്നേഹിയായിരുന്നു ഡോ. സഖറിയാസ് മാര്
തെയോഫിലോസ് സഫ്രഗന് മെത്രാപ്പൊലീത്ത. പാവപ്പെട്ടവരെ താഴ്ചയില് നിന്നും കരേറ്റുകയാണ് സഭയുടെ ലക്ഷ്യമെന്ന് വിശ്വസിച്ചിരുന്നയാളായിരുന്നു അദ്ദേഹം. അദ്ദേഹത്തിന്റെ സ്നേഹപൂര്ണമായ കരുതലിന്റെ കരങ്ങള് കേരളത്തിനകത്തും പുറത്തുമുള്ള അശരണര്ക്ക് തണലായി. സഭകളുടെ സമന്വയത്തിനായുള്ള ആഗോള കൂട്ടായ്മയിലെ ശ്രദ്ധേയ സാന്നിധ്യം കൂടിയായിരുന്നു അദ്ദേഹം. ഗ്രീക്കില് തെയോഫിലോസെന്നാല് ദൈവത്തിന്റ സ്നേഹിതന് എന്നര്ഥം. എന്നാല് ദൈവത്തിന്റ മാത്രമായിരുന്നില്ല ആരോരുമില്ലാത്തവന്റെ അത്താണി കൂടിയായിരുന്നു സഫ്രഗന് മെത്രാപ്പൊലീത്ത എന്നും.
കാന്സര് രോഗികള്ക്ക് താങ്ങായ കരുതല് പദ്ധതി, അശരണര്ക്കായി ആരംഭിച്ച പത്തനാപുരത്തെ ആശാഭവന്, ആലുവ ശാന്തിഗിരി ആശ്രമം, മദ്യാസക്തിയില് നിന്നുള്ള മുക്തിയ്ക്കായി ആരംഭിച്ച മോചന, അങ്ങനെ ആ നല്ല മനസില് നിന്ന് പിറവിയെടുത്തത് കരുണയുടെ ഒട്ടേറെ ഉറവകള്. ഏറ്റവും ഒടുവില് ഒറീസയിലേയും ആന്ധ്രയിലേയും ഭിക്ഷക്കാരെ പുനഃരധിവസിപ്പിക്കാനുള്ള പദ്ധതികളുമായി മുന്നോട്ടുപോകുന്നതിനിടെയാണ് വേര്പാട്.
എക്യുമെനിക്കല് രംഗത്തെ ശ്രദ്ധേയ സാന്നിധ്യമായിരുന്ന തെയോഫിലോസ് 348 സഭകള് അംഗമായ അഖില ലോക സഭാകൗണ്സിലില് വര്ഷങ്ങളോളം അംഗമായിരുന്നു. ബോസ്റ്റണ് സര്വകലാശാലയില് നിന്ന് മിസിയോളജിയില് ഡോക്ടറേറ്റ് നേടിയ മെത്രാപ്പോലീത്ത അടൂര് മാവേലിക്കര, കോട്ടയം റാന്നി, കുന്നംകുളം മദ്രാസ്, നോര്ത്ത് അമേരിക്ക യുകെ ഭദ്രാസനങ്ങളുടെ അധിപനായും സേവനം അനുഷ്ഠിച്ചു. വേള്ഡ് മിഷന് ഓഫ് ഇന്ത്യ, ബാംഗ്ലൂര് എക്യുമെനിക്കല് മിഷന് സെന്റര്, നാഷണല് മിഷനറി സൊസൈറ്റി, ബൈബിള് സൊസൈറ്റി കേരള ഘടകം പ്രസിഡന്റ് എന്നീ നിലകളിലും പ്രവര്ത്തിച്ചിട്ടുണ്ട്.
1938ല് നിരണം മട്ടയ്ക്കല് വെണ്പറമ്ബില് വി.കെ. ഉമ്മന്റേയും മറിയാമ്മയുടെയും മകനായി ജനിച്ച തെയോഫിലോസ് അധ്യാപകനായാണ് ഔദ്യോഗിക ജീവിതം ആരംഭിച്ചത്. 1963ല് സഭാശുശ്രൂഷയ്ക്കായി ജീവിതം പൂര്ണമായും മാറ്റിവച്ച തെയോഫിലോസ് 66ല് വൈദികനായും 1980ല് ബിഷപ്പുമായി. 2004ല് സഫ്രഗന് മെത്രാപ്പൊലീത്തയായ അദ്ദേഹം പത്തുവര്ഷമായി ചെങ്ങന്നൂര് മാവേലിക്കര ഭദ്രാസനാധിപനാണ്. എളിയവനെ കുപ്പയില് നിന്ന് ഉയര്ത്തുകയാണ് സഭയുടെ ലക്ഷ്യമെന്ന് അവസാനം വരെയും വിശ്വസിച്ചിരുന്ന മെത്രാപ്പൊലീത്ത കാരുണ്യത്തിന്റേയും കരുതലിന്റേയും നല്ല മുഖമായി പാവങ്ങളുടെ മനസില് എന്നുമുണ്ടാകും.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
